ល្ងាចថ្ងៃទី២២​ សីហានេះ សម្ដេចធិបតី នឹងថ្លែងការណ៍ពិសេសទាក់ទិននឹងសមិទ្ធផល១ឆ្នាំ របស់រាជរដ្ឋាភិបាល

រាប់មកដល់ថ្ងៃទី២២ ខែសីហា ឆ្នាំ២០២៤ គឺមានរយៈពេល១ឆ្នាំហើយ នៃអាណត្តិរាជរដ្ឋាភិបាលបន្តវេន នីតិកាលទី៧ ហើយនៅល្ងាចថ្ងៃនេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នឹងថ្លែងការណ៍ពិសេសស្តីពី​សមិទ្ធផល១ឆ្នាំ​ របស់រាជរដ្ឋាភិបាល​។

នៅក្នុងការបោះឆ្នោតនាថ្ងៃទី ២៣ ខែ កក្កដា ឆ្នាំ២០២៣​ ប្រជាពលរដ្ឋទូទាំងប្រទេសបានផ្ដល់ការគាំទ្រភ្លូកទឹកភ្លូកដីជូនគណបក្សប្រជាជនកម្ពុជាឱ្យបន្តដឹកនាំនាវាកម្ពុជា ហើយបានផ្ដល់នូវសេចក្ដីទុកចិត្តជូនសម្ដេចធិបតី ហ៊ុន ម៉ាណែត ឱ្យកាន់តំណែងជានាយករដ្ឋមន្ត្រីនៃកម្ពុជា សម្រាប់នីតិកាលទី៧ បន្តពីសម្ដេចតេជោ ហ៊ុន សែន អតីតនាយករដ្ឋមន្ត្រី។ រាជរដ្ឋាភិបាល នីតិកាលទី៧ ក្រោមការដឹកនាំរបស់សម្ដេចធិបតី បានចាប់ផ្ដើមបេសកក​ម្មរបស់ខ្លួនជាមួយនឹងការប្រកាសអនុវត្តនូវយុទ្ធសាស្ត្របញ្ចកោណ ដំណាក់កាលទី១ ដោយសម្រេចកំណត់យកអាទិភាពគន្លឹះចំនួន៥ គឺមនុស្ស ផ្លូវ ទឹក ភ្លើង និងបច្ចេកវិទ្យា និងមានបាវចនា ដើម្បីកំណើន ការងារ សមធម៌ ប្រសិទ្ធភាព និងចីរភាព កសាងមូលដ្ឋានគ្រឹះទៅសម្រេចចក្ខុវិស័យកម្ពុជា ឆ្នាំ២០៥០ ដែលជារបៀបវារៈគោលនយោបាយសង្គម-សេដ្ឋកិច្ច សម្រាប់ជំរុញអនុវត្តប្រកប ដោយប្រសិទ្ធភាពនូវកម្មវិធីនយោបាយរបស់ខ្លួន។

ក្នុងគោលបំណងតម្កល់ខ្ពស់នូវឧត្តមគតិស្នេហាជាតិ បន្តបំពេញបេសកកម្មជាប្រវត្តិសាស្ត្រក្នុងការបម្រើជាតិ និងប្រជាជន ប្រែក្លាយកម្ពុជាឱ្យទៅជាទឹកដីដ៏ពិសិដ្ឋ ប្រកបដោយសុខសន្តិភាព និងវិបុលភាព ជាសង្គមប្រកបដោយភាពសុខដុមរមនា ក៏ដូចជាការអភិវឌ្ឍដ៏រស់រវើក មានជីវភាពកាន់តែប្រសើរឡើង ឆ្ពោះទៅកាន់ចក្ខុវិស័យប្រទេសមានចំណូលមធ្យមកម្រិតខ្ពស់ ឆ្នាំ២០៣០ និងជាប្រទេសមានចំណូលខ្ពស់ ឆ្នាំ២០៥០ រាជរដ្ឋាភិបាល ក៏បានប្រកាសកម្មវិធីនយោបាយអាទិភាព​ចំនួន ៦ រួមមាន៖ ១) ការពង្រីកសេវាថែទាំសុខភាពឆ្ពោះទៅរកការគ្របដណ្តប់សុខភាពជាសកល ២)​ កម្មវិធីការបណ្ដុះបណ្តាលជំនាញវិជ្ជាជីវៈ និងបច្ចេកទេសដល់យុវជន​១លាន៥សែននាក់ ៣) កម្មវិធីជាតិជំនួយសង្គម ៤) កម្មវិធីអភិវឌ្ឍសេដ្ឋកិច្ចក្រៅប្រព័ន្ធឱ្យមានលទ្ធភាពចូលរួមក្នុងសេដ្ឋកិច្ចក្នុងប្រព័ន្ធ និងអាចទទួលបានផលប្រយោជន៍ពីប្រព័ន្ធគាំពារសង្គមផ្លូវការ ៥) កម្មវិធីកសិកម្មទំនើប សំដៅលើកស្ទួយផលិតកម្ម រកទីផ្សារ និងរក្សាលំនឹងថ្លៃកសិផល និង៦)ការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំ-សង្កាត់ ដែលមានសកម្មភាពកសិកម្មនៅទូទាំងប្រទេស និងការរៀបចំឱ្យមានសមាគមកសិករនៅតាមទីជនបទ។

រាជរដ្ឋាភិបាល នីតិកាលទី៧ សម្រេចបាននូវសមិទ្ធផលធំៗលើគ្រប់វិស័យ ទាំងនយោបាយ សង្គម សេដ្ឋកិច្ច ពិសេសការរក្សាបានសុខសន្តិភាព ស្ថិរភាពនយោបាយ អធិបតេយ្យភាពជាតិ ការអភិវឌ្ឍ និងការរក្សាស្ថិរភាពសេដ្ឋកិច្ច ដែលនាំឱ្យកម្ពុជាសម្រេចបាននូវការផ្លាស់ប្ដូរមុខមាត់ថ្មីគួរជាទីមោទនៈបំផុត និងលើកកម្ពស់ជីវភាពប្រជាជន។ ក្នុងសន្និសីទសារព័ត៌មាន កាលពីថ្ងៃទី១៩ ខែសីហា ឆ្នាំ២០២៤ កន្លងទៅ លោក ប៉ែន បូណា អ្នកនាំពាក្យរាជរដ្ឋាភិបាលកម្ពុជា បានលើកបង្ហាញឱ្យឃើញនូវសមិទ្ធផលលេចធ្លោចំនួន៦ ក្នុងរយៈពេល១ឆ្នាំ របស់រាជរដ្ឋាភិបាលបន្តវេន ដឹកនាំដោយសម្ដេចធិបតី ហ៊ុន ម៉ាណែត។

តាមការគូសបញ្ជាក់របស់លោក ប៉ែន បូណា សមិទ្ធផលដែលធំជាងគក្នុងអាណត្តិ រាជរដ្ឋាភិបាលបន្តវេន គឺការថែរក្សាបានសុខសន្តិភាព ស្ថិរភាពនយោបាយ ពិសេសការផ្ទេរអំណាចដោយសន្តិវិធី ដោយរក្សាបានទាំងស្រុងសុខសន្តិភាព និងស្ថិរភាពនយោបាយ និងជាការផ្ទេរអំណាចពីអ្នកជំនាន់មុនទៅឱ្យយុវជនជាលក្ខណៈទ្រង់ទ្រាយធំតែម្ដង ដែលកម្រកើតមានណាស់នៅលើពិភពលោកនេះ។ សមិទ្ធផលបន្ទាប់ គឺកិច្ចការពារអធិបតេយ្យភាពជាតិ និងបូរណភាពទឹកដី ការបើកការដ្ឋានជាប្រវត្តិសាស្ត្រគម្រោងព្រែកជីកហ្វូណនតេជោ ក៏ដូចជាជោគជ័យនៃការអនុវត្តកម្មវិធីគោលនយោបាយអាទិភាព៦ចំណុច និងវិធានការគន្លឹះទាំង៥។

ដូច្នេះ សូមរង់ចាំតាមដានការផ្សាយផ្ទាល់អំពីការថ្លែងការណ៍ពិសេសរបស់​សម្តេចធិបតី​ ហ៊ុន​ ម៉ាណែត​ នាយករដ្ឋមន្ត្រី​នៃកម្ពុជា​ ស្តីពី​សមិទ្ធផល១ឆ្នាំ​ របស់រាជរដ្ឋាភិបាល​ នីតិកាលទី៧​ នៃរដ្ឋសភា​ នៅល្ងាចនេះវេលាម៉ោង​៧​តទៅ៕