នាយករដ្ឋមន្ត្រីសម្រេចឱ្យកាត់ផ្ដាច់ការជ្រៀតជ្រែកលើកិច្ចការក្រុមហ៊ុនរដ្ឋ

នាយករដ្ឋមន្ត្រី សម្ដេចធិបតី ហ៊ុន ម៉ាណែត បានបញ្ជាឱ្យកែសម្រួល​អនុក្រឹត្យលក្ខខន្តិកៈរបស់សហគ្រាសសាធារណៈរបស់រដ្ឋដោយបើកផ្លូវឱ្យជនស៊ីវិលមកកាន់តួនាទីជានាយកប្រតិបត្តិ​ក្រុមហ៊ុនរបស់រដ្ឋបាន។ សម្ដេចថា «បើធ្វើការជាឯកជនទាល់តែមានផ្នត់គំនិតជាឯកជន» ដើម្បីធ្វើឱ្យមានលទ្ធផលជូនជាតិនិងប្រជាជន។

ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការកំពង់ផែទេសចរណ៍អន្តរជាតិខេត្ត​កំពត ព្រឹកថ្ងៃទី២១ ខែមេសា ឆ្នាំ២០២៥នេះ សម្ដេចធិបតី ហ៊ុន ម៉ាណែត បាន​លើកឡើងថា​ បើជ្រុលជារដ្ឋបង្កើតក្រុមហ៊ុនហើយត្រូវរើសមនុស្សដែលមានសមត្ថភាពពីវិស័យឯកជនឱ្យមកដឹកនាំអាជីវកម្មតែម្ដងទៅ។ សម្ដេចថាកន្លងទៅពេលរដ្ឋាភិបាលបង្កើតគ្រឹះស្ថានសាធារណៈរបស់រដ្ឋគឺដាក់មន្ត្រីរាជការជានាយកប្រតិបត្តិ និងក្រុមប្រឹក្សាភិបាលរបស់ក្រុមហ៊ុនរដ្ឋទាំងនោះដែលអ្នកខ្លះមិនដែលមានបទពិសោធន៍ដឹកនាំអាជីវកម្មនោះទេ។

សម្ដេចថា៖ «ខ្ញុំឱ្យកែសម្រួលលក្ខខន្តិកនិងអនុក្រឹត្យដើម្បីបើកច្រកឱ្យអ្នកធ្វើប្រធានប្រតិបត្តិយើងអាច​ជួលអ្នកមកពីវិស័យឯកជនធ្វើការងារហ្នឹងតែម្ដង ដើម្បីឱ្យគាត់ដឹកនាំជាឯកជនតែម្ដងហើយរដ្ឋយើងត្រឹមតែក្រុមប្រឹក្សាភិបាលបានហើយ។ ហើយក្រុមប្រឹក្សាភិបាលកុំមកលូកលាន់ការដឹកនាំរបស់ក្រុមហ៊ុនឯកជនទោះបីជា​ក្រុមហ៊ុនឯកជនជាគ្រឹះស្ថានសាធារណរបស់រដ្ឋក៏ដោយ ក៏ត្រូវតែរត់ក្នុងលក្ខណៈឯករាជ្យដើម្បីប្រសិទ្ធភាព បាន​ចំណេញ។ បើធ្វើជាឯកជនត្រូវមានផ្នត់គំនិតជាឯកជន ហើយត្រូវទទួលខុសត្រូវជាឯកជន ធ្វើបែបនេះដើម្បីឱ្យមានប្រសិទ្ធភាព មានសមិទ្ធផលជូនជាតិ និងប្រជាជនរបស់យើង»។

សម្ដេចថាបច្ចុប្បន្ន​សម្ដេចកំពុងពិនិត្យលើសេចក្ដីព្រាង៣ទៅ៤ក្រុមហ៊ុនរដ្ឋដែលគ្រោងបង្កើតដោយមិនទាន់មានការស្រុះស្រួលគ្នាជាសំឡេងមួយនៅឡើយ។ សម្ដេចបញ្ជាក់ថាការជជែកចចារយ៉ាងណាក៏បាន តែសំខាន់ត្រូវធានាថា អ្នកកាន់តួនាទីជានាយកប្រតិបត្តិមានឯករាជ្យភាព មានប្រសិទ្ធិភាព និងមានការទទួលខុសត្រូវឱ្យបានច្បាស់​៕

អត្ថបទដោយ ហ៊ុន សិរីវឌ្ឍន៍