បុរសម្នាក់ធ្លាក់ពីលើដើមគគីរបាក់ក ស្លាប់ភ្លាមៗនៅក្នុងវត្តព្រែកឯង

បុរស ជាកម្មករស៊ីឈ្នួលកាប់ដើមឈើ បានភ្លាត់ស្នៀតធ្លាក់បាក់កស្លាប់ភ្លាមៗ គួរឱ្យអាណោចអធ័ម នៅព្រឹកថ្ងៃទី១០ ខែធ្នូ ឆ្នាំ២០២៣នេះ ស្ថិតក្នុវត្តព្រែកឯង ខណ្ឌច្បារអំពៅ រាជធានីភ្នំពេញ។

ហេតុការណ៍នេះ បានកើតឡើងនៅវេលាម៉ោង ១១:០០ នាទីព្រឹក ថ្ងៃទី១០ ខែធ្នូ ឆ្នាំ២០២៣នេះ ក្នុងបរិវេណវត្តព្រែកឯង ស្ថិតក្នុងភូមិមិត្តភាព សង្កាត់ព្រែកឯង ខណ្ឌច្បារអំពៅ រាជធានីភ្នំពេញ។ ជនរងគ្រោះឈ្មោះ នន់ អ៊ី អាយុ៤៥ឆ្នាំ រស់នៅភូមិព្រៃអង្គុញ ឃុំព្រៃកណ្តៀង ស្រុកពាមរក៍ខេត្តព្រៃវែង។

បើតាមការឱ្យដឹងរបស់លោក សំ សុធារី ចៅសង្កាត់ព្រែកឯង នៅថ្ងៃកើតហេតុ ព្រះសង្ឃនៅវត្តព្រែកឯង បានជួលជនរងគ្រោះឱ្យកាប់ដើមឈើទាលដើម ច្រៀកយកឈើបន្ទះសម្រាប់ប្រើការក្នុងវត្ត។ លុះពេលកំពុងកាប់មែក ក៏របូតដៃធ្លាក់មកក្រោមបណ្តាលឱ្យបាក់កស្លាប់ភ្លាមៗនៅនឹងកន្លែង។

លោកចៅសង្កាត់ បានបន្តថា ដោយសារមានការអាណិតអាសូរពេក លោក ចេង មុនីរ៉ា អភិបាលខណ្ឌច្បារអំពៅ បានស្នើសុំរថយន្តមន្ទីរពេទ្យបង្អែកខណ្ឌច្បារអំពៅដឹកសពជនរងគ្រោះទៅធ្វើបុណ្យនៅស្រុកកំណើត ព្រមទាំងជួយឧបត្ថម្ភបច្ច័យសម្រាប់ធ្វើបុណ្យតាមប្រពៃណីទៀតផង៕

អត្ថបទ៖ នរា