ក្រសួងមុខងារ នឹងចាប់ដៃអង្គភាពប្រឆាំងអំពើពុករលួយ បង្ក្រាបជនស៊ីឈ្នួលរត់ការ​ចូល​ក្របខណ្ឌ​រដ្ឋ

ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារ អះអាងថា ក្រសួងមុខងារសារធារណៈ និងអង្គភាពអំពើពុករលួយ(ACU) នឹងបង្ក្រាប ចាប់ខ្លួនជនណា ដែលឆ្លៀតឱកាសដើរប្រមូលប្រាក់ពីបេក្ខជន រួចសន្យាថា នឹងរត់ការជួយឱ្យបេក្ខជននោះ ក្លាយជាមន្ត្រីរាជការនៅតាមក្រសួងស្ថាប័ន បន្ទាប់ពីប្រមូលបានភស្តុតាងគ្រប់គ្រាន់។ តាមឯកឧត្ដម ហ៊ុន ម៉ានី ដើម្បីបង្ក្រាបករណីនេះ ឯកឧត្ដម បានជជែកជាមួយ ប្រធានអង្គភាពប្រឆាំងអំពើពុករលួយ ទេសរដ្ឋមន្ត្រី ឧម យិនទៀង រួចរាល់ហើយ។ ឯកឧត្ដម ហ៊ុន ម៉ានី ថ្លែងដូច្នេះ នៅក្នុងពីធីបើកសិក្ខាសាលាផ្សព្វផ្សាយ ស្តីពីការអនុវត្តនិយាមនីតិវិធីប្រតិបត្តិ និងការចែករំលែកបទពិសោធ សម្រាប់ការប្រឡងប្រជែងជ្រើសរើសមន្ត្រីរាជការស៊ីវិល ជូនក្រសួង ស្ថាប័ន។

ពីសិក្ខាសាលារៀបចំនៅព្រឹកថ្ងៃពុធ នេះ ឯកឧត្ដម ហ៊ុន ម៉ានី សង្កត់ធ្ងន់ដូច្នេះ៖«​​ កន្លងមកបានធ្វើការជាមួយឯកឧត្ដមកិត្តិនីតិកោសលបណ្ឌិត ឱម យិនទៀង ផ្ដល់ជាគោលការណ៍ ដើម្បី(បង្ក្រាប)ករណីណាដែលមានភស្តុតាងច្បាស់លាស់ សុំទោសធ្វើហើយ!»។

តាមរយៈសិក្ខាសាលាដដែល ឯកឧត្ដម ហ៊ុន ម៉ានី ព្រមានឱ្យជនឈ្លៀតឱកាសដើរប្រមូលប្រាក់ដើម្បីរត់ការចូលក្របខណ្ឌ ត្រូវបញ្ឈប់សកម្មភាពជាបន្ទាន់ បើនៅតែបន្ត នឹងចាត់វិធានការក្ដៅ តាមផ្លូវច្បាប់ជាធរមាន កុំឱ្យប៉ះពាល់ដល់កេរ្តិ៍ឈ្មោះ និងការខិតខំប្រឹងប្រែងលើកំណែទម្រង់ការប្រឡងជ្រើសរើសមន្ត្រី។

ស្របពេលដែលក្រសួងមុខងារសាធារណៈ កំពុងរឹតបន្តឹងការប្រឡងជ្រើសមន្ត្រី ឱ្យចូលបម្រើការងារប្រកបដោយគុណាធិបតេយ្យ តម្លាភាព យុត្តិធម៌ និងបរិយាបន្ន និងប្រសិទ្ធភាព និងឈរលើគោលការណ៍ជាប់ដោយមោទនធ្លាក់ដោយអស់ចិត្ត ឯកឧត្ដម ហ៊ុន ម៉ានី ឱ្យដឹងថា គឺមានជនឆ្លៀតឱកាស ទៅបញ្ចុះបញ្ចូលឱ្យសូកលុយតាមខ្លួន ដើម្បីរត់ការចូលក្របខណ្ឌរដ្ឋ ដែលករណីនេះ ទើបតែកើតឡើងប្រមាណកាលពី២សប្ដាហ៍មុនប៉ុណ្ណោះ។

នៅក្នុងនីតិកាលទី៧ ឯកឧត្ដម ហ៊ុន ម៉ានី ឱ្យដឹងថា រាល់ការប្រឡងប្រជែងរើសមន្ត្រីរាជការឱ្យចូលបម្រើការតាមក្រសួងស្ថាប័ន ដែលក្រសួងមុខងារសាធារណៈធ្វើជាសហប្រធានរៀបចំរៀបចំការប្រឡង គឺតម្រូវឱ្យបេក្ខជនចំណាយប្រាក់ត្រឹមតែ២ម៉ឺនរៀលប៉ណ្ណោះដើម្បីទិញពាក្យប្រឡង ក្រៅពីនេះ ដាច់ខាតមិនត្រូវចំណាយលុយរាប់ពាន់ដុល្លារ ដូចការបញ្ចុះបញ្ចូលរបស់ជនខិលខូចឡើយ។

ការប្រឡងដែលរៀបចំដោយក្រសួងមុខងារសាធារណៈ គឺមានស្ដង់ដារច្បាស់លាស់ រឹតបន្តឹង ដោយការតាក់តែងវិញ្ញាសាប្រឡង គឺធ្វើឡើងមុនការងារប្រឡងមកដល់ត្រឹមតែ២ ទៅ៣ម៉ោងប៉ុណ្ណោះ ដើម្បីជៀសវាងការបែកវិញ្ញាសា ហើយការប្រឡង និងការតាមដានពីអង្គភាពប្រឆាំងអំពើ ពុករលួយ និងយុវជនស្ម័គ្រចិត្ត ចំណែកអត្រាកំណែនឹងធ្វើឡើងយ៉ាងហ្មត់ចត់ ដើម្បីផ្ដល់យុត្តិធម៌ដល់បេក្ខជនប្រឡង។

ឯកឧត្ដម ហ៊ុន ម៉ានី ឱ្យដឹងថា ឆ្លងកាត់ការប្រឡងកន្លងមក បេក្ខជនដែលចូលរួមប្រឡង បានកោតសរសើរចំពោះការរៀបចំ ថាផ្ដល់ភាពយុត្តិធម៌ ត​ម្លាភាព ត្រឹមត្រូវ។

កាលពី​ថ្ងៃទី៩​ ខែឧសភា​ ឆ្នាំ២០២៤  ACU ​បញ្ជូន​ជន​សង្ស័យ​៣នាក់ រួមមាន​​គ្រូ​បង្រៀន​២នាក់ និង​មន្ត្រី​ថ្នាក់​ការិយាល័យ​​នៅ​ក្រសួង​ផែនការ​ម្នាក់​ទៅ​កាន់​អយ្យការ​អមសាលា​ដំបូង​រាជធានី​ភ្នំពេញ​ដើម្បី​ចាត់ការ​តាម​នីតិវិធីច្បាប់។​ACU  រកឃើញថាពួកគេសហការ​គ្នា​រត់​ការ​បញ្ចូល​ចូល​ក្របខណ្ឌ ដោយ​ខុសច្បាប់​តាំង​ពី​ឆ្នាំ ២០២៣ ដល់​ដើម​ខែ​ឧសភា ឆ្នាំ ២០២៤ ក្នុង​នោះ​មាន​សកម្មភាព​ដូចជា ការ​រត់ការ​ចូល​ក្របខណ្ឌ​រដ្ឋ ការ​រត់ការ​ចូល​ក្រប​ខណ្ឌ​គ្រូបង្រៀន និង ក្របខណ្ឌ​ក្រសួង​ផ្សេងៗ​ទៀត ការ​ទទួល​ធ្វើ​សញ្ញាបត្រ​ក្លែង​គ្រប់​ប្រភេទ ដូចជា សញ្ញាបត្រ​បាក់ឌុប សញ្ញាបត្រ​បរិញ្ញាបត្រ និង​សញ្ញាបត្រ​បរិញ្ញាបត្រ​ជាន់ខ្ពស់​ជាដើម ក្នុង​តម្លៃ​ចាប់​ពី ៤៥០​ដុល្លារ​អាមេរិក ដល់ ១.៥០០​ដុល្លារ​អាមេរិកជាដើម៕​