បុគ្គល លី សាម៉េត សារភាពថា«ខ្លួនពិតជាបានយកឈ្មោះសម្ដេចតេជោ ទៅបោកលុយអ្នកដទៃ» និងសុំពេលព្យាបាលជំងឺមួយរយៈ រួចនឹងទៅទទួលទោសតាមផ្លូវច្បាប់

បុគ្គល លី សាម៉េត នៅថ្ងៃចន្ទនេះ បានចេញមកសារភាពថា«ខ្លួនពិតជាបានយកឈ្មោះសម្ដេចតេជោ ទៅបោកលុយគេប្រាកដមែន»។ នៅក្នុងវីដេអូនោះ បុគ្គល លី សាម៉េត បានស្នើសុំពេលព្យាបាលជំងឺមួយរយៈ រួចនឹងចូលខ្លួនទៅទទួលទោសតាមផ្លូវច្បាប់។

​តាមរយៈវីដេអូ រយៈពេលជិត៦នាទី ដែលផ្សព្វផ្សាយលើគណនីហ្វេសប៊ុកផ្ទាល់ខ្លួន បុគ្គល លី​ សាម៉េត សារភាពថា៖«ខ្ញុំបាទ បានយកឈ្មោះសម្ដេច(សម្ដេចតេជោ) ទៅប្រើ ដើម្បីយកលុយគេនេះ​គឺជារឿងពិត ហើយក៏មិនមែនជាលើកទី១ដែរ។ ​មិនតែប៉ុណ្ណោះ ថាថវិកា(ដែលបានមកពីឆបោក)ទាំងនោះ យកទៅជូនសម្ដេចទៀត។ នេះគឺជារឿងដែលខ្ញុំបានប្រឌិត ចេញដោយខ្លួនឯង គឺបុគ្គលខ្ញុំម្នាក់ សាងកំហុសយ៉ាងធ្ងន់ធ្ងរ ដែលធ្វើឱ្យប៉ះពាល់ដល់កិត្តិយស សេចក្ដីថ្លៃថ្នូររបស់សម្ដេចតេជោ។»។

សូមរម្លឹកថា កាលពីរសៀលថ្ងៃទី៧​ ខែតុលា សម្ដេចតេជោ ហ៊ុន សែន បានប្រកាសឱ្យដឹងថា បុគ្គល លី សាម៉េត បានយកឈ្មោះរបស់សម្ដេចទៅបោកប្រាស់ថវិកាអ្នកដទៃរាប់សិបលានដុល្លារ។  កាលណោះ សម្ដេចតេជោ បានស្នើឱ្យក្រសួងយុត្តិធម៌បង្កកទ្រព្យសម្បត្តិបុគ្គល លី សាម៉េត ដើម្បីទុកសងជូនអ្នកដែលបានចាញ់បោក និងបានណែនាំឱ្យជនរងគ្រោះដែលចាញ់បោកបុគ្គល លី សាម៉េត ត្រូវដាក់ពាក្យបណ្ដឹង តាមរយៈមេធាវីរបស់សម្ដេច។​ សម្ដេចស្នើសុំសមត្ថកិច្ចតាមឃ្លាំមើលបុគ្គល លី សាម៉េត កុំឲ្យរត់ចេញផុតពីសំណាញ់ច្បាប់។ ភ្លាមៗ សមត្ថកិច្ច ក៏បានឡោមព័ទ្ធផ្ទះរបស់បុគ្គល លី សាម៉េត ក៏ប៉ុន្តែរកមិនឃើញបុគ្គល លី សាម៉េតឡើយ។​

តាមរយៈវីដេអូ ដែលផ្សព្វផ្សាយនាថ្ងៃទី០៤​ ខែវិច្ឆិកា នេះ បុគ្គល លី សាម៉េត បានសុំទោសសម្ដេចតេជោ​ ហ៊ុន សែន ចំពោះកំហុសដែលខ្លួនបានប្រព្រឹត្តជាច្រើនដង។ បុគ្គល លី សាម៉េត ក៏បានទទួលស្គាល់ថា ខ្លួនពិតជាបានកុហកអ្នកដទៃថា ខ្លួនធ្លាប់ចេញចូលគេហដ្ឋានរបស់សម្ដេចតេជោ នៅក្រុងតាខ្មៅ ពេលណាក៏បាន តែទាំងដែលខ្លួនមិនធ្លាប់ចូលសោះ។បុគ្គល លី សាម៉េត សារភាពថា មូលហេតុដែលខ្លួនប្រឌិតរឿងប្រាប់អ្នកដទៃថា «អាចចេញចូលគេហដ្ឋានសម្ដេចតេជោ​ពេលណា ក៏បាន» គឺព្រោះតែខ្លួនចង់បានលុយគេ។

បុគ្គល លី សាម៉េត ត្អូញត្អែរថាខ្លួនកំពុងតែមានបញ្ហាសុខភាព​ ដែលបច្ចុប្បន្នកំពុងរស់នៅជាមួយកូន និងបានសុំពេលវេលាមួយរយៈខ្លី ដើម្បីសម្រាកព្យាបាលជំងឺ រួចនៅចូលខ្លួនទទួលទោសតាមផ្លូវច្បាប់។

ក្នុងស្ថានភាពលើកដៃសំពះជាប់ជានិច្ច បុគ្គល លី សាម៉េត ត្អូញត្អែរដូច្នេះ៖« សព្វថ្ងៃនេះខ្ញុំកំពុងតែមានជំងឺ ហើយនៅផ្ទះកូន ខ្ញុំមានជំងឺទឹកនោមផ្អែម ក្រពះ ពោះវៀន  សំខាន់គឺទឹកនោមប្រៃកំពុងតែ(បណ្ដាល)ហើមខ្លួន។ ខ្លួនខ្ញុំហើម ដើរមិនបាន ខ្ញុំសុំពេលវេលាបន្ដិចរយៈពេលខ្លី ខ្ញុំនឹងចេញទៅសារភាពនៅមុខសមត្ថកិច្ច នៅមុខតុលាការ ដើម្បីឱ្យកាត់ទោសខ្ញុំបាទតាមច្បាប់។ ពេលដែលខ្ញុំធ្វើហើយ សុំពេលខ្លី មិនមែនសុំពេលវែងទេ ខ្ញុំមិនរត់គេចទៅណាទេ!»៕