សមាគមពលរដ្ឋខ្មែរ៦នៅក្រៅប្រទេស ប្រកាសថ្កោលទោសសកម្មជនជ្រុលនិយមដែលប្រើ​សម្តី​ពាលដាក់សម្តេចតេជោ

សមាគមពលរដ្ឋខ្មែរចំនួន៦នៅក្នុងប្រទេសអូស្រ្តាលី និងនូវ៉ែល ហេ្សឡង់ បានប្រកាសគាំទ្រសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងបានថ្កោលទោសដល់សកម្មជនជ្រុលនិយម ដែលបានប្រើប្រាស់ពាក្យសម្តីពាលឈ្លើយដាក់សម្តេចតេជោ។ ការប្រកាសរបស់សមាគមពលរដ្ឋខ្មែរនៅក្រៅប្រទេសទាំង៦នេះ ធ្វើឡើងតាមរយៈញត្តិគាំទ្រសម្តេចតេជោ ហ៊ុន សែន និងថ្កោលទោសសកម្មជនជ្រុលនិយមនៅថ្ងៃទី១៣ ខែវិច្ឆិកា ឆ្នាំ២០២៤នេះ។

សមាគមពលរដ្ឋទាំង៦ បានប្រកាសគាំទ្រសម្តេចតេជោ ហ៊ុន សែន និងប្រកាសថ្កោលទោសចំពោះសម្តីពាលរបស់ជនជ្រុលនិយមនៃក្រុមទូរទស្សន៍សំឡេងមនសិកាខ្មែរ ដឹកមុខដោយទណ្ឌិត សម រង្ស៊ី។ សមាគមទាំងនេះ បានអះអាងថា បុគ្គលម្នាក់ដែលបានទូរស័ព្ទទំនាក់ទំនងទៅសម្តេចតេជោ គឺមានចេតនាអាក្រក់ និយាយគ្មានគោរពចាស់ទុំ ខុសនឹងប្រពៃណីជាតិខ្មែរ និងមានចេតនានិយាយបំផ្លើសតាមពិត។ សម្រាប់សមាគមពលរដ្ឋខ្មែរទាំង៦ ក្រុមទូរទស្សន៍សំឡេងមនសិកាខ្មែរដែលជាបរិវាររបស់ទណ្ឌិត សម រង្ស៊ី គឺបង្ហាញច្បាស់ពីសណ្តានចរិតមាយាទនៃក្រុមជនអសីលធម៌ គ្មានគុណធម៌ គ្មានវិចារណញ្ញាណ មិនស្គាល់គុណ និងទោស ខុស និងត្រូវ។

សមាគមពលរដ្ឋខ្មែរទាំង៦ បានគូសបញ្ជាក់ថា៖« សម្តេចតេជោ ហ៊ុន សែន ជារដ្ឋបុរសដែលបានប្រើអស់កម្លាំងកាយចិត្ត បញ្ញាញាណ និងលះបង់សព្វបែបយ៉ាង ដើម្បីបុព្វហេតុជាតិមាតុភូមិ។ សម្តេចតេជោ បានស្រោចស្រង់ជីវិតប្រជាពលរដ្ឋពីរណ្ណៅនៃភ្លើងសង្រ្គាមឆ្ពោះមកកាន់ពន្លឺជីវិតថ្មី នាំជាតិចេញពីគំនរផេះផង់នៃភ្លើងសង្រ្គាមឆ្ពោះមកកាន់សុខសន្តិភាព នាំជាតិពីបែកបាក់ឆ្ពោះមកកាន់ឯកភាពរួមរួម នាំជាតិចេញពីគ្មានអ្វីសោះឆ្ពោះមកត្រើយអភិវឌ្ឍន៍ និងការរីកចម្រើន។ មិនត្រឹមតែពលរដ្ឋខ្មែរនោះទេ ជាតិសាសន៍ដទៃដែលបានដឹងពីប្រវត្តិជូរចត់របស់កម្ពុជា ក៏ទទួលស្គាល់នូវគំរូវីរភាពជាអ្នកដឹកនាំរបស់សម្តេចតេជោ ផងដែរ»។

ហេតុដូច្នេះហើយ សមាគមពលរដ្ឋខ្មែរទាំង៦ បានប្រកាសថ្កោលទោសចំពោះសម្តីទមិឡរបស់ជនជ្រុលនិយមនៃទូរទស្សន៍សំឡេងមនសិកាខ្មែរ ដឹកនាំដោយទណ្ឌិត សម រង្ស៊ី និងទទូចសុំឱ្យសមត្ថកិច្ចមានវិធានការច្បាប់ចំពោះក្រុមជ្រុលនិយម ដឹកនាំដោយទណ្ឌិត សម រង្ស៊ីនេះ ដោយគ្មានការលើកលែង។

សូមបញ្ជាក់ថា កាលពីថ្ងៃទី១០ ខែវិច្ឆិកា ឆ្នាំ២០២៤ កន្លងទៅ មានបុគ្គលនៅខាងក្រៅប្រទេសម្នាក់ដែលអះអាងថាជាអ្នកធ្វើការនៅទូរទស្សន៍សំឡេងមនសិកាខ្មែរបានហៅទូរស័ព្ទចូលមកសម្តេចតេជោ ហ៊ុន សែន ដោយប្រើប្រាស់ពាក្យសម្តីពាល ឈ្លើយ ព្រហើន និងប្រមាថមកលើសម្តេច។ ភ្លាមៗនោះ សម្តេចតេជោ ក៏បានលត់បុគ្គលជម្លើយនោះ សឹងតែរកពាក្យពេជន៍តបតវិញមិនបាន។ចំពោះបញ្ហានេះ សម្តេចតេជោ ហ៊ុន សែន បង្ហោះសារតាមបណ្តាញសង្គមភ្ជាប់ជាមួយខ្សែអាត់សំឡេងតាមទូរស័ព្ទដោយសរសេរថា៖ «ទោះបីថ្ងៃនេះ ជាថ្ងៃខ្ញុំកាន់ទុក្ខនៃការស្លាប់កូនប្រុសច្បងរបស់ខ្ញុំ១០វិច្ឆិកា ១៩៧៦ ក៏ដោយ តែខ្ញុំត្រូវបង្ហោះសំឡេង ទាំង​ស្រុ​ង​ទាំងសំឡេងខ្ញុំ ទាំងសំឡេងអាក្មេងពាលដែលហៅចូលមកទាំងព្រឹក និងយកទៅផ្សាយដោយកាត់ចោលពាក្យមួយចំនួន។ គ្រាន់តែប៉ុណ្ណេះ វាគ្រប់គ្រាន់ដើម្បីបង្ហាញថា ពួកក្មេងពាលដែលបម្រើឱ្យនយោបាយពាលរបស់មេក្លោងពាលវាកំសាកប៉ុណ្ណា បើគ្រាន់តែសំឡេងទាំងស្រុង វាមិនហ៊ានចាក់ផ្សាយផង»។

ជុំវិញរឿងនេះ ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា លោក ប៉ែន បូណា ក៏បានសម្តែងការហួសចិត្ត នឹកស្មានមិនដល់ថា មានអ្នកអះអាងធ្វើការក្នុងវិស័យសារព័ត៌មាន ហ៊ានប្រើពាក្យសម្តីពាល ព្រហើន មួលបង្កាច់មកលើសម្តេចតេជោ ហ៊ុន សែន ប្រធានព្រឹទ្ធសភាកម្ពុជា។ សម្រាប់លោក ប៉ែន បូណា មេរោគព្រហើន គឃ្លើន ជម្លើយ និងមួលបង្កាច់បែបនេះ ស័ក្តិសមនឹងការបន្សាបដោយឱសថល្វីង គឺមិនមែនសេរ៉ូផ្អែមនោះឡើយ៕