លោក ប៉ែន បូណា៖ សម្តេចតេជោ ជាមេដឹកនាំខ្លាំងពូកែពិតប្រាកដ មិនអាចប្រកែកបាន

អ្នកនាំពាក្យរាជរដ្ឋាភិបាល លោក ប៉ែន បូណា បានលើកឡើងថា «សម្តេចតេជោ ហ៊ុន សែន គឺជាអច្ឆរិយបុគ្គល និងជាមេដឹកនាំខ្លាំងពូកែពិតប្រាកដ មិនអាចប្រកែកបាន»។ លោកបានលើកឡើងបែបនេះ ក្នុងពិធីសម្ពោធផ្លូវការ និងផ្សព្វផ្សាយសៀវភៅ «ឃាតកម្មក្រោយខ្នងសម្តេចតេជោ» នៅព្រឹកថ្ងៃទី២៤ ខែកញ្ញា ឆ្នាំ២០២៤។

អ្នកនាំពាក្យរូបនេះ បានបញ្ចាក់ថា សម្តេចតេជោ ហ៊ុន សែន គឺជាអ្នកនយោបាយដ៏មានឥទ្ធិពលបំផុត និងលេចធ្លោបំផុតមួយរូបក្នុងឆាកនយោបាយកម្ពុជា នាចុងសតវត្សរ៍ទី២០ ដើមសតវត្សរ៍ទី២១ នេះ ដែលថ្នាក់តំបន់ និងពិភពលោកបានស្គាល់។ លោកបន្តថា សម្តេចតេជោ ជាអ្នកនយោបាយដែលមានបទពិសោធមួយរូប ហើយក៏ជាអ្នកកាន់តំណែងជានាយករដ្ឋមន្ត្រីយូរបំផុតក្នុងប្រវត្តដឹកនាំប្រទេស។ ស្នាដៃ និងបទពិសោធរបស់សម្តេចតេជោ បានប្រែក្លាយប្រទេសដ៏មហាកំសត់មួយនេះ ចេញពីគំនរកំសត់ ដែលផែនដីខ្មែរទាំងមូលក្រាលដោយឈាម និងទឹកភ្នែក ឱ្យក្លាយជាប្រទេសដែលស្គាល់ការអភិវឌ្ឍមិនដែលធ្លាប់មានក្នុងប្រវត្តិសាស្ត្រសម័យសង្គ្រាម។

ជាក់ស្តែង ប្រទេសកម្ពុជា បានអភិវឌ្ឍចេញពីគំនរផេះផង់ក្រោយជំនាន់ពលពត ដែលមានអគារខ្ពស់ៗ ផ្សារទំនើប ផ្លូវ Highway ផ្លូវល្បឿនលឿន ជាដើម។ ការអភិវឌ្ឍទាំងនេះ បានផ្លាស់ប្តូរប្រទេសកម្ពុជា ក្រោមស្នាដៃដឹកនាំរបស់សម្តេចតេជោ ហ៊ុន សែន ដែលមិនធ្លាប់មាននៅក្នុងប្រវត្តិសាស្ត្រសម័យទំនើបជាង ៥០០ឆ្នាំចុងក្រោយ។ ទាំងអស់នេះ ជាទេពកុសលដឹកនាំដ៏អស្ចារ្យរបស់តម្តេចតេជោ ដែលមិនមានអ្នកណាអាចប្រកែកបាន។ នេះជាការគូសបញ្ជាក់របស់ លោក ប៉ែន បូណា។

លោកបន្ថែមថា នៅកម្ពុជាអ្នកដែលបានលះបង់ដើម្បីសិទ្ធិមនុស្សពិតប្រាកដ និងធំបំផុត គឺសម្តេចតេជោ ហ៊ុន សែនព្រោះខ្មែររាប់លាននាក់ត្រូវបានផ្តល់កំណើតទី២ ចេញពីរបបខ្មៅងងឹតនៅថ្ងៃ៧ មករា ឆ្នាំ១៩៧៩ ដែលនេះគឺជាលការលះបង់ធំធេង មិនគួរមើលរំលង៕

ដោយ៖ គេន ម៉ាលិះ