ក្រុមហ៊ុនធំៗរបស់អេស្ប៉ាញជួប ​លោក ស៊ុន ចាន់ថុល ក្នុង​ដំណើរ​គោះទ្វារអ្នក​វិនិយោគនៅ​អឺរ៉ុប

ក្នុងដំណើរបេសកកម្មគោះទ្វារវិនិយោគនៅ​បណ្តាប្រទេស​នៅអឺរ៉ុប លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានទទួលជួបពិភាក្សាការងារជាមួយបណ្ដាក្រុមហ៊ុនធំៗរបស់អេស្ប៉ាញ ដើម្បីបញ្ជ្រាបបន្ថែមទៀតអំពីបេសកកម្ម និងការត្រៀមខ្លួនរបស់ក្រុមប្រឹក្សាអភិវឌ្ឍន៍កម្ពុជាក្នុងការសម្របសម្រួលកិច្ចការងាររបស់វិនិយោគិនដើម្បីធានានូវជោគជ័យភាពរបស់បណ្ដាក្រុមហ៊ុនដែលសម្រេចចិត្តដាក់ទុនវិនិយោគនៅកម្ពុជា។

បណ្ដាក្រុមហ៊ុនធំៗរបស់អេស្ប៉ាញ ដែលបានជួបពិភាក្សាការងារជាមួយលោក ស៊ុន ចាន់ថុល ​វិនិយោគ​លើ​វិស័យជាច្រើនរួមមាន ហេដ្ឋារចនាសម្ព័ន្ធ រថភ្លើង វិស្វកម្មនិងសំណង់ ឱសថ សុខាភិបាល ការអប់រំ ធនធានទឹកនិងថាមពល និងកសិកម្មជាដើម។

ក្នុង​នោះ​លោក​ ស៊ុន ចាន់ថុល មានជំនួប​ដាច់ដោយឡែក​ពី​គ្នា​ជា​បន្តបន្ទាប់​ជាមួយ​បណ្តា​ក្រុមហ៊ុនធំៗ​​របស់​ប្រទេស​អេស្ប៉ាញ​មានដូចជា៖

១. ក្រុមហ៊ុន INSUD PHARMA ដែលជាក្រុមហ៊ុនឱសថល្បីល្បាញមួយមានជំនាញក្នុងការស្រាវជ្រាវ ការអភិវឌ្ឍន៍ និងការផលិតថ្នាំដែលមានគុណភាពខ្ពស់ និងបច្ចុប្បន្នមានប្រតិបត្តិការនៅប្រមាណជាង ៤០ ប្រទេស។
២. ក្រុមហ៊ុន CENTUNION គឺជាក្រុមហ៊ុនវិស្វកម្ម និងសំណង់ ដែលមានឯកទេសក្នុងការរចនា និងប្រតិបត្តិការគម្រោងឧស្សាហកម្មនៅទូទាំងពិភពលោក ជាមួយនឹងបទពិសោធន៍ប្រមាណ ៦០ ឆ្នាំ លើគម្រោងដែលបានបញ្ចប់រួចរាល់ជាង ៣០០ នៅ ៥០ ប្រទេសរួមមានតំបន់អាស៊ីអាគ្នេយ៍ផងដែរ។
៣. ក្រុមហ៊ុន MELIA GROUP មានប្រតិបត្តិការអាជីវកម្មសណ្ឋាគារឈានមុខគេលំដាប់ពិភពលោក ជាមួយសណ្ឋាគារចំនួនជាង ៣៨០ នៅក្នុងប្រទេសចំនួន ៤០។ MELIA Hotels International កំពុងស្វែងរកដៃគូសហការដើម្បីពង្រីកសណ្ឋាគារ និងទេសចរណ៍ក្នុងប្រទេសកម្ពុជា។
៤. ក្រុមហ៊ុន MOLECOR គឺជាក្រុមហ៊ុនដែលមានឯកទេសក្នុងការផលិតបំពង់ PVC-O ដែលមានគុណភាពខ្ពស់។ បច្ចុប្បន្ននេះ ផលិតផលរបស់ក្រុមហ៊ុន MOLECOR ត្រូវបានប្រើប្រាស់នៅក្នុងប្រទេសជាង ២៥ រួចមកហើយ។
៥. ក្រុមហ៊ុន CAF គឺជាក្រុមហ៊ុនដែលមានវត្តមាននៅប្រមាណ ៤០ ប្រទេស ក្នុងការផ្តល់ជូននូវផលិតផល និងសេវាកម្មជាច្រើនក្នុងដំណោះស្រាយផ្លូវដែក រួមមានរថភ្លើងល្បឿនលឿន និងការថែទាំជាដើម។
៦. ក្រុមហ៊ុន BIORIZON BIOTECH គឺជាក្រុមហ៊ុនដែលមានមុខសញ្ញាផ្តោតលើជីវបច្ចេកវិទ្យា សម្រាប់វិស័យកសិកម្ម។
៧. ក្រុមហ៊ុន EDUCTRADE គឺជាក្រុមហ៊ុនដែលមានបទពិសោធន៍ជាង ៤០ ឆ្នាំ ក្នុងគម្រោងជាច្រើន លើវិស័យសុខាភិបាល ការអប់រំ ធនធានទឹកនិងថាមពល នៅប្រមាណ ៤០ ប្រទេសទូទាំងពិភពលោក។
៨. ក្រុមហ៊ុន TALGO ជាក្រុមហ៊ុនដែលមានឯកទេសក្នុងការរចនា ផលិត និងថែទាំរថភ្លើង ដែលក្រុមហ៊ុននេះបានដាក់សាកល្បងប្រើប្រាស់ផ្លូវរថភ្លើងដំបូងរបស់ខ្លួនតាំងពីឆ្នាំ ១៩៤១។

ក្រៅអំពីជំនួប​រវាង​លោក​ឧបនាយករដ្ឋមន្ត្រី ស៊ុន ចាន់ថុល ជាមួយក្រុមហ៊ុនខាងលើ គណៈប្រតិភូកម្ពុជាដែល​អមដំណើរលោក​ឧបនាយករដ្ឋមន្ត្រី ដែលមានសមាសភាពមកពីក្រសួង-ស្ថាប័នពាក់ព័ន្ធ, សភាពាណិជ្ជកម្មកម្ពុជា, សមាគមឧកញ៉ា​, និងវិស័យឯកជនកម្ពុជា ក៏មានការ​ជួបពិភាក្សាការងារ (Business-to-Business_B2B) ជាមួយតំណាងក្រុមហ៊ុន​ប្រមាណជាង ៣០ ផ្សេងទៀតរបស់អេស្ប៉ាញផងដែរ៕