ធនាគារជាតិសាខាខេត្តរតនគិរី អំពាវនាវឱ្យពលរដ្ឋមានក្រដាសប្រាក់ចាស់ ទក់ ឬរហែក​ មកប្តូរយកក្រដាសប្រាក់ថ្មីវិញ

ធនាគារជាតិនៃកម្ពុជា សាខាខេត្តរតនគិរី បានអំពាវនាវទៅដល់សាធារណជនដែលរស់នៅក្នុងខេត្តរតនគិរី ដែលមានក្រដាសប្រាក់ ទក់ រហែក ឬចាស់ ប្រើប្រាស់មិនកើត ទៅប្តូរយកក្រដាសប្រាក់ថ្មីវិញ ដើម្បីលើកស្ទួយប្រាក់រៀលខ្មែរ និងប្រើប្រាស់ប្រាក់រៀលកាន់តែ ទូលំទូលាយ ដើម្បីជាប្រយោជន៍ដល់សេដ្ឋកិច្ចជាតិរបស់ព្រះរាជាណាចក្រកម្ពុជា។

ធនាគារជាតិនៃកម្ពុជា សាខាខេត្តរតនគិរី កំពុងសហការជាមួយគ្រឹះស្ថានធនាគារ និងហិរញ្ញវត្ថុ ក្នុងខេត្ត នឹងរៀបចំយុទ្ធនាការប្តូរប្រាក់រៀល ទក់ ចាស់ រហែក ជូនប្រជាពលរដ្ឋដោយមិនគិតកម្រៃសេវា និងផ្ទេរចូលទៅក្នុងគណនីបាគង ឬគណនីដែលជាសមាជិកបាគង នៅរមណីយដ្ឋានបឹងកន្សែងជាប់អកបឹងកន្សែង ក្រុងបានលុង ខេត្តរតនគិរី  នៅថ្ងៃទី ១១ ខែកុម្ភៈ ឆ្នាំ ២០២៥ ចាប់ផ្តើមពីម៉ោង ៨:០០ ព្រឹក ដល់ ម៉ោង ១៥:០០ រសៀល។

សាខាធនាគារជាតិខេត្តរតនគិរី បានអំពាវនាវឲ្យសាធារណៈជនទាំងអស់ ដែលមានបំណងចង់ចូលរួមប្តូប្រាក់នេះ នៅទីតាំង និងកាលបរិច្ឆេទខាងលើ។ ធនាគារជាតិសាខាខេត្ត ក៏អាចបើកគណនេយ្យថ្វាយ និងជូនព្រះសង្ឃ និងប្រជាពលរដ្ឋ អាចបើកគណនេយ្យបាគង ឬគណនេយ្យធនាគារបានផងដែរ ដោយគ្រាន់តែមានអត្តសញ្ញាណប័ណ្ណសញ្ជាតិខ្មែរ ច្បាប់ដើម ឬ លិខិតឆ្លងដែន ឬសង្ឃដីកាច្បាប់ដើម។ នេះបើយោងតាមសេចក្តីជូនដំណឹងរបស់ធនាគារជាតិនៃកម្ពុជា សាខាខេត្តរតនគិរី៕