ស្វែងយល់ពីភេសជ្ជៈម៉ាឆាឡាតេ ដែលកំពុងពេញនិយមសម្រាប់យុវជនកម្ពុជា

ប​ច្ចុប្បន្នគេសង្កេតឃើញថា ប្រភេទភេសជ្ជៈម៉ាឆាឡាតេ​ Matchalate ហាក់ជាទីពេញនិយមសម្រាប់អ្នកទទួលទានពិសេសគឺយុវជននៅកម្ពុជានារយៈពេលចុងក្រោយនេះ។ តើភេសជ្ជៈប្រភេទនេះមានរសជាតិឆ្ងាញ់យ៉ាងណា និងមានដើមកំណើតមកពីប្រទេសណាទើបធ្វើឱ្យមនុស្សទូទៅចូលចិត្តទទួលទានវាបែបនេះ?

គួរឱ្យដឹងថា ម្សៅម៉ាឆា (Matcha) មានប្រភពដើមមកពីប្រទេសចិន ដែលត្រូវបានបង្កើតឡើងតាំងពីសម័យរាជវង្សស៊ុយ (Sui Dynasty) និងថាង (Tang Dynasty)។

ទោះជាយ៉ាងណាក៏ដោយ វប្បធម៌នៃការផលិត និងប្រើប្រាស់តែម៉ាឆាបានរីកចម្រើនយ៉ាងខ្លាំងនៅក្នុងប្រទេសជប៉ុនទៅវិញ ដែលធ្វើឱ្យជប៉ុនក្លាយជាប្រភពដ៏ល្បីល្បាញបំផុត នៃម្សៅម៉ាឆាដែលមានគុណភាពខ្ពស់នាពេលបច្ចុប្បន្ន។

អ្នកស្រី អុន តាំងអេង ម្ចាស់ហាង «តោះកាហ្វេ» ស្ថិតនៅម្ដុំទួលទំពូង រាជធានីភ្នំពេញ ប្រាប់ កម្ពុជាថ្មី ថា ប្រភេទម្សៅម៉ាឆានេះ គឺមានប្រភពមកពីប្រទេសជប៉ុន ប៉ុន្តែដើមកំណើតពិតប្រាកដគឺមកពីប្រទេសចិនដែលនៅទីនោះគេតែងតែនិយមយកម្សៅ Matcha ទៅឆុងជាមួយទឹកក្ដៅ ឬឆុងលាយជាមួយទឹកដោះគោស្រស់សម្រាប់ទទួលទានវាជាប្រចាំថ្ងៃ។

ដោយឡែក សម្រាប់ភេសជ្ជៈ ម៉ាឆាឡាតេ នៅក្នុងប្រទសកម្ពុជាវិញ អ្នកស្រី អុន តាំងអេង បានបញ្ជាក់ថា អតិថិជនរបស់អ្នកស្រី​​ ច្រើននិយមទទួលទានភេសជ្ជៈនេះលាយជាមួយទឹកដោះគោស្រស់ ពួកគេច្រើនជាសិស្ស និស្សិត ពិសេសគឺយុវជន ដែលដឹងច្បាស់ថា​ ម៉ាឆាឡាតេ វាជួយដល់សុខភាពបានច្រើន ដូចជា៖ ជួយរក្សាទម្ងន់មិនឱ្យឡើងគីឡូ ជួយឱ្យស្បែកភ្លឺថ្លាបានមួយកម្រិតទៀតផងដែរ។

ម្ចាស់ហាងកាហ្វេរូបនេះ បានឱ្យដឹងទៀតដែរថា ប្រភេទភេសជ្ជៈ ឬម្សៅម៉ាឆា វាអាចមានប្រសិទ្ធិភាពខ្ពស់ទៅបាន ក៏អាស្រ័យទៅលើការជ្រើសរើសម្សៅដែលមានគុណភាពល្អចេញពីប្រទេសជប៉ុន និងចិនដែលប្រទេសទាំងពីរនេះជាស្ថាបនិកនៃការបង្កើតម្សៅនេះឡើងមក ខណៈអ្នកស្រី អុន តាំងអេង ថា ម្សៅម៉ាឆានៅតាមបណ្ដាហាងកាហ្វេខ្លះ ច្រើនតែទិញពីប្រទេសជិតខាង ដោយសារតែតម្លៃក៏រៀងធូរថ្លៃជាងផលិតផលដែលនាំពីប្រទេសជប៉ុន និងចិនផងដែរ។

សម្រាប់ពេលបច្ចុប្បន្ន ហាងកាហ្វេរបស់អ្នកស្រី អុន តាំងអេង ចាប់ពេលម៉ោង៦ព្រឹក​ ដល់ម៉ោង ៩យប់អាចលក់ភេសជ្ជៈចម្រុះ ដែលមានកាហ្វេ និងម៉ាឆាឡាតេ ជូនអតិថិជនបានជាង១០០កែវ ក្នុងមួយថ្ងៃផងដែរ៕

អត្ថបទ ៖ សួស សិត