រដ្ឋមន្ត្រីសុខាភិបាល ណែនាំមន្ត្រីរៀបចំផែនការយុទ្ធសាស្រ្ត និងគោលនយោបាយឆ្លើយតបយុទ្ធសាស្រ្តបញ្ចកោណរដ្ឋាភិបាល

លោកសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាលបានធ្វើការណែនាំដល់ថ្នាក់ដឹកនាំ និងមន្រ្តីរាជការនៃនាយកដ្ឋានផែនការ និងព័ត៌មានសុខាភិបាលត្រូវបន្តយកចិត្តទុកដាក់ខ្ពស់ទៅលើការពិនិត្យ និងរៀបចំផែនការយុទ្ធសាស្រ្ត
និងគោលនយោបាយរបស់ក្រសួងសុខាភិបាលដើម្បីចូលរួមចំណែកអនុវត្តយុទ្ធសាស្រ្តបញ្ចកោណ-ដំណាក់កាលទី១
របស់រាជរដ្ឋាភិបាល និតិកាលទី៧ នៃរដ្ឋសភា ក្នុងការអភិវឌ្ឍមូលធនមនុស្សសម្រាប់កំណើនសេដ្ឋកិច្ចប្រកបដោយចីរភាព។

ក្នុងឱកាសជួបសំណេះសំណាល និងផ្ដល់អនុសាសន៍លើការអនុវត្តការងាររបស់ថ្នាក់ដឹកនាំទទួលបន្ទុក និងមន្រ្តីរាជការ នៃនាយកដ្ឋានផែនការ និងព័ត៌មានសុខាភិបាលកាលពីថ្ងៃទី១៤មករា លោករដ្ឋមន្រ្តីបានមានប្រសាសន៍ថា «ការធ្វើផែនការគឺជាដំណើរការរៀបចំជាអចិន្រ្តៃយ៍សំដៅធ្វើឱ្យប្រសើរឡើងការប្រើប្រាស់ធនធានទាំងឡាយ ការសម្របសម្រួល
និងការបម្រើសេវាឱ្យមានប្រសិទ្ធភាព ស័ក្តិសិទ្ធិភាព ដើម្បីសម្រេចគោលដៅសុខភាពសាធារណៈ និងការឆ្លើយតបតម្រូវការរបស់ប្រជាពលរដ្ឋ»។ លោករដ្ឋមន្រ្តីបានណែនាំឱ្យមន្ត្រីត្រូវបង្កើនប្រសិទ្ធភាពការងារបន្ថែមទៀតក្នុងឆ្នាំថ្មីនេះ ជាពិសេសពាក់ព័ន្ធការងារផែនការ និងព័ត៌មានសុខាភិបាល។

ក្នុងឱកាសនោះដែរ លោករដ្ឋមន្ត្រី ក៏បានផ្តល់អនុសាសន៍ជាគន្លឹះដល់នាយកដ្ឋានត្រូវយកចិត្តទុកដាក់លើដំណើរការអភិវឌ្ឍ និងអនុវត្តផែនការជាប្រចាំដើម្បីតាមដាន និងវាយតម្លៃនូវប្រភពធនធាន សេវាសុខាភិបាលស្របតាមគោលនយោបាយ យុទ្ធសាស្រ្ត គោលដៅជាតិ និងសម្របតាមធនធានដែលមាន។ ត្រូវពង្រឹងកិច្ចសហការ និងសម្របសម្រួលការងារជាមួយអង្គភាពសុខាភិបាល ស្ថាប័ន ឬដៃគូពាក់ព័ន្ធប្រកបដោយគណនេយ្យភាព ប្រសិទ្ធភាព ស័ក្តិសិទ្ធភាព ក្នុងវិស័យសុខាភិបាល ជាពិសេសការវិភាជថវិកាផ្តោតលើផែនការសកម្មភាពជាអាទិភាព។

ជាមួយគ្នានេះដែរ ត្រូវគ្រប់គ្រងទិន្នន័យសុខាភិបាលមានគុណភាព ការសិក្សាវាយតម្លៃវិភាគទិន្នន័យច្បាស់លាស់ មុនរៀបចំគោលនយោបាយ ផែនការ ជាពិសេសផ្តោតលើអត្ថប្រយោជន៍ របស់ប្រជាជនគោលដៅដែលសង្កត់ធ្ងន់លើការពង្រីកការគាំពារសុខភាពសង្គមដល់បុគ្គលគ្រប់រូបដើម្បីឆ្ពោះទៅកាន់ការគ្របដណ្តប់សុខភាពជាសកល។ លើសពីនេះទៀតត្រូវយកចិត្តទុកដាក់លើការកែទម្រង់ជាយុទ្ធសាស្រ្តក្នុងការងារផែនការ ដោយទទួលនូវព័ត៌មាន ត្រឡប់ពីភាគីប្រតិបត្តិពាក់ព័ន្ធដើម្បីកែលម្អ និងបង្កើនប្រសិទ្ឋភាពការងារជាពិសេសត្រូវរៀបចំក្របខណ្ឌសូចនាករសមិទ្ធកម្ម សម្រាប់តាមដាន និងវាយតម្លៃគ្រប់សកម្មភាពការងាររបស់អង្គភាពពាក់ព័ន្ឋ។

លោក រដ្ឋមន្រ្តី បានថ្លែងអំណរគុណ និងកោតសរសើរព្រមទាំងលើកទឹកចិត្តដល់ថ្នាក់ដឹកនាំ និងមន្រ្តីរាជការទាំងអស់
នៃនាយកដ្ឋានផែនការ និងព័ត៌មានសុខាភិបាលដែលបានខិតខំបំពេញការងារបានល្អប្រសើរនាពេលកន្លងមក៕

អត្ថបទ៖ សំអឿន