បណ្ឌិត គិន ភា៖ ឈឺឆ្អាលរឿងជាតិជាអ្វីដែលពលរដ្ឋត្រូវតែធ្វើ តែបើធ្វើទាំងខ្វះចំណេះដឹង នឹងនាំឱ្យជាតិអន្តរាយ  

តាមរយៈគណនីហ្វេសប៊ុក នារសៀលថ្ងៃពុធនេះ លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានលើកឡើងថា ការចេះរិះគន់ចំពោះបញ្ហាជាតិជារឿងដែលពលរដ្ឋគ្រប់រូបត្រូវតែធ្វើ ប៉ុន្តែបើពលរដ្ឋរិះគន់ទាំងខ្វះចំណេះដឹងគ្រប់ជ្រុងជ្រោយ នឹងនាំឱ្យជាតិអន្តរាយ។ លោកបណ្ឌិតលើកឡើងបែបនេះ បន្ទាប់ពីអ្នកប្រើ​បណ្ដាញសង្គមជាច្រើនបានរិះគន់ចំពោះកិច្ចព្រមព្រៀងអភិវឌ្ឍន៍តំបន់ត្រីកោណ កម្ពុជា ឡាវ វៀតណាម ដែលកម្ពុជាផ្ដួចផ្ដើមបង្កើតកាលពីឆ្នាំ១៩៩៩ និងថែមទាំងយល់ច្រឡំថាកម្ពុជា កាត់ខេត្តចំនួន៤ឱ្យទៅវៀតណាម ដែលការយល់ច្រឡំនេះផ្ទុយពីការពិត។

តាមរយៈសំណេរនារសៀលថ្ងៃទី២៤ ខែកក្កដា នេះ បណ្ឌិត គិន ភា សរសេដូច្នេះថា៖«ការឈឺឆ្អាលរឿងជាតិ ជាកាតព្វកិច្ចនិងករណីយកិច្ចរបស់ប្រជាពលរដ្ឋគ្រប់រូប។ ប៉ុន្តែ ការធ្វើសកម្មភាពនិងការបញ្ចេញប្រតិកម្មក្នុងគោលដៅ​ឈឺឆ្អាលរឿងជាតិ ទាំងងងឹតងងល់ដោយគ្មានមូលដ្ឋានព័ត៌មាននិងចំណេះដឹងគ្រប់គ្រាន់ មិនត្រឹមតែមិនអាចជួយជាតិបានទេ ប៉ុន្តែថែមទាំងបង្កបញ្ហាដល់ជាតិទៀតផង»។

លោកបណ្ឌិត ទទួលស្គាល់ថាគ្មានរឿងណាមួយ ដែលធំជាងរឿងជាតិ ទឹកដី ឯករាជ្យ សម្បត្តិវប្បធម៌ និងធនធានធម្មជាតិរបស់ប្រទេសកម្ពុជាឡើយ ប៉ុន្តែ ដើម្បីការពារជាតិ ទឹកដី ឯករាជ្យ វប្បធម៌ និងធនធានធម្មជាតិរបស់​កម្ពុជាបាន លោកក៏បានណែនាំឱ្យពលរដ្ឋគ្រប់រូប ជាពិសេសយុវជនកម្ពុជា ត្រូវតែ​ពង្រឹងនិងអភិវឌ្ឍ​សមត្ថភាពជាប់ជាប្រចាំ ត្រូវតែជាពលរដ្ឋដែលសកម្មប្រកបដោយចំណេះដឹង​ ចំណេះធ្វើ ផលិតភាព សីលធម៌ សុជីវធម៌ ឧត្តមគតិនិងមនសិការជាតិ និង​មានសុខភាពល្អ ព្រមទាំងរៀនសូត្រជាប់ជានិច្ច។

អ្នកជំនាញភូមិសាស្ត្រនយោបាយរូបនេះ ក៏បានអំពាវនាវឱ្យពលរដ្ឋ និងយុវជន បញ្ឈប់ចលនាជាតិនិយមបែបភ្លើងចម្បើងតែមួយពេលៗ ដោយសារតែការឮព័ត៌មានតៗគ្នាទាំងងងឹតងងល់ ក្អែកមួយ ក្អែកដប់ ស្អប់តគ្នា និងជេរតគ្នា បែបនេះ ព្រោះចលនាជាតិនិយមបែបភ្លើងចម្បើងខ្វះចំណេះដឹងទាំងនេះ នឹងនាំឱ្យមានបញ្ហាខុសតៗគ្នា។

លោក គិន ភា វាយតម្លៃថា បើពលរដ្ឋ និងយុវជនកម្ពុជា នៅតែបន្តបរិភោគគ្រឿងស្រវឹង ហើយតាំងខ្លួនជាអ្នកស្នេហាទឹកដី នោះនឹងបង្កជាមហន្តរាយដល់ជាតិ។ លោកបណ្ឌិត បញ្ចប់សំណេរលើគណនីហ្វេសប៊ុកយ៉ាងដូច្នេះ៖«បើមួយថ្ងៃៗដៃអាល័យតែកែវស្រា ហើយស្រែកថាស្នេហាជាតិៗ! បែបនេះគឺពិតជាមិនអាចជួយជាតិបានទេ តែវាជាជំងឺរបស់ជាតិទៅវិញទេ»៕