មន្ត្រីក្រសួងសេដ្ឋកិច្ច ៖ ម្ចាស់​អាជីវកម្ម ដែលប្រឈមហានិភ័យ ត្រូវ​មាន​ធានារ៉ាប់រង​សម្រាប់​អាជីវកម្ម​ខ្លួន

កែប ៖ នៅព្រឹកថ្ងៃទី ២៨ ខែមីនា ឆ្នាំ២០២៥នេះ ជា​ប្រសាសន៍របស់លោកស្រី ហោ សុវឌ្ឍនា បានថ្លែងនៅក្នុងពិធីបើកសិក្ខាសាលាផ្សព្វផ្សាយស្តីពី ការ​ធានារ៉ាប់រង​ជា​កាតព្វកិច្ច​ជូន​ដល់​សិក្ខាកាម​មក​ពី​ខេត្ត​កែប​ និងខេត្តកំពតដែលកំពុងបំពេញការងារដើម្បីសន្តិសុខកណ្ដាប់ធ្នាប់។

ម្ចាស់​យានយន្ត ម្ចាស់​អាជីវកម្ម​ដឹក​ជញ្ជូន ព្រម​ទាំង​ម្ចាស់​ការដ្ឋាន​សំណង់​ចាំ​បាច់​ត្រូវ​មាន​ធានារ៉ាប់រង​ដើម្បី​ឱ្យ​ប្រាកដ​ថា រាល់​ករណី​គ្រោះថ្នាក់ ការ​ខូចខាតទ្រព្យសម្បត្តិ ឬ​ការ​បាត់បង់​អាយុជីវិត​ពិត​ជា​ស្ថិត​ក្រោម​ទំនួលខុស​ត្រូវ​ស្រប​តាម​ច្បាប់ ដែល​បាន​ចែង​អំពី​កាតព្វកិច្ច​ធានារ៉ាប់រង​សម្រាប់ម្ចាស់អាជីវកម្ម។

លោកស្រី ហោ សុវឌ្ឍនា អគ្គ​នាយករង​នៃ​អគ្គនាយកដ្ឋាននិយ័តករធានារ៉ាប់រងកម្ពុជា បាន​មាន​ប្រសាសន៍​ថា វិស័យ​ធានារ៉ាប់រង​ជា​សមាសភាគ​ដ៏​សំខាន់​ក្នុងការរួមចំណែកគាំទ្រកំណើនសេដ្ឋកិច្ចជាតិ ពិសេស​ទ្រទ្រង់ប្រព័ន្ធសន្តិសុខសង្គមតាមរយៈ​ការ​បង្កើតសំណាញ់សុវត្ថិភាព និងការបង្កើនភាពធន់ផ្នែកហិរញ្ញវត្ថុ​ប្រឈម​ហានិភ័យ​ដែលត្រូវបានធានាជូនប្រជាពលរដ្ឋ គ្រួសារ និង​ម្ចាស់​អាជីវកម្មនានា។

លោកស្រី ហោ សុវឌ្ឍនា អគ្គនាយករងនៃអគ្គនាយកដ្ឋាននិយ័តករធានារ៉ាប់រងកម្ពុជាបានបន្ថែមថា ជាក់ស្តែង យោងតាមច្បាប់ស្តីពីការធានារ៉ាប់រងដែលបានអនុម័តដាក់ឱ្យប្រើប្រាស់ តាំងពីឆ្នាំ ២០០០ និងបានកែសម្រួលជំនួសដោយច្បាប់ស្តីពីការធានារ៉ាប់រង នាឆ្នាំ ២០១៤ បានកំណត់ការធានារ៉ាប់រងចំនួនបី ជាកាតព្វកិច្ចដែលរួមមាន ការធានារ៉ាប់រងភារៈទទួលខុសត្រូវយានយន្ត ការធានារ៉ាប់រងភារៈទទួលខុសត្រូវការដឹកជញ្ជូនអ្នកដំណើរ និងការធានារ៉ាប់រងភារៈទទួលខុសត្រូវការដ្ឋាន។

លោកស្រី ហោ សុវឌ្ឍនា បានបញ្ជាក់ឱ្យដឹងថា ច្បាប់បានកំណត់ជាកាតព្វកិច្ចដល់ម្ចាស់ប្រកបអាជីវកកម្មទាំងនេះ ដូច្នេះ ម្ចាស់អាជីវកម្មត្រូវទិញធានារ៉ាប់រងភារៈទទួលខុសត្រូវរាល់ការខូចខាតដល់តតិយជនដែលបណ្តាលមកពីសកម្មភាពរបស់ខ្លួន។

ជាមួយនោះ ច្បាប់ក៏បានកំណត់ទោសទណ្ឌចំពោះបុគ្គលដែលល្មើសមិនអនុវត្តតាមកាតព្វកិច្ចទាំងនេះផងដែរ។

លោកស្រី អ៊ុល ភីរុណ អភិបាលរងខេត្តកែបបានមានប្រសាសន៍ថា សកម្មភាពដឹកជញ្ជូន និងសកម្មភាពសេដ្ឋកិច្ចក្នុងខេត្តកែបបានបង្ហាញពីសញ្ញាវិជ្ជមាននៃតម្រូវការសេវាធានារ៉ាប់រង។

ដូច្នេះ លោកស្រី អ៊ុក ភីរុណ អភិបាលរងខេត្តកែប បាន​សំណូមពរ​ដល់​និយ័តករ​ធានារ៉ាប់រងកម្ពុជា​ជំរុញ​ឱ្យមានការវិនិយោគដោយបើកសាខាក្រុមហ៊ុនធានារ៉ាប់រងនៅខេត្តកែបសំដៅបង្កើតការងារជូនប្រជាពលរដ្ឋក្នុងមូលដ្ឋានផ្ទាល់ ហើយនេះជាជ្រុងមួយទៀតក្នុងការរួមចំណែកសម្រាលបន្ទុកផ្នែកហិរញ្ញវត្ថុ ក៏ដូចជាបង្កើតបរិយាកាសធុរកិច្ចឱ្យកាន់តែល្អប្រសើរដើម្បីអភិវឌ្ឍសេដ្ឋកិច្ច និងបង្កើតការងារជូនពលរដ្ឋខេត្តកែប។

លោក ស្រី អ៊ុល ភីរុណ អភិបាលរងខេត្តកែប បានបញ្ជាក់ថា ទីផ្សារធានារ៉ាប់រងនៅកម្ពុជា គឺជាទីផ្សារមួយ ដែលកំពុងមានការវិវត្តឆ្ពោះទៅមុខយ៉ាងឆាប់រហ័សគួរឱ្យកត់សម្គាល់ពីមួយឆ្នាំទៅមួយឆ្នាំ ដែលបច្ចុប្បន្ន មានក្រុមហ៊ុនធានារ៉ាប់រងចំនួន ៤០ កំពុង​ធ្វើ​ប្រតិបត្តិការអាជីវកម្មនៅក្នុងព្រះរាជាណាចក្រកម្ពុជា ជាមួយនឹងទំហំបុព្វលាភដុលជាង ៣៧០លានដុល្លារអាម៉េរិក និងទ្រព្យសកម្មសរុបជាង១,២ប៊ីលានដុល្លារអាម៉េរិក យ៉ាងណាមិញ ក្នុងឆ្នាំ២០២៤ ទំហំទីផ្សារនេះ បានរួមចំណែកក្នុងសេដ្ឋកិច្ចតែប្រមាណ ១.១៧ ភាគរយ ប៉ុណ្ណោះ ដោយមនុស្សម្នាក់ប្រើប្រាស់សេវាធានារ៉ាប់រងប្រមាណតែ ២២ដុល្លារអាមេរិក៕

ដោយ ៖ សឹង រ៉ាត់