អ្នកនេសាទនៅខេត្តស្ទឹងត្រែងចាប់បានត្រី១​ក្បាល​តម្លៃជាង១លានរៀល

ពលរដ្ឋអ្នកនេសាទនៅខេត្តស្ទឹងត្រែង ក្នុងគ្រួសារមួយបានបង្ហាញពីទឹកមុខរីករាយនៅពេលដែលចាប់បានត្រីមួយក្បាលយកមកលក់នៅលើទីផ្សារបានតម្លៃរហូតដល់ទៅជាង១លានរៀល។

អ្នកចាប់បានត្រីបាននិយាយថា ត្រីមួយក្បាលវាអាចធ្វើឱ្យគ្រួសារគាត់យកប្រាក់បានពីលក់ត្រីដោះដូរទំនិញឥវ៉ាន់នៅផ្សារសាមគ្គីខេត្តស្ទឹងត្រែង ជិះទូកវិលត្រឡប់ទៅផ្ទះវិញ។ រីឯអ្នកចាំទទួលទិញត្រី នៅកំពង់មាត់ទន្លេសេកុងនៅព្រឹកថ្ងៃទី១៨ ខែធ្នូ ឆ្នាំ២០២៤ លាន់មាត់គ្រប់គ្នាថា ត្រីថ្លៃបែបនេះគ្មានអ្នកណាហ៊ានទិញយកទៅបរិភោគទេ ទុកឱ្យអ្នកមានលុយចុះ។

អ្នកខេត្តស្ទឹងត្រែងបានឱ្យឈ្មោះត្រីនេះថា ត្រីប៉ាវ៉ាមុខពីរ ចាត់ទុកជាប្រភេទត្រីលំដាប់លេខ២ មានតម្លៃថ្លៃ បន្ទាប់ពីត្រីប៉ាស៊ីអ៊ី ហើយវាក៏ថ្លៃជាងគេផងដែរនៅក្នុងប្រទេសកម្ពុជា។ គេប្រើឧបករណ៍នេសាទមងក្រឡា ឬបង់សំណាញ់ដើម្បីចាប់វា។

អ្នកលក់ត្រីបាននិយាយថា មូលហេតុគេហៅ ត្រីប៉ាវ៉ាមុខពីរ ក៏ព្រោះតែវាមានច្រមុះមានបន្លាមុខពីរមានធ្មេញខុសពីត្រីដទៃរួមទាំងពណ៌សម្បុរលឿងទុំ។ គេអាចយកវាទៅស្ងោជ្រក់ ចំហុយ អាំង ឬក៏ធ្វើផ្អកត្រីងៀតជាដើម។

អ្នកលក់ត្រីបាននិយាយបន្តទៀតថា ពលរដ្ឋធម្មតាមិនដែលបានភ្លក់រសជាតិវាទេ គឺមានតែម្ចាស់ភោជនីយ៍ដ្ឋានក្នុងខេត្តទើបមានលទ្ធភាពទិញទុកលក់បន្ត។ អ្នកមានសំណាងបានភ្លក់ប្រហែលជាឧកញ្ញ៉ា ឯកឧត្តម លោកជំទាវ ទើបបានទទួលទានត្រីថ្លៃបែបនេះ។

អ្នកខេត្តស្ទឹងត្រែងបានប្រៀបធៀប ត្រីប៉ាវ៉ាមុខពីរ មួយក្បាលទម្ងន់ជាង៦គីឡូក្រាមលក់ក្នុងតម្លៃ១គីឡូជិត២០ម៉ឺនរៀល។  ត្រីមួយក្បាលជាង១លានរៀលគេអាចទិញបានគោ១ទៅ២ក្បាលដុតឯណោះ។ បើនិយាយកាលពីជាង១០ឆ្នាំមុនពុំសូវមានតម្លៃថ្លៃទេគ្មានអ្នកណាចង់បាន ប៉ុន្តែរយៈពេលចុងក្រោយកាន់តែខ្សត់ទៅទើបតម្លៃកាន់តែឡើងថ្លៃដោយមិននឹកស្មាន។

អង្គការ Wonders of the Mekong  បានចេញផ្សាយត្រីប៉ាវ៉ាមុខពីរមានឈ្មោះបែប វិទ្យាសាស្រ្តថា Incisilabeobehri វាជិតផុតពូជលើភពផែនដីទៅហើយ។ វាធ្វើដំណើរចេញពីទន្លេសេកុងសេសាន និងស្រែពក តាំងពីវានៅតូចៗចូលទៅក្នុងទន្លេមេគង្គ។ ប្រហែលវាចុះទៅដល់ព្រំប្រទល់ខេត្តក្រចេះ និងស្ទឹងត្រែង ឬអាចហែល ទៅដល់ប៉ែកខាងត្បូងប្រទេសឡាវ និងភាគឦសានប្រទេសថៃ ដើម្បីរកចំណី(ស្លែនៅតាមដុំថ្ម)។ វាមានពងកូននៅចំកណ្តាលទន្លេសេកុង ក្នុងខែកក្កដា និងខែសីហា។ វាអាចមានទំហំធំបំផុតដល់ទៅ៦០សង់ទីម៉ែត្រ។ ត្រីប៉ាវ៉ាមុខពីរបានចាត់ចូលក្នុងបញ្ជីក្រហមរបស់ IUCN កាលពីឆ្នាំ២០១១ថា ជាប្រភេទត្រីរងគ្រោះ៕

អត្ថបទ៖ ហុង វិនជូ