អតីតនិពន្ធនាយកវិទ្យុបារាំង លោក សេង ឌីណា ត្រូវបានតែងតាំងជារដ្ឋលេខាធិការក្រសួងយុត្តិធម៌

អតីតនិពន្ធនាយកជាភាសាខ្មែរ នៃវិទ្យុបារាំងអន្តរជាតិ (RFI) លោក សេង​ ឌីណា ទទួលបានការតែងតាំងមុខតំណែងជារដ្ឋលេខាធិការក្រសួងយុត្តិធម៌។ នេះបើតាមព្រះរាជក្រឹត្យរបស់ព្រះមហាក្សត្រនៃកម្ពុជា នៅថ្ងៃទី១៥ ខែធ្នូ ឆ្នាំ២០២៣ នេះ។

ការទទួលបានតំណែងជារដ្ឋលេខាធិការក្រសួងយុត្តិធម៌ពេលនេះ គឺក្រោយពេលដែលលោក សេង ឌីណា បានប្រកាសលាឈប់ពីវិទ្យុបារាំងអន្តរជាតិ (RFI) កាលពីចុងខែវិច្ឆិកា កន្លងទៅថ្មីៗនេះ។ លោក សេង ឌីណា បានបំពេញការងារនៅវិទ្យុបារាំងនេះអស់រយៈពេល១៧ឆ្នាំ ហើយការសម្រេចចិត្តដើរចេញពីវិទ្យុបារាំងពេលនេះ ត្រូវបានលោក បញ្ជាក់ថា ដើម្បីចាប់ផ្តើមទំព័រជីវិតថ្មី។

តាមរយៈសំណេរនៅលើបណ្ដាញសង្គមហ្វេសប៊ុក នៅពេលកន្លងមក លោក សេង ឌីណា បានរៀបរាប់ដូច្នេះថា៖ «មានប្រិយមិត្តជាច្រើនតែងតែសួរនាំហេតុអ្វីបានជាខ្ញុំមិនចេញវីដេអូថ្មីទៀត មួយរយៈពេលកន្លងទៅនេះ។ ជាដំបូង ខ្ញុំសូមថ្លែងអំណរគុណអ្នកទាំងអស់គ្នា ដែលតែងតែគាំទ្រ និងតាមដានមើលវីដេអូរបស់ខ្ញុំ ហើយក៏សូមអភ័យទោសដែលមិនបានចេញវីដេអូថ្មី ដោយសារតែខ្ញុំកំពុងស្ថិតនៅក្នុងដំណាក់កាលផ្លាស់ប្តូរដ៏សំខាន់មួយ នៅក្នុងជីវិតផ្ទាល់ខ្លួនក៏ដូចជាការងារ។ ក្រោយពីបានធ្វើការអស់រយៈពេល ១៧ឆ្នាំ ខ្ញុំនឹងលាឈប់ពីវិទ្យុបារាំងអន្តរជាតិ (RFI) នៅចុងខែវិច្ឆិកានេះ ដើម្បីចាប់ផ្តើមទំព័រជីវិតថ្មី»។

ការចាប់ផ្ដើមទំព័រជីវិតថ្មីរបស់លោក សេង ឌីណា ត្រូវបានបង្ហាញនៅពេលនេះ តាមរយៈការចូលបំពេញកិច្ចការនៅក្នុងជួររាជរដ្ឋាភិបាលកម្ពុជា ពោលគឺក្នុងតំណែងជារដ្ឋលេខាធិការក្រសួងយុត្តិធម៌៕