ព័ត៌មានជាតិ

រដ្ឋមន្ត្រីការងារ ៖ គិតត្រឹមថ្ងៃទី៣០មិថុនានេះ ពលករខ្មែរជិត៤ម៉ឺននាក់ ឆ្លងដែនពីប្រទេសថៃត្រឡប់មកស្រុកកំណើតវិញ

បានផុស

១ year មុន

នៅ

ថ្ងៃចន្ទ ៣០ មិថុនា ២០២៥

ដោយ

លោកហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអះអាងថា ចាប់តាំងពីថ្ងៃទី៨ ខែមិថុនា រហួតមកដល់ថ្ងៃទី៣០ ខែមិថុនា ឆ្នាំ២០២៥នេះ មានបងប្អូនពលរខ្មែរ ឆ្លងដែនតាមច្រកនានាត្រចូលមកប្រទេសកម្ពុជាវិញ ប្រមាណជិត៤ម៉ឺននាក់ ក្នុងនោះមានពលករជាង១ម៉ឺននាក់ បានចុះឈ្មោះស្វែងរកការងារធ្វើ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងឱកាសអញ្ជើញទទួលស្វាគមន៍ និងសួរសុខទុក្ខបងប្អូនប្រជាពលរដ្ឋជាពិសេស ពលករខ្មែរនៅច្រកព្រំដែនអន្តរជាតិដូង និងមណ្ឌលសំចតច្រកដូង ខេត្តបាត់ដំបងនៅថ្ងៃទិ៣០មិថុនានេះ លោករដ្ឋមន្ត្រីបានបន្តថា « សម័យតេជោក៏ដូចជាសម័យសម្តេចធិបតីកម្ពុជាមិនខ្វះទេការងារនៅក្នុងស្រុក។

អីចឹងពេលនេះបងប្អូនអាចវិលត្រឡប់មកវិញប្រសិនបើនៅទីនោះបងប្អូនត្រូវបានគេមិនស្វាគមន៍ ដើម្បីមករួមចំណែកអភិវឌ្ឍន៍ប្រទេសជាតិយើងវិញ។ ជាការពិតណាស់អ្វីដែលបងប្អូនគាត់ត្រឡប់មកវិញនេះ ដោយសារទទួលការទូទាត់ប្រាក់ខែមិនទៀងទាត់ ហើយការងារមិនលើសនៅកម្ពុជាប៉ុន្មានហើយមួយទៀតដោយសារការរឹតបន្តឹងការចុះធ្វើអធិការកិច្ចនៅតាមកន្លែងធ្វើការមួយចំនួនហើយក៏មានឃើញនូវការរើសអើងមើលងាយប៉ះពាល់ដល់កិត្តិយសប្រជាពលរដ្ឋយើងក៏ដូចជាប្រទេសជាតិយើង ហើយការព្រួយបារម្ភពីសន្តិសុខ ទើបធ្វើឱ្យបងប្អូនសម្រេចចិត្តវិលត្រឡប់មកប្រទេសកំណើតយើងវិញ ហើយគាត់ក៏ដឹងថា នៅស្រុកកំណើតមានការងារច្រើនដែរ»។

លោករដ្ឋមន្ត្រីបានបន្តទៀតថា ជាសរុបគិតត្រឹមថ្ងៃទី៨ខែមិថុនា រហូតមកដល់ឥឡូវនេះ មានពលករចូលមកកម្ពុជាជិត៤ម៉ឺននាក់ តាមច្រកអន្តរជាតិនានាហើយច្រើនជាងគេនៅខេត្តបាត់ដំបង បន្ទាយមានជ័យ ព្រៃវែង កំពង់ធំនិងសៀមរាប ក្នុងនោះមានអ្នកចុះស្វែងរកការងារធ្វើជាង១ម៉ឺននាក់។

លោករដ្ឋមន្ត្រីបានបន្ថែមថា ជាមធ្យមក្នុង១អាទិត្យកម្ពុជាមានតម្រូវការងារ២៥ម៉ឺនកន្លែងក្នុងនោះមាន២១ម៉ឺនកន្លែងការងារក្នុងរោងចក្រ ដែលមានភាពល្អប្រសើរដោយមានការធានាសុខភាព ធានាគ្រោះថ្នាក់ការងារនិងពេលចាស់ទៅមានប្រាក់រង្វាន់ទៀត។ចំណែកកម្មការិនីមានផ្ទៃពោះទទួលបានប្រាក់សម្រាប់ពិនិត្យផ្ទៃពោះពេលសម្រាលនិងក្រោយសម្រាលអត់អស់លុយហើយទទួលបានលុយបន្ថែមទៀត។

ឥឡូវនេះនៅគ្រប់ខេត្ត សុទ្ធតែមានការងារធ្វើទាំងអស់ គ្រាន់តែខេត្តខ្លះមានតម្រូវការផ្នែកកសិកម្ម ខ្លះទៀតមានតម្រូវការផ្នែកឧស្សាហកម្ម ឬ សេវាកម្ម។

ការងារដែលសម្បូរច្រើនជាងគេ គឺផ្នែកផលិតកម្មនៅតាមរោងចក្រដូចជាកាត់ដេរ ស្បែកជើង កាបូបនិងគ្រឿងសង្ហារឹមនិងអឡេត្រូនិច សរុប២១ម៉ឺននាក់។

លោករដ្ឋមន្ត្រីបានបញ្ជាក់ថា «សម្តេចតេជោក៏ដូចជាសម្តេចធិបតីបានណែនាំថា ប្រសិនបើបងប្អូនចង់ត្រឡប់ទៅស្រុកវិញមានរថយន្តជូនទៅស្រុកកំណើតទៅដល់មានអាជ្ញាធរជួយថែទាំ ហើយប្រសិនបើបងប្អូនចង់ធ្វើការងារភ្លាមអាចចុះឈ្មោះនៅទីភ្នាក់ងារជាតិនិងមុខរបរ តាមតំបន់សេដ្ឋកិច្ចពិសេស និងតាមក្រុមហ៊ុននានា។ បើចង់រៀនសិនអាចចុះឈ្មោះរៀនក៏បានដែរ»។

លើសពីនេះទៀត សម្តេចធិបតីបានណែនាំឱ្យក្រសួង សហការជាមួយអាជ្ញាធរមូលដ្ឋាន ចុះតាមស្រុកភូមិបន្ថែមទៀត ដើម្បីសាកសួរព័ត៌មានពលករ ដែលទើបវិលត្រឡប់ទៅស្រុកកំណើត តើគាត់ចង់រៀនជំនាញបន្ថែម ឬ ចង់ស្វែងរកការងារធ្វើដើម្បីធានាថា ពលករយើងមិនមានបញ្ហាក្រោយវិលត្រឡប់មកពីថៃ។

យ៉ាងនាក៏ដោយ លោករដ្ឋមន្ត្រីបានផ្ញើសារទៅពលករខ្មែរថា ប្រសិនបើមានការដកហូតយកលិខិតឆ្លងដែន ឯកសារធ្វើដំណើរឬអត្ថសញ្ញាណបណ្ណពីបងប្អូនដែលជាជាទង្វើខុសច្បាប់សូមបងប្អូន ប្តឹងទៅស្ថានទួតរបស់យើងជួយអន្តរគមន៍ តែបងប្អូនអាចវិលត្រឡប់មកវិញ ដោយមិនចាំបាច់មានឯកសារអ្វីឡើយឱ្យតែជាជនជាតិខ្មែររាជរដ្ឋាភិបាលយើងស្វាគមន៍ និង ធ្វើឯកសារជូនបងប្អូនផងដែរ៕

អត្ថបទ ៖ សំអឿន