មន្ត្រីជាន់ខ្ពស់ធនាគារជាតិ៖ សហគ្រាសធុនតូច និងមធ្យម ដើរតួសំខាន់ក្នុងការអភិវឌ្ឍសេដ្ឋកិច្ចជាតិ

មន្ត្រីជាន់ខ្ពស់ធនាគារជាតិនៃកម្ពុជាបានអះអាងថា សហគ្រាសធុនតូច និងមធ្យម (SME) ត្រូវបានចាត់ទុកជា​សសរស្តម្ភ និងចូលរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចជាតិ។

ថ្លែងក្នុងសន្និសីទម៉ាក្រូសេដ្ឋកិច្ចប្រចាំឆ្នាំលើកទី១២ ឆ្នាំ២០២៥ ស្តីពី “ការជំរុញការចូលរួមរបស់សហគ្រាសធុនតូច និងមធ្យមក្នុងការអភិវឌ្ឍសេដ្ឋកិច្ចកម្ពុជា” នៅថ្ងៃទី ២៦ ធ្នូនេះ លោក រ័ត្ន សុវណ្ណនរៈ ទេសាភិបាលរងធនាគារជាតិនៃកម្ពុជា បានឱ្យដឹងថា សហគ្រាសធុនតូច និងមធ្យម ត្រូវបានចាត់ទុកជាសសរស្តម្ភនៃសេដ្ឋកិច្ចកម្ពុជា ដែលតំណាងឱ្យសហគ្រាស​អាជីវកម្មភាគច្រើនលើសលប់ប្រមាណ ៩០% នៃសហគ្រាសអាជីវកម្មទាំងអស់ ព្រមទាំងកំពុងបង្កើតការងារជាច្រើនក្នុងវិស័យឯកជន។

ការផ្តល់ឥណទានចំពោះសហគ្រាសធុនតូច និងមធ្យម បន្តកើនឡើងជាលំដាប់ ដោយគិតត្រឹមឆ្នាំ២០២៤ ឥណ​ទានចំពោះវិស័យនេះ បានកើនឡើងដល់ប្រមាណ ២០,១ ប៊ីលានដុល្លារ និងមានសមាមាត្រប្រមាណ ៣៥% នៃឥណទានចំពោះអាជីវកម្មសរុប។

លោក រ័ត្ន សុវណ្ណនរៈ បន្ថែមថា ធនាគារជាតិ តែងតែចូលរួមចំណែក ក្នុងការគាំទ្រការអភិវឌ្ឍ SME តាម​រយៈ​ការធ្វើទំនើបកម្មប្រព័ន្ធទូទាត់ឱ្យកាន់តែសម្បូរបែប ការសម្រួលដល់ការបើកគណនីធនាគារ និងការលើកទឹកចិត្តដល់ការផ្តល់​ហិរញ្ញប្បទានចំពោះ SME។

ជាក់ស្តែង ធនាគារជាតិបានអនុញ្ញាតឱ្យគ្រឹះស្ថានធនាគារ និងហិរញ្ញវត្ថុ ថ្លឹងហានិភ័យត្រឹម ៧៥% ប៉ុណ្ណោះ សម្រាប់ឥណទានចំពោះ SME ដែលបានចុះបញ្ជី និងរៀបចំរបាយការណ៍ហិរញ្ញវត្ថុបានសមស្រប។ ការណ៍នេះជួយលើកទឹកចិត្តដល់ SME អាចទទួលបានឥណទានកាន់តែច្រើនក្នុងអត្រាការប្រាក់ទាប។

លោកបណ្ឌិត ឃូ វុឍ្ឍី អគ្គនាយកគោលនោយបាយ និងសហប្រតិបត្តិការអន្តរជាតិ នៃធនាគារជាតិ មានប្រសាសន៍ថា ធនាគារជាតិ នៅតែប្តេជ្ញាចិត្តយ៉ាងមុតមាំក្នុងការធ្វើការយ៉ាងជិតស្និទ្ធជាមួយរាជរដ្ឋាភិបាល វិស័យឯកជន និង​ដៃគូអភិវឌ្ឍន៍នានា ដើម្បីគាំទ្រ SME ឱ្យបង្កើនការចូលរួមថែមទៀតក្នុងការគាំទ្រ និងជំរុញកំណើនសេដ្ឋកិច្ចកម្ពុជា។

លើសពីនេះ ការពង្រឹងគុណភាព SME បានរួមចំណែកបង្កើនភាពធន់ ការរួបរួម និងកសាងវិបុលភាពសង្គមរយៈពេលវែងដល់កម្ពុជា៕

អត្ថបទ៖សំអឿន