អ្នកជំនាញ ៖ វិស័យសំខាន់បី ដែលកម្ពុជា ចង់ឱ្យបារាំងចូលមកវិនិយោគ

អ្នកជំនាញវិនិយោគ និងសេដ្ឋកិច្ច ចង់ឃើញវត្តមានវិនិយោគិនបារាំងចូលមកវិនិយោគលើវិស័យកសិកម្ម កសិក-ឧស្សាហកម្មកែច្នៃ វិស័យទេសចរណ៍ និងសេវាកម្ម នៅកម្ពុជាឱ្យបានច្រើន ដោយសារវិស័យទាំងនេះ ទំហំនៃការវិនិយោគរបស់បារាំងនៅមានចំនួនតិច។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងថា«កន្លងមកក្រុមហ៊ុនបារាំង បានវិនិយោគនៅកម្ពុជា មានដូចជា វិស័យសណ្ឋាគារ ផ្នែកឱសថ ហិរញ្ញវត្ថុ និងធនគារជាដើម។ ដោយឡែក​ផ្នែកកសិកម្មនៅមានចំនួនតិចតួចនៅឡើយ ដែលបារាំង គួរចូលរួមអភិវឌ្ឍវិស័យនេះ ដើម្បីធ្វើការកែច្នៃសម្រាប់នាំចេញ។

ប្រធានស្តីទីសភាពាណិជ្ជកម្មកម្ពុជា បានបន្តទៀតថា ភាពអំណោយផលទីតាំងភូមិសាស្រ្តល្អ ជាពិសេសកម្ពុជា សល់វត្ថុធាតុដើម ដែលសព្វថ្ងៃនេះ បាននាំចេញស្រស់ទៅប្រទេសជិតខាង នាំឱ្យបាត់តម្លៃបន្ថែមជាច្រើន។ ប្រសិនបើបារាំងបង្កើតរោងចក្រវិនិយោគលើឧស្សាហកម្មកែច្នៃកសិផល នឹងផ្តល់កម្រៃបន្ថែម និងកម្លាំងពលកម្ម​សម្រាប់ពលរដ្ឋកម្ពុជា ផងដែរ។

ទន្ទឹមនេះ ក្រៅពីវិស័យកសិកម្ម វិស័យទេសចរណ៍ និងសេវាកម្ម ក៏អ្នកឧកញ៉ា លឹម ហេង មើលឃើញថា មាន​សក្តានុពល​ខ្លាំងផងដែរ។ អ្នកឧកញ៉ា បានគូសបញ្ជាក់ថា កម្ពុជា បានអភិវឌ្ឍលើហេដ្ឋារចនាសម្ព័ន្ធទាំងផ្លូវថ្នល់ អាកាសយានដ្ឋានអន្តរជាតិ កំពង់ផែ ដែលបានបម្រើឱ្យស្ទើរគ្រប់វិស័យ ជាឱកាសក្នុងការវិនិយោគទទួល​បានផលចំណេញខ្ពស់ នាថ្ងៃអនាគត។ អ្នកឧកញ៉ា លឹម ហេង ចង់ឃើញអ្នកវិនិយោគិនបារាំង បោះទុន​រកស៊ី​លើវិស័យទាំងអស់នេះ នៅកម្ពុជា។

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានលើកឡើងថា  បារាំងគឺជាប្រទេស​ដ៏មានឥទ្ធិពលមួយនៅក្នុងសហគមអឺរ៉ុប ហើយបារាំង ក៏ជាទីផ្សារសំខាន់មួយក្នុងចំណោមទីផ្សារអន្តរជាតិដទៃ ដែល​មានការបញ្ជាទិញផលិតផលកាត់ដេរវាយនភណ្ឌ និងសម្លៀកបំពាក់ពីកម្ពុជា។

លោកកត់សម្គាល់ឃើញថា ទោះបីការបញ្ជាទិញផលិតផលកម្ពុជាពីសហគមន៍អឺរ៉ុប មានការថមថយ តែទីផ្សារ​បារាំងនៅតែដើរតួនាទីសំខាន់សម្រាប់ការនាំចេញទំនិញរបស់កម្ពុជា។

ថ្លែងពីប្រទេសបារាំង សម្តេចនាយករដ្ឋមន្រ្តី ហ៊ុន ម៉ាណែត បានលើកទឹកចិត្តធុរកិច្ចបារាំងក្នុងការចាប់ផ្តើម និងពង្រីក​ប្រតិបត្តិការនៅកម្ពុជា លើវិស័យដែល​មានស្រាប់ និងវិស័យដែលអាចទាក់ទាញនវានុវត្តន៍ ការវិនិយោគ ដូចជា វិស័យកសិកម្ម, កែច្នៃម្ហូបអាហារ, អគ្គិសនី និងអេឡិចត្រូនិច, ការថែទាំសុខភាព, អប់រំ បច្ចេកវិទ្យាព័ត៌មាន ក៏ដូចជា វិស័យត្រួសត្រាយផ្លូវ ដែលអាចផ្តល់ផល​ប្រយោជន៍ដល់អ្នកចាប់ផ្តើមមុនគេ (first-mover advantage) ដូចជាវិស័យយានយន្ត,បរិវត្តកម្មឌីជីថល, បច្ចេកវិទ្យា​បៃតង ការស្រាវជ្រាវផ្នែកវេជ្ជសាស្ត្រ, ឧស្សាហកម្មវប្បធម៌ និងច្នៃប្រឌិត ជាដើម។

ទោះយ៉ាងណា គិតមកដល់ពេលនេះ មានក្រុមហ៊ុនអគ្គិសនី ក្រុមហ៊ុនវិស័យថាមពលកកើតឡើងវិញ វិស័យ​ដឹកជញ្ជូនផ្លូវដែក និងផលិតរថភ្លើងល្បឿនលឿន ចំនួន៥ហើយ ដែលបានចាប់អារម្មណ៍បោះទុន​វិនិយោគនៅកម្ពុជា ក្រោយពីបានជួប​សម្តែងការគួរសមជាមួយសម្តេច ហ៊ុន ម៉ាណែត នៅប្រទេសបារាំង កាលពីថ្ងៃទី ១៥ មករា។

សម្តេចធិបតី ហ៊ុន ម៉ាណែត បានបំពេញបេសកកម្មនៅតំបន់អឺរ៉ុបចាប់ពីថ្ងៃទី១៣ ដល់ថ្ងៃទី១៩ ខែមករា ឆ្នាំ២០២៤។ នៅក្នុងបេសកកម្មមួយយសប្តាហ៍នៅតំបន់អឺរ៉ុបនេះ សម្តេចធិបតី នឹងចូលរួមកិច្ចប្រជុំប្រចាំឆ្នាំលើកទី៥៤ នៃវេទិកា​សេដ្ឋកិច្ចពិភពលោក ក្រោមមូលបទ«ការកសាងឡើងវិញនូវទំនុកចិត្ត» នៅទីក្រុងដាវ៉ូស ប្រទេសស្វីស និងបំពេញ​ទស្សនកិច្ចនៅប្រទេសបារាំងតបតាមការអញ្ជើញរបស់លោក អេម៉ានុយអែល ម៉ាក្រុង ប្រធានាធិបតី​បារាំង ​ចាប់ពី​ថ្ងៃទី១៨ ដល់ថ្ងៃទី១៩ ខែមករា ឆ្នាំ២០២៤៕