កម្ពុជា មានតំបន់សេដ្ឋកិច្ចពិសេសចំនួន ២៤ នៅក្នុងរាជធានី-ខេត្ត៩

គិតត្រឹមខែសីហា ឆ្នាំ២០២៣ កម្ពុជាមានតំបន់សេដ្ឋកិច្ចពិសេស (ត.ស.ព.) កំពុងដំណើរការចំនួន ២៤ទីតាំង នៃ៩រាជធានី-ខេត្ត ជាមួយនឹងគម្រោង វិនិយោគសរុបប្រមាណ ៦៥៥គម្រោង ដែលបានផ្ដល់ការងារជាង ១៧ម៉ឺនកន្លែង ដល់ប្រជាពលរដ្ឋ។ ​នេះបើយោងតាមរបាយការណ៍របស់ក្រុម​ប្រឹក្សាអភិវឌ្ឍន៍​កម្ពុជា CDC។

តំបន់សេដ្ឋកិច្ចទាំងនោះ រួមមាន រាជធានីភ្នំពេញ មានតំបន់សេដ្ឋកិច្ចពិសេសកំពុងដំណើរការចំនួន២, ខេត្តកណ្ដាល កំពុងដំណើរការចំនួន២, ខេត្តកំពង់ស្ពឺ កំពុងដំណើរការចំនួន១, ខេត្តព្រះសីហនុ កំពុងដំណើរការចំនួន៤, ខេត្តកំពត កំពុងដំណើរការចំនួន១, ខេត្តកោះកុង កំពុងដំណើរការចំនួន១, ខេត្តក្រចេះ មានតំបន់សេដ្ឋកិច្ចពិសេស កំពុងដំណើរការចំនួន១, ខេត្តស្វាយរៀង កំពុងដំណើរការចំនួន៩ និងខេត្តបន្ទាយមានជ័យ មានតំបន់សេដ្ឋកិច្ចពិសេស កំពុងដំណើរការចំនួន៣។

តំបន់សេដ្ឋកិច្ចពិសេសកម្ពុជា សំដៅដល់មជ្ឈមណ្ឌលពិសេសសម្រាប់​អភិវឌ្ឍន៍វិស័យ​សេដ្ឋកិច្ច ដែលប្រមូលផ្ដុំនូវសកម្មភាពឧស្សាហកម្ម និងសកម្មភាពពាក់ព័ន្ធដទៃទៀត ហើយអាចមានតំបន់​ឧស្សាហកម្មទូទៅ និងតំបន់ផលិតកែច្នៃនាំចេញ។

យោងតាមអនុក្រឹត្យលេខ ១៤៨ អនក្រ.បក ចុះក្នុងខែធ្នូ ឆ្នាំ២០០៥ ស្ដីពីការបង្កើត និងការគ្រប់គ្រងតំបន់សេដ្ឋកិច្ចពិសេស, តំបន់សេដ្ឋកិច្ចពិសេស​នីមួយៗត្រូវមានមណ្ឌលផលិតកម្ម និងអាចមានមណ្ឌលពាណិជ្ជកម្មសេរី មណ្ឌលសេវាកម្ម មណ្ឌលលំនៅដ្ឋាន និងមណ្ឌលទេសចរណ៍។

វិនិយោគិនត្រូវបានលើកទឹកចិត្តឱ្យជ្រើសរើសការវិនិយោគនៅក្នុងតំបន់សេដ្ឋកិច្ចពិសេស ដោយសារកត្តាងាយស្រួលនៃច្បាប់ទម្លាប់ការងារ ការលើកទឹក​ចិត្តផ្នែកច្បាប់ពីរាជរដ្ឋាភិបាល និងកត្តាយុទ្ធសាស្ត្រនៃហេដ្ឋារចនាសម្ព័ន្ធដឹកជញ្ជូនជាប់ទៅនឹងកំពង់ផែ ផ្លូវជាតិសំខាន់ៗ ផ្លូវល្បឿនលឿន ព្រលានយន្តហោះ និងច្រកទ្វារអន្តរជាតិជាដើម។ ចំណុចល្អនៃរចនាសម្ព័ន្ធ និងសេវាគាំទ្រផលិតកម្មនានារបស់តំបន់សេដ្ឋកិច្ចពិសេសជូនដល់វិនិយោគិនរួមមាន ការគ្រប់​គ្រងអគារការិយាល័យ សេវារដ្ឋបាលក្នុងតំបន់ មណ្ឌលលំនៅដ្ឋាន កន្លែងលេងកីឡា កន្លែងព្យាបាល ផ្លូវថ្នូល់ ការផ្គត់ផ្គង់ប្រព័ន្ធទឹកស្អាត ប្រព័ន្ធលូ ការចោល​កាកសំណល់ ការផ្គត់ផ្គង់អគ្គីសនី បណ្តាញអ៊ីនធឺណិត និងទូរគមនាគមន៍ ការការពារអគ្គីភ័យ និងប្រព័ន្ធសន្តិសុខ ជាដើម។

តំបន់សេដ្ឋកិច្ចពិសេសនីមួយៗមានការិយាល័យរដ្ឋបាលតំបន់សេដ្ឋកិច្ចពិសេស ដែលផ្ដល់សេវានៅនឹងកន្លែងដូចជាសេវារដ្ឋបាល បែបបទនៃការនាំចេញ-ចូល ពន្ធគយ និងសេវារបស់អាជ្ញាធរពាក់ព័ន្ធផ្សេងៗទៀត ដែលជួយសម្របសម្រួលនីតិវិធីធ្វើពាណិជ្ជកម្មបានឆាប់រហ័ស។ ក្នុងនោះផងដែរគម្រោងវិនិយោគ ដែលបានចុះបញ្ជីជាគម្រោងវិនិយោគមានលក្ខណៈសម្បត្តិគ្រប់គ្រាន់ (QIP) របស់ក្រុមប្រឹក្សាអភិវឌ្ឍន៍កម្ពុជា នឹងទទួលបានអត្ថប្រយោជន៍​ជាច្រើន​ពីការលើក​ទឹកចិត្តសម្រាប់ការវិនិយោគនៅកម្ពុជា ពិសេសក្នុងតំបន់សេដ្ឋកិច្ចពិសេស។

ថ្មីៗនេះ កម្ពុជា និងថៃ ក៏បានឯកភាពគ្នាបង្កើតក្រុមការងារចម្រុះ ដើម្បីសិក្សា និងផ្តើមអនុវត្តការបង្កើតតំបន់សេដ្ឋកិច្ចពិសេសបំពេញបន្ថែមឱ្យគ្នា ក្នុងគោលបំណងជំរុញសេដ្ឋកិច្ច ដែលផ្សារភ្ជាប់ខ្សែសង្វាក់ផលិតកម្មនៃប្រទេសទាំងពីរ ជាពិសេសនៅលើវិស័យយានយន្ត អគ្គិសនី និងសម្ភារ​អេឡិចត្រនិកជាដើម។

ទន្ទឹមនឹងនេះ កាលពីថ្ងៃ ១២ កុម្ភៈ កន្លងទៅ មន្រ្តីពាក់ព័ន្ធ បាន​រៀបចំ​​កិច្ចប្រជុំអន្តរក្រសួង-ស្ថាប័ន ​ដើម្បី​ពិនិត្យពិភាក្សាលើគម្រោង​​បង្កើត​តំបន់​សេដ្ឋកិច្ច​ពិសេសកម្ពុជា-ជប៉ុនផងដែរ។ ការ​រៀបចំ​កិច្ចប្រជុំ ដើម្បី​ពិភាក្សាឯកសារទស្សនទាន​ក្នុងការ​ត្រៀមបង្កើត​តំបន់សេដ្ឋកិច្ចពិសេសកម្ពុជា-ជប៉ុន ដែល​អនុវត្តស្របតាមគំនិតផ្តួចផ្តើមរបស់សម្តេចធិបតីនាយករដ្ឋមន្ត្រី ហ៊ុន ម៉ាណែត អំឡុងពេលដំណើរទស្សនកិច្ចនៅប្រទេសជប៉ុនកាល​ពីថ្ងៃទី១៥-១៩ ខែធ្នូ ឆ្នាំ២០២៣ ក្នុងគោលបំណងដើម្បីជំរុញលើកទឹកចិត្តបណ្តាវិនិយោគិនជប៉ុន​ឱ្យ​ងាក​មក​វិនិយោគ​នៅកម្ពុជាបន្ថែមទៀត។ លោក ស៊ុន ចាន់ថុល ឧបនាយករដ្ឋមន្ត្រី និង​ជា​អនុប្រធានទី១ក្រុមប្រឹក្សាអភិវឌ្ឍន៍កម្ពុជា ទទួលបន្ទុកជាប្រធានក្រុមការងារ​គោលនយោបាយរៀបចំតំបន់សេដ្ឋកិច្ចពិសេសកម្ពុជា-ជប៉ុននេះ៕