សាំងចុះថ្លៃមកត្រឹម ៤១៥០រៀលមួយលីត្រ ចាប់ពីថ្ងៃនេះ ដល់ថ្ងៃទី ២០ ធ្នូ

ក្រសួងពាណិជ្ជកម្ម បានប្រកាសថា ប្រេងសាំងធម្មតា និងម៉ាស៊ូត លក់រាយនៅកម្ពុជា មានតម្លៃ ៤ ១៥០ រៀល/លីត្រ។  ដោយតម្លៃនេះចាប់អនុវត្តពីថ្ងៃទី១១ ដល់ថ្ងៃទី ២០ ខែធ្នូ ឆ្នាំ២០២៣។ បើតាមការបង្ហាញរបស់ក្រសួងពាណិជ្ជកម្ម តម្លៃនេះ សម្រាប់ប្រេងសាំង និងប្រេងម៉ាស៊ូត បានចុះថ្លៃ ១៥០រៀលដូចគ្នា ពី ៤៣០០រៀល មកត្រឹម ៤១៥០រៀល។

បច្ចុប្បន្ន​នេះប្រេងឥន្ធនៈដែលកម្ពុជាប្រើប្រាស់ បាននាំចូលពីប្រទេសសិង្ហបុរី ថៃ និងវៀតណាម។ ក្រុមហ៊ុនលក់​រាយនៅកម្ពុជា ដែលនាំចូលប្រេងឥន្ធនៈ មានដូចជា ក្រុមហ៊ុនតេលា សូគីម៉ិច ប៉ាប៉ា សាវីម៉ិច លឹមឡុង និងក្រុម​ហ៊ុនមួយចំនួនទៀត។ ចំណែកក្រុមហ៊ុនបរទេស ដែលនាំចូលប្រេងឥន្ធនៈមកស្រុកខ្មែរ រួមមាន ក្រុមហ៊ុនតូតាល់ កាល់តិច និងក្រុមហ៊ុនភីធីធី។ នេះបើតាមការបញ្ជាក់របស់អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ។

សូមបញ្ជាក់ថា ក្រសួងពាណិជ្ជកម្ម បានចេញតម្លៃលក់រាយរៀងរាល់ ១០ថ្ងៃម្តង ដើម្បីឆ្លើយតបឱ្យទាន់និន្នាការនៃការប្រែ​ប្រួលថ្លៃប្រេងឥន្ធនៈនៅលើសកលលោក៕