ព័ត៌មានជាតិ

លោក ហ៊ុន ម៉ានី៖ យើងមិនអាចនៅស្ងៀមចំពោះការប្រមាថដែលមិនសមរម្យមកលើជាតិសាសន៍យើងឡើយ

បានផុស

២០ វិនាទី មុន

នៅ

ថ្ងៃសុក្រ ១៣ មិថុនា ២០២៥

ដោយ

រដ្ឋមន្ត្រីក្រសួងមុខងារសាធារណៈ លោកឧបនាយករដ្ឋមន្ត្រី ហ៊ុន ម៉ានី ជំរុញដល់កូនខ្មែរគ្រប់រូបរួមគ្នាការពារបូរណភាពទឹកដី ការពារផលប្រយោជន៍ជាតិ និងការពារកិត្តិយស និងភាពថ្លៃថ្នូររបស់ខ្មែរយើង។ លោកថាពលរដ្ឋខ្មែរមិនអាចនៅស្ងៀមចំពោះការប្រមាថនោះឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងហ្វេសបុកផេកនៅថ្ងៃទី១៣ ខែមិថុនា ឆ្នាំ២០២៥នេះលោកឧបនាយករដ្ឋមន្ត្រី ហ៊ុន ម៉ានី បានលើកឡើងថាមួយរយៈចុងក្រោយនេះប្រទេសថៃបានប្រព្រឹត្តទង្វើគគ្លើន និងមិនគប្បីជាច្រើនលើកមកលើកម្ពុជា ដែលបានរុញឱ្យកម្ពុជាមានវិធានការតបទៅវិញក្នុងភាពចាស់ទុំ និងយកឧត្តមប្រយោជន៍ជាតិប្រជាជនជាធំ។

លោក ហ៊ុន ម៉ានី សង្ឃឹមថាពលរដ្ឋនឹងយល់ស្របហើយគាំទ្រចំពោះចំណាត់ការដែលរដ្ឋាភិបាលបានដាក់ចេញនៅពេលនេះ។ លោកថា សកម្មភាព កាយវិការ និងសំឡេងនៃការគាំទ្ររបស់ពលរដ្ឋកម្ពុជាម្នាក់ៗ គឺជាកម្លាំងចិត្ត និងថាមពលសម្រាប់រាជរដ្ឋាភិបាលនិងកងកម្លាំងប្រដាប់អាវុធរបស់យើងនាពេលនេះ។

លោកថា៖ «យើងមិនអាចនៅស្ងៀមចំពោះការប្រមាថដែលមិនសមរម្យមកលើជាតិសាសន៍យើង ក្នុងនាមជាអារ្យប្រទេសមួយដ៏ចំណាស់ក្នុងពិភពលោកបានឡើយ»។

បញ្ហាព្រំដែនកម្ពុជា-ថៃបានកើនកម្ដៅជាខ្លាំងនៅប៉ុន្មានថ្ងៃចុងក្រោយនេះ បន្ទាប់ពីថៃបានឆ្មក់ចូលបាញ់សម្លាប់ទ័ពខ្មែរម្នាក់នៅតំបន់មុំបីកាលពីថ្ងៃទី២៨ ខែឧសភា ឆ្នាំ២០២៥មក ហើយក៏បានបន្តបិទព្រំដែនដោយឯកតោភាគីកាលពីសប្ដាហ៍ និងបានប្រើប្រាស់ភាសាចង់កាត់ផ្ដាច់ភ្លើងអគ្គិសនី និងអ៊ីនធើណិតដែលផ្គត់ផ្គង់មកកម្ពុជាទៀតផង។

នៅយប់ថ្ងៃទី១២ ខែមិថុនា នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានសម្រេចឆ្លើយតបដោយឱ្យក្រសួងប្រៃសនីយ៍ និងក្រសួងរ៉ែ និងថាមពល ឈប់ទិញអ៊ីនធើណិត និងអគ្គិសនីពីប្រទេសថៃភ្លាមៗ បន្ថែមលើនេះខ្សែភាពយន្តថៃក៏ត្រូវបញ្ឈប់ការបញ្ចាំងនៅកម្ពុជាផងដែរ ហើយនៅព្រឹកថ្ងៃទី១៣ ខែមិថុនានេះកម្ពុជាក៏សម្រេចបិទច្រកព្រំដែនដូងស្ថិតក្នុងស្រុកកំរៀង ខេត្តបាត់ដំបង ដែលធ្វើឱ្យទំនិញថៃដែលបំរុងដឹកទៅវៀតណាមកកស្ទះផងដែរ៕