កម្ពុជាចែករំលែកបទពិសោធន៍លើការលើកកម្ពស់សិទ្ធិទទួលបានសេវាសុខភាពអំឡុងពេលរាត ត្បាតជំងឺកូវីដ-១៩

លោកស្រីវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល បានធ្វើបទអន្តរាគមន៍នៅក្នុងកិច្ចសន្ទនាថ្នាក់តំបន់
ស្តីពីលើប្រធានបទ “ការចែករំលែកការអនុវត្តល្អ និងបញ្ហាប្រឈមនានា លើការលើកកម្ពស់សិទ្ធិទទួលបានសេវាសុខភាពអំឡុងពេលរាតត្បាតជំងឺកូវីដ-១៩” នៅក្នុងតំបន់អាស៊ាន។

កិច្ចសន្ទនាថ្នាក់តំបន់នេះ ធ្វើឡើងរយៈពេល២ថ្ងៃចាប់ពីថ្ងៃទី២៨តុលា និង២៩តុលា ក្នុងគោលបំណងចែករំលែកការអនុវត្តល្អលើការលើកកម្ពស់សិទ្ធិមនុស្សក្នុងអំឡុងពេលរាតត្បាតកូវីដ-១៩ ក្នុងតំបន់អាស៊ានដោយផ្តោតលើការពិភាក្សារួមមួយក្រោមក្របខណ្ឌនៃសសរស្តម្ភទាំងបីរបស់អាស៊ាន និងការចែករំលែកទស្សនៈ ការយល់ដឹង ការអនុវត្តល្អ
និងចំណេះ​ដឹងលើរបៀបលើកកម្ពស់សិទ្ធិមនុស្សអំឡុងពេលមានការរាតត្បាតយ៉ាងធ្ងន់ធ្ងរនៃជំងឺកូវីដ-១៩ ព្រមទាំងដើម្បីពិនិត្យលទ្ធភាពសម្រាប់កិច្ចសហប្រតិបត្តិការបន្ថែមនាពេលអនាគតក្នុងក្របខណ្ឌអាស៊ាន។

លោកស្រីវេជ្ជបណ្ឌិតបានលើកឡើងថា ក្នុងអំឡុងពេលមានការរាតត្បាតយ៉ាងធ្ងន់ធ្ងរនៃជំងឺកូវីដ-១៩ ក្រសួងសុខាភិបាលបានយកចិត្តទុកដាក់ដល់ប្រជាពលរដ្ឋធ្វើយ៉ាងណាឱ្យពួកគាត់មានសិទ្ធិទទួលបានការថែទាំសុខភាពរួមមានផ្តល់​ការថែទាំសុខភាពជាសារវ័ន្តទាំងនៅថ្នាក់មណ្ឌលសុខភាព រហូតដល់ថ្នាក់ជាតិ។ ការធ្វើតេស្ត ចត្តាឡីស័ក ការព្យាបាលជំងឺកូវីដ-១៩ ​ទាំងកម្រិតស្រាល និងធ្ងន់ធ្ងរ។ រាជរដ្ឋាភិបាលកម្ពុជាបានផ្តល់វ៉ាក់សាំងដោយឥតគិតថ្លៃតាមយុទ្ធសាស្ត្រផ្ការីក ជូនប្រជាជនកម្ពុជានិងជនបរទេសដែលស្នាក់នៅកម្ពុជា។ ក្រសួងសុខាភិបាលក៏បានយកចិត្តទុកដាក់ខ្ពស់ ដល់កុមារ ស្ត្រីមានផ្ទៃពោះ ជនមានពិការភាពជនទេសន្តរប្រវេសន៍ ។ ជាមួយគ្នានេះដែរក្រសួងផ្តល់សិទ្ធិទទួលបានព័ត៌មានត្រឹមត្រូវ ច្បាស់លាស់ជារៀងរាល់ថ្ងៃអំពីជំងឺកូវីដ-១៩ ព្រមជាមួយនឹងសន្និសីទសារព័ត៌មានប្រចាំសប្តាហ៍។

ក្រសួងសុខាភិបាល បានដាក់ឱ្យប្រើប្រាស់ប្រព័ន្ធ ១១៥ សម្រាប់ផ្តល់ព័ត៌មានពាក់ព័ន្ធនឹងជំងឺ ជូនសាធារណៈជន ២៤ម៉ោងលើ ២៤ម៉ោង។ លើសពីនេះទៀតក្រសួងផ្តល់សិទ្ធិទទួលបាន​ អាហារូបត្ថម្ភ​ក្រោមការឧបត្ថម្ភរបស់រាជរដ្ឋាភិបាល ជាការផ្តល់សាច់​ប្រាក់​ ដល់​ប្រជាជន​ដែល​រង​ហានិភ័យ​ ពិសេស​ ស្រ្តី​ និង​កុមារ​ រួមទាំងអាហារហាឡាល់សម្រាប់ជនមូស្លីមផងដែរ។ សិទ្ធិចូលរួមក្នុងការងារប្រយុទ្ធប្រឆាំងនឹងការរាតត្បាតជំងឺធ្វើឡើងតាមរយៈយុទ្ធនាការការចូលរួមរបស់សហគមន៍ក្នុងការផ្សព្វផ្សាយការយល់ដឹងអំពីការបង្ការ និងការស្វែងរកការធ្វើតេស្តការធ្វើចត្តាឡីស័ក និងការព្យាបាលជំងឺ។

ក្នុងនេះដែរ លោកស្រីរដ្ឋលេខាធិការ បានបញ្ជាក់ថា កម្ពុជាបានទទួលនាវាទេសចរណ៍ Westerdam ដែល​ទទួល​ផ្ទាល់​​ដ៏ខ្ពង់ខ្ពស់​បំផុត​ ពី​ សម្តេច​តេជោ​ប្រធាន​ព្រឹទ្ធសភា​នៃ​ព្រះរាជាណាចក្រ​កម្ពុជា​ដែល​កាប៉ាល់​ដឹកមនុស្សជាង ២
២០០នាក់ ដែល​ក្នុង​កាលៈទេសៈ​នោះ​មិន​មាន​ប្រទេស​ណា​យល់​ព្រម​ទទួល​ឲ្យ​ កាប៉ាល់​ Westerdam
ចូល​ចតទ្បើយ​។

ជាងនេះទៀត ប្រទេសកម្ពុជាមានប្រព័ន្ធសន្តិសុខសុខភាពដែលមានភាពធន់ និងនិរន្តរភាពដែលអាចឆ្លើយតបទៅនឹងភាពអាសន្នផ្នែកសុខភាពសាធារណៈហើយសហគមន៍ទាំងអស់បានត្រៀមលក្ខណៈយ៉ាងល្អសម្រាប់ជំងឺរាតត្បាត​ដែល​អាច​កើត​មាន​ឡើង​នា​ពេល​អនាគត​ ។

គួរបញ្ជាក់ថាកិច្ចសន្ទនាថ្នាក់តំបន់នេះមានការចូលរួមពីផ្នែកពាក់ព័ន្ធតាមវិស័យអាស៊ានអ្នកជំនាញផ្នែកសិទ្ធិមនុស្សមកពីស្ថាប័នសិទ្ធិមនុស្សជាតិវិទ្យាស្ថាននីតិអន្តរជាតិនៃបណ្ឌិតសភាវិទ្យាសាស្ត្រសង្គមចិនការិយាល័យឧត្តមស្នងការទទួលបន្ទុកសិទ្ធិមនុស្សអង្គការសហប្រជាជាតិលេខាធិការដ្ឋានអាស៊ាន បណ្តាភ្នាក់ងាររបស់អង្គការសហប្រជាជាតិ
អង្គការមិនមែនរដ្ឋាភិបាល និងតំណាងក្រសួង/ស្ថាប័នពាក់ព័ន្ធនានាសរុបប្រហែល១០០នាក់៕

អត្ថបទ៖ សំអឿន