សន្និបាត CPP សម្រេចជ្រើសតាំងសមាជិកគណៈអចិន្ត្រៃយ៍ថ្មីចំនួន២៣រូបបន្ថែមទៀត

ឥស្សរជនចំនួន២៣រូបរបស់គណបក្សប្រជាជនកម្ពុជា ត្រូវបានអង្គសន្និបាតគណៈកម្មាធិការកណ្តាល សម្រេចបោះឆ្នោតជ្រើសតាំងជាសមាជិកគណៈអចិន្ត្រៃយ៍នៃគណៈកម្មាធិការកណ្តាលគណបក្សប្រជាជនកម្ពុជា។

ការបោះឆ្នោតជ្រើសតាំងសមាជិកគណៈអចិន្ត្រៃយ៍បន្ថែមនេះ ធ្វើឡើងក្នុងមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា ដែលធ្វើឡើងនៅវិមាន៧មករា ដែលធ្វើឡើងក្រោមអធិបតិភាព សម្តេចពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា និងសម្តេចតេជោ ហ៊ុន សែន ប្រធានគណបក្សប្រជាជនកម្ពុជា នៅព្រឹកថ្ងៃទី១០ ខែធ្នូ ឆ្នាំ២០២៣នេះ។

សមាជិកគណៈអចិ​ន្ត្រៃយ៍ ដែលទើបជ្រើសតាំងបន្ថែមទាំង២៣រូបនោះ រួមមាន៖ លោក វង សូត, លោក ស៊ុន ចាន់ថុល, លោក ហង់ជួន ណារ៉ុន, លោក សាយ សំអាល់, លោក ស សុខា, លោក ទៀ សីហា, លោក កើត រិទ្ធ, លោក សុខ ចិន្តាសោភា, លោក វង្សី វិស្សុត, លោក ឱម យ៉ិនទៀង, លោក ជីវ កេង, លោក អ៊ុច បូររិទ្ធ, លោក អូស្មាន ហាស្សាន់, លោក ហ៉ីង ប៊ុនហៀង, លោក ម៉ៅ សុផាន់, លោក ទៀ វិញ, លោក សឹង សំណាង, លោក ស ថេត, អ្នកឧកញ៉ា លី យ៉ុងផាត់, លោកស្រី ជា សិរី, លោក សោម សឿន, លោក ហ៊ុន ម៉ានី និងលោក ប៉េង ពោធិ៍នា។

ក្នុងនោះ អង្គសន្និបាតគណៈកម្មាធិការកណ្តាល ក៏បានសម្រេចជ្រើសតាំងអ្នកឧកញ៉ា លី យ៉ុងផាត់ ឱ្យកាន់ជាប្រធានគណៈកម្មាធិការហិរញ្ញវត្ថុនៃគណៈកម្មាធិការកណ្តាល ជំនួសលោក ស៉ីម កា ដែលសុំលាលែងផងដែរ។  

គួរជម្រាបថា​ ក្នុងរយៈពេលពីរថ្ងៃនេះ មហាសន្និបាតរបស់គណបក្សប្រជាជនកម្ពុជា បានប្រព្រឹត្តទៅក្រោមរបៀបវារៈសំខាន់​ៗចំនួន៣ គឺ៖ ១/ពិនិត្យឆ្លងសេចក្តីព្រាងរបាយការណ៍ស្តីពីសភាពការណ៍ទូទៅ និងការងារគណបក្សឆ្នាំ២០២៣ និងទិសដៅភារកិច្ចឆ្នាំ២០២៤​ ២/បោះឆ្នោតជ្រើសតាំងបំពេញបន្ថែមសមាជិកគណៈកម្មាធិការកណ្តាលចំនួន៤៩៦នាក់និងបោះឆ្នោតជ្រើសតាំងបំពេញបន្ថែមសមាជិកគណៈអចិន្ត្រៃយ៍គណៈកម្មាធិការកណ្ដាល ព្រមទាំងបោះឆ្នោតជ្រើសតាំងបន្ថែមអនុប្រធានគណបក្សមួយរូប គឺសម្ដេចធិបតី ហ៊ុន ម៉ាណែត៕