ព័ត៌មានជាតិ

លោក ស៊ុន ចាន់ថុល បញ្ជូនឯកសារមួយទៅរដ្ឋាភិបាលអាមេរិកទាំងកណ្ដាលយប់ពាក់ព័ន្ធនឹងពន្ធបដិការ

បានផុស

១ year មុន

នៅ

ថ្ងៃសុក្រ ១៨ កក្កដា ២០២៥

ដោយ

អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា លោកឧបនាយករដ្ឋមន្ត្រី ស៊ុន ចាន់ថុល បានឱ្យដឹងថាលោកបានផ្ញើឯកសារមួយទៅរដ្ឋាភិបាលអាមេរិកទាំងកណ្ដាលយប់ពាក់ព័ន្ធនឹងការចរចាពន្ធបដិការ ជាមួយក្ដីសង្ឃឹមពីការថយចុះអត្រាពន្ធបន្ថែមទៀតនៅថ្ងៃទី១ ខែសីហាខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីផ្សព្វផ្សាយរបាយការណ៍វឌ្ឍនភាពនៃការអនុវត្តវិធានការកែទម្រង់មុតស្រួចជាកញ្ចប់ដែលបានដាក់ចេញក្នុងវេទិការរដ្ឋាភិបាល-ផ្នែកឯកជន លើកទី១៩ នៅថ្ងៃទី១៧ ខែកក្កដា ឆ្នាំ២០២៥ នៅសណ្ឋាគារ Shangri-La ភ្នំពេញ លោកឧបនាយករដ្ឋមន្ត្រី ស៊ុន ចាន់ថុល បានឱ្យដឹងថាឯកសារដែលត្រូវបោះត្រាបញ្ជូននោះធ្វើឡើងនៅម៉ោងប្រមាណ១១កន្លះយប់ថ្ងៃទី១៦ ខែកក្កដា ឆ្នាំ២០២៥ ដោយលោកមិនបានបញ្ជាក់លំអិតពីឯកសារដែលបញ្ជូននោះទេ។ ទោះជាយ៉ាងណាលោកបានបង្ហាញក្ដីសង្ឃឺមខ្ពស់ចំពោះលទ្ធផលវិជ្ជមាននៃការចរចានេះ។

លោកឧបនាយករដ្ឋមន្ត្រីបានថ្លែងថា៖ «សូមជម្រាបថាយើងបានធ្វើកិច្ចការរបស់យើងគ្រប់ជ្រុងជ្រោយទាំងអស់ដើម្បីខិតខំការពារផលប្រយោជន៍របស់ប្រទេសយើង។ [..] សូមឱ្យអ្នកវិនិយោគដែលមានរោងចក្រទាំងអស់កុំភ័យទៅណា! សូមនៅឱ្យស្ងៀមកុំទាន់ចាក់ចោល ឮផ្គរលាន់កុំចាក់ទឹកចោល សូមនៅដដែលសូមនៅជាមួយរាជរដ្ឋាភិបាល។ យើងមានវិធានការគ្រប់បែបយ៉ាងទាំងអស់ដើម្បីជួយសម្រួលដល់ផ្នែកឯកជនរបស់យើង»។

កាលពីថ្ងៃទី៧ ខែកក្កដា សហរដ្ឋអាមេរិកបានសម្រេចដាក់អត្រាពន្ធគយបដិការដល់ប្រទេសកម្ពុជាចំនួន៣៦% ថយចុះពី៤៩% និងទុកពេលចរចាបន្ថែមទៀតដល់ថ្ងៃទី១ ខែសីហា ឆ្នាំ២០២៥។

ប្រធានសភាពាណិជ្ជកម្មកម្ពុជា អ្នកឧកញ៉ា គិត ម៉េង បានបង្ហាញក្ដីសង្ឃឹមពីការចរចារពន្ធគយជាមួយកម្ពុជា និងថាអត្រាពន្ធគយចូលអាមេរិកនៅចន្លោះ២០ទៅ២៥% ទើបអាចអនុញ្ញាតឱ្យកម្ពុជាសមត្ថភាពប្រកួតប្រជែងខ្ពស់។

កាលពីដើមខែមេសា សហរដ្ឋអាមេរិកបានសម្រេចដាក់ពន្ធបដិការចំនួន៤៩%លើទំនិញដែលនាំចូលពីកម្ពុជា។ ក្រោយការដាក់ពន្ធនេះកម្ពុជាបានព្យាយាមចរចារដោយផ្ទាល់ផង និងអនឡាញផង ដែលជាលទ្ធផលបានចុះនៅត្រឹម៣៦%កាលពីថ្ងៃទី៧ ខែកក្កដា។ ទោះជាយ៉ាងណារដ្ឋាភិបាលបានអំពាវនាវដល់វិស័យឯកជនកុំឱ្យមានការព្រួយបារម្ភ ដោយថារដ្ឋនឹងបន្តការចរចាដើម្បីការពារផលប្រយោជន៍កម្ពុជាឱ្យបានខ្ពស់បំផុត៕