ព័ត៌មានជាតិ

រដ្ឋបាលជលផលកំពង់ចាម បន្តចុះបង្ក្រាបបទល្មើសជលផលតាមដងព្រែក នៅស្រុកកងមាស

បានផុស

៥ ខែ មុន

នៅ

ថ្ងៃពុធ ៣០ តុលា ២០២៤

ដោយ

កម្លាំងជំនាញ នៃខណ្ឌរដ្ឋបាលជលផលកំពង់ចាម បានចុះប្រតិបត្តិការត្រួតពិនិត្យ និងបង្ក្រាបបទល្មើសជលផលបានចំនួនបីទីតាំង តាមដងព្រែក ស្ថិតក្នុងឃុំស្តៅ ស្រុកកងមាស ខេត្តកំពង់ចាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយមានបទបញ្ជាពី លោក អ៊ុន ចាន់ដា អភិបាលខេត្តកំពង់ចាម បានឲ្យមន្ត្រីជំនាញជលផលកំពង់ចាម បន្តចុះត្រួតពិនិត្យ និងបង្ក្រាបបទល្មើសជលផលនៅតាមដងព្រែកជាបន្តបន្ទាប់។

ជាក់ស្ដែងនៅថ្ងៃទី ៣០ ខែតុលា ឆ្នាំ ២០២៤ នេះ ខណ្ឌរដ្ឋបាលជលផលកំពង់ចាម ដឹកនាំដោយ លោក លី ស្រ៊ី នាយខណ្ឌស្ដីទីជលផលកំពង់ចាម បានសហការជាមួយអាជ្ញាធរស្រុកកងមាស និងកម្លាំងប៉ុស្តិ៍នគរបាលរដ្ឋបាលស្តៅ ដោយមានការសម្របសម្រួលពី លោក វង្ស ប៊ុនវិសុទ្ធ ព្រះរាជអាជ្ញា នៃអយ្យការអមសាលាដំបូងខេត្តកំពង់ចាម បានចុះប្រតិបត្តិការត្រួតពិនិត្យ និងបង្ក្រាបបទល្មើសជលផល ចំនួន ៣ ករណី។ ជាលទ្ធផល ក្រុមការងារ បានបំផ្លាញចោលនូវឧបករណ៍ដាយចាប់ត្រីធំៗ ចំនួន ៤ មាត់ ក្នុងដងព្រែក នៅភូមិសាស្ត្រឃុំស្តៅ ស្រុកកងមាស។

គូសបញ្ជាក់ផងដែរថា ជាលទ្ធផលបង្ក្រាបបទល្មើស និងការទប់ស្កាត់បទល្មើសនេសាទនៅរដូវបិទនេសាទឆ្នាំ ២០២៤ នេះ ខណ្ឌជលផលកំពង់ចាម បានសហការជាមួយកងកម្លាំងសមត្ថកិច្ចមូលដ្ឋាន ដោយមានការសម្របសម្រួលពីព្រះរាជអាជ្ញានោះ បានចំនួន ១១៨ ករណី ក្នុងនោះ ៖ មន្ត្រីជំនាញបានបំផ្លាញចោលវត្ថុតាងមានឧបករណ៍ខុសច្បាប់បានចំនួន ១១៣ ករណី និងចាក់លែងកូនត្រីចម្រុះចំនួន ៣ ១៥៨ គីឡូក្រាម។ ដោយឡែក មន្ត្រីជំនាញ បានបញ្ជូនវត្ថុតាងបទល្មើសច្បាប់នេសាទទៅតុលាការ ៥ ករណី ក្នុងនោះឃាត់រថយន្ត ២ គ្រឿង រ៉ឺម៉កម៉ូតូ ១ គ្រឿង និងឃាត់ខ្លួនមនុស្សបានម្នាក់ បញ្ជូនទៅតុលាការផងដែរ៕

អត្ថបទ និង រូបភាព ឡេក ចាន់ពេជ្រ