លោក ប៉ែន បូណា «ទម្លាប់ល្អថ្ងៃនេះ កំណត់អនាគតការងារអ្នកថ្ងៃក្រោយ» 

លោក ប៉ែន បូណា ប្រធានអ្នកនាំពាក្យនៃរាជរដ្ឋាភិបាល បានចែករំលែកសារដោយផ្តល់អនុសាសន៍ដល់យុវជន និងនិស្សិត អំពីវិធីសាស្ត្រអភិវឌ្ឍខ្លួនក្នុងអំឡុងពេលសិក្សា និងជីវិតការងារ។

លោកបានលើកឡើងតាមបណ្តាញសង្គមថា នៅពេលកំពុងសិក្សា និស្សិតគួរខិតខំរៀនឲ្យលើសពីការយល់ដឹងធម្មតា ដោយយកមូលដ្ឋានលើពាក្យប្រៀបធៀប «ចេះដប់ មិនស្មើប្រសប់មួយ» ដើម្បីកសាងជំនាញ និងទេពកោសល្យឲ្យក្លាយជាមនុស្សមានសមត្ថភាពពិតប្រាកដ។ លោកបញ្ជាក់ថា មនុស្សដែលមានសមត្ថភាពលេចធ្លោ នឹងមានឱកាសការងារជាច្រើនរង់ចាំ។

ជាមួយគ្នានេះ លោកក៏បានណែនាំថា នៅពេលចូលធ្វើការ គួរមានចិត្តសប្បាយរីករាយ ក្នុងការងារ និងមិនគួរមានចិត្តច្រណែនចំពោះអ្នកដែលធ្វើការតិចជាងខ្លួនឡើយ ព្រោះការខិតខំប្រឹងប្រែង គឺជាគន្លឹះនាំទៅរកភាពជោគជ័យ។

លោកបន្ថែមថា ប្រសិនបើយុវជនអាចបង្កើតទម្លាប់ល្អបែបនេះបាន នឹងមិនជួបបញ្ហាក្នុងការស្វែងរកការងារធ្វើទៀតឡើយ ខណៈអ្វីដែលអាចក្លាយជាបញ្ហាវិញនោះ គឺការសម្រេចចិត្តលាឈប់ពីការងារទៅវិញទេ។

សារនេះត្រូវបានមើលឃើញថា ជាការលើកទឹកចិត្តដល់យុវជនឲ្យខិតខំអភិវឌ្ឍខ្លួន និងបង្កើនសមត្ថភាព ដើម្បីឆ្ពោះទៅរកអនាគតការងារដែលមានស្ថិរភាព និងជោគជ័យទៅថ្ងៃក្រោយ៕