ថាក់ស៊ីន ស្នើ​​ឱ្យ​ថៃលក់ «ទិដ្ឋាការមាស» ដើម្បីជំរុញសេដ្ឋកិច្ច​ ស្រដៀងនឹង​ផែនការ ត្រាំ

អតីតនាយករដ្ឋមន្រ្តីថៃ លោក ថាក់ស៊ីន ស៊ីណាវ៉ាត្រ កាលពីថ្ងៃព្រហស្បតិ៍ បាន​ស្នើ​ឱ្យ​ប្រទេសថៃបង្កើតគម្រោង «ទិដ្ឋាការមាស» ដើម្បីលក់ទៅឱ្យ​អ្នកមានៗជាបរទេស ដើម្បីជំរុញសេដ្ឋកិច្ចថៃដោយ​បង្កើន​ចំណូលជាតិ ស្រដៀងគ្នានឹង​ផែនការរបស់​ប្រធានាធិបតីសហរដ្ឋអាមេរិក លោក ដូណាល់ ត្រាំ ដែល​ប្រកាសឡើងកាលពីចុងខែកុម្ភៈ។ នេះបើតាមការចុះផ្សាយរបស់សារព័ត៌មាន​ Bloomberg។

ថ្លែងក្នុងកម្មវិធី «Unlocking Thailand’s Future» លោក ថាក់ស៊ីន បាន​អះអាងថា គម្រោង​ទិដ្ឋាការ​មាសនេះ ​អាច​​​រួម​ចំណែក​ដល់សេដ្ឋកិច្ចថៃ រហូតដល់​ទៅ ៥០០ ​ប៊ី​លាន​ដុល្លារ​​។ លោកស្នើថា ថៃអាចទាក់ទាញអ្នកមាន​ៗបរទេសឱ្យ​ទិញ​រហូតដល់ទៅ ៦០០ ០០០ នាក់ ហើយថៃអាចលក់ទិដ្ឋាការមាសនេះ​ក្នុងតម្លៃ ១ លាន​ដុល្លារ សម្រាប់មនុស្សម្នាក់។

លោក ថាក់ស៊ីន បន្តថា ជា​ថ្នូរ​នឹង​​នោះ​ ជនបរទេសដែលមាន​ទិដ្ឋាការមាស អាច​ទិញ​​អចលន​ទ្រព្យ​នៅក្នុងប្រទេសថៃ ​ដែល​នេះ​នឹ​ង​ជួយ​ដល់​វិស័យ​អចលន​ទ្រព្យ។ សម្រាប់ប្រាក់ដែលរកបាន​​ រដ្ឋាភិបាលថៃអាច​យលធ្វើជាមូលនិធិដើម្បីជំរុញវិស័យអប់រំក្នុងប្រទេសថៃ។ ​

លោកថ្លែងយ៉ាងដូច្នេះថា៖ «​វា​នឹង​ជំរុញ​កំណើន GDP (ផលិតផលក្នុងស្រុកសរុប) កាត់បន្ថយ​បំណុល​សាធារណៈ ជំរុញ​ការ​ប្រើប្រាស់​ក្នុងស្រុក​។ វាថ្មី លុយ​ភ្លាមៗ ហើយវាល្អ​គួរតែអនុវត្ត»។

គេមើលឃើញថា សេដ្ឋកិច្ចថៃ ដែលពឹងផ្អែកខ្លាំងលើការនាំចេញ និងទេសចរណ៍ បានកើនឡើងជាមធ្យមក្រោម ២ ភាគរយ​ ក្នុងរយៈពេល ១ ទសវត្សរ៍កន្លងមកនេះ ​ដោយយឺតយ៉ាវជាងសេដ្ឋកិច្ចនៃប្រទេសគូប្រជែងនៅអាស៊ីអាគ្នេយ៍សំខាន់ៗផ្សេងទៀត។ គេព្យាករថា​ GDP ថៃ ទំនងជានឹងកើនឡើង​ត្រឹមចន្លោះ ១,៣-២,៣ ភាគរយ ឆ្នាំនេះ ដោយសារតែបំណុលគ្រួសារខ្ពស់ វិបត្តិទេសចរណ៍ និងហានិភ័យពន្ធគយ​របស់សហរដ្ឋអាមេរិក ដែល​គំរាមកំហែងដល់ការនាំចេញរបស់ថៃ។ ​

ជុំវិញការស្នើឡើងរបស់លោក ថាក់ស៊ីន គេ​មិនទាន់ឃើញ​មាន​អ្នកជំនាញណាមួយ​ បកស្រាយពីភាព​វិជ្ជមាន ឬអវិជ្ជមាន​​យ៉ាងណា​សម្រាប់គម្រោងនេះទេ។ ប៉ុន្តែវាស្រដៀងនឹង​គម្រោងដែល​លោក ត្រាំ ស្នើឡើង លើការលក់ទិដ្ឋាការមាស ឬប័ណ្ណមាសក្នុងតម្លៃ ៥ លាន​ដុល្លារ សម្រាប់អ្នកមានៗបរទេស។ ជាថ្នូរនឹង​ការទិញប័ណ្ណមាសរបស់ ត្រាំ ជនបរទេស​នឹង​អាច​រស់នៅសហរដ្ឋអាមេរិកជាអចិន្ត្រៃយ៍ស្របច្បាប់ ​មាន​លទ្ធភាពទទួល​បាន​សញ្ជាតិអាមេរិក ​ទទួល​បាន​ការលើកលែងពន្ធចំពោះប្រាក់ចំណូលអាជីវកម្មនៅបរទេស ចេញចូលសហរដ្ឋអាមេរិកដោយសេរីដោយ​មិនប្រើទិដ្ឋាការ និងមាន​សិទ្ធិធ្វើការ ឬបើកអាជីវកម្មនៅសហរដ្ឋអាមេរិកជាដើម​។

លោក ត្រាំ និយាយថា គម្រោងទិដ្ឋាការមាសនឹង​បង្កើនចំណូលរដ្ឋាភិបាលយ៉ាងច្រើន និងកាត់បន្ថយបំណុលជាតិ ប៉ុន្តែអ្នករិះគន់និយាយថា វាអាចធ្វើឱ្យ​អាមេរិក​ប្រថុយក្លាយខ្លួនជាកន្លែងលាងលុយកង្វក់សម្រាប់ឧក្រិដ្ឋជនបរទេស និង​​ពង្រីកវិសមភាព។ មកទល់ពេលនេះ វាមិនទាន់ត្រូវបាន​អនុម័តនៅ​ ក្រោមច្បាប់នៅឡើយទេ។

ក្នុងករណីថៃ គេមិនទាន់ដឹង​ថាតើគម្រោងទិដ្ឋាការមាសអាចអនុវត្តបាន​ដោយរបៀបណា ឬត្រូវឆ្លងកាត់ដំណើរការបែបណានោះទេ៕

​