លោក ផៃ ស៊ីផាន៖ វិស័យ SME ជាដៃគូផលិតចំណូលពន្ធ​ជួយរដ្ឋាភិបាល​អភិវឌ្ឍប្រទេស

វិស័យសហគ្រាសធុនតូច និងមធ្យម (SME) ដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចកម្ពុជា។ ក្នុងចំណោម SME ជាង ៩០ភាគរយ បានចូលរួមចំណែកប្រហែល ៦០ភាគរយនៃផលិតផលក្នុងស្រុកសរុប (GDP) និងបង្កើត​ការងារប្រមាណ ៧០ភាគរយ នៃសេដ្ឋកិច្ចជាតិ។

លោក ផៃ ស៊ីផាន រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានអង្គភាពអ្នកនាំពាក្យរាជរដ្ឋាភិបាលកម្ពុជា បានលើកឡើងថា សហគ្រិនមានគំនិតច្នៃប្រឌិតក្នុងការរកចំណូល។ លើសពីនេះទៀត ក្រុមសហគ្រិន បានបង្កើតអាជីវកម្មសហគ្រាសធុនតូច និងមធ្យម (SME) ជាច្រើន ដែលបានផលិតចំណូលសម្រាប់ពន្ធដារ ផ្តល់ឱ្យរដ្ឋាភិបាលយកទៅប្រើប្រាស់អភិវឌ្ឍប្រទេសជាតិ។

លោកបន្តថា«សហគ្រាសខ្នាតតូច និងមធ្យម ប្រៀបដូចជាត្បូងពេជ្រសម្រាប់ប្រជាជាតិរបស់យើង ជាពិសេស​នៅក្នុងទីផ្សារសេរី យើងត្រូវការគំនិតដែលសហគ្រិនទាំងអស់ចងក្រងយកទៅអនុវត្ត ដើម្បីពង្រីកសក្តានុពល​សេដ្ឋកិច្ចរបស់យើង»។

​

ប៉ុន្តែដើម្បីឈានទៅដល់ការរកចំណូលប្រកបដោយប្រសិទ្ធភាពត្រូវមានទុន, ដូច្នេះរាជរដ្ឋាភិបាល មិនព្រងើយកន្តើយ​បង្កើតកម្មវិធីជួយដល់សហគ្រិននោះទេ។ លោក ផៃ ស៊ីផាន បានកត់សម្គាល់ឃើញថា សហគ្រិនចេះរកលុយ ប៉ុន្តែមាន​បញ្ហា​រឿងទុនពង្រីកអាជីវកម្ម ដោយសារពួកគេប្រើកម្ចីពីធនាគារ ដែលមានការប្រាក់ខ្ពស់។

ប្រធានអង្គភាពអ្នកនាំពាក្យរាជរដ្ឋាភិបាល លោក ផៃ ស៊ីផាន បានគូសបញ្ជាក់ថា បញ្ហានេះ លោកនឹងជម្រាបទៅ​រដ្ឋមន្រ្តីក្រសួងសេដ្ឋកិច្ច លោក អូន ព័ន្ធមុនីរ័ត្ន ដើម្បីច្នៃប្រឌិតអំពីគោលនយោបាយហិរញ្ញវត្ថុ​បណ្តាក់ទុនជួយ​ដល់សហគ្រិនវ័យក្មេង ឱ្យក្លាយទៅជាអ្នកផលិតពន្ធដារជួយដល់រដ្ឋាភិបាល ពោលគឺមិនមែនត្រឹមតែចំណូល​សម្រាប់សហគ្រិនខ្លួនឯងទេ គឺចំណូលសម្រាប់រដ្ឋផងដែរ។

នៅក្នុងពិធីអញ្ជើញជួបសំណេះសំណាល និងពិសារ​អាហារ​​សាមគ្គី ជាមួយម្ចាស់សហគ្រាសធុនតូច និងមធ្យម ក៏ដូចជា​អ្នក​ធ្វើធុរកិច្ច​នៅកម្ពុជា កាលពីខែមេសា ឆ្នាំ ២០២៣ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានឱ្យដឹងថា បច្ចុប្បន្នកម្ពុជាមានសហគ្រាសធុនតូច និងមធ្យម និងសិប្បកម្មសរុបមានចំនួនប្រមាណ៧០ម៉ឺនមូលដ្ឋាន ស្មើនឹងជាង ៩០ភាគរយ, ក្នុងនោះ ក្នុងវិស័យកម្មន្តសាលមានប្រមាណ ៤ ម៉ឺនមូលដ្ឋាន ស្មើនឹងប្រមាណ ៧ភាគរយ ហើយប្រភេទ​កែច្នៃចំណីអាហារមានប្រមាណ ៨០ភាគរយ ក្នុងនោះរោងចក្រធុនធំមានប្រមាណជិត ២ពាន់មូលដ្ឋាន។​

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យកម្ពុជា បានលើកឡើងថា យុវជនគឺជាកម្លាំងផលិត និងបង្កើនផលិតភាពសម្រាប់ប្រទេសជាតិ។ លោករំពឹងថា រដ្ឋាភិបាលថ្មីនឹងរៀបចំគោលនយោបាយដើម្បីជួយវិស័យ SME ឱ្យកាន់តែរឹងមាំថែមទៀត ព្រោះ ៦០ភាគរយ នៃអាជីវកម្មនៅ​ក្នុងប្រទេស គឺជា SME។

សូមបញ្ជាក់ថា សហគ្រាស​ធុន​តូច និង​មធ្យម (SME) នៅតែត្រូវបានចាត់ទុកថា ជា​ផ្នែក​ដ៏សំខាន់​ក្នុង​ការជំរុញ​កំណើន​វិស័យ​ឧស្សាហកម្ម​កម្ពុជា ​ដែល​នឹង​ជួយ​ឲ្យ​រដ្ឋាភិបាល​អាច​សម្រេចបាន​ផែនការ​ប្រែក្លាយ​កម្ពុជា​ទៅជា​ប្រទេស​មាន​ប្រាក់ចំណូល​​មធ្យម​កម្រិត​ខ្ពស់​ក្នុង​ឆ្នាំ​ ២០៣០ និង​ប្រាក់ចំណូល​ខ្ពស់​នៅ​ឆ្នាំ​ ២០៥០​៕