ឆ្នាំនេះមណ្ឌលភ្នំពេញ មានបេក្ខជនដាក់ពាក្យប្រឡងឌីប្លូម​ថយចុះជាងឆ្នាំមុន

សម្រាប់ឆ្នាំនេះនៅមណ្ឌលប្រឡងរាជធានីភ្នំពេញ មានបេក្ខជនដាក់ពាក្យប្រឡងសញ្ញាបត្រមធ្យមសិក្សា បឋមភូមិឬឌីប្លូមប្រមាណជាង ១ ម៉ឺន ៧ ពាន់នាក់ មានការថយចុះបើធៀបទៅនឹងឆ្នាំមុនដែលមានបេក្ខជនដាក់ពាក្យរហូតដល់​ទៅជាង ១ ម៉ឺន ៨ ពាន់នាក់។

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ បានឱ្យដឹងនៅព្រឹកថ្ងៃទី ០៥កក្តដានេះថាឆ្នាំនេះ ក្រសួងអប់រំ យុវជន និងកីឡានឹងរៀបចំប្រឡងឌីប្លូមនៅថ្ងៃទី១៤ កក្កដា និងប្រកាសលទ្ធផលនៅថ្ងៃទី២១ ខែកក្កដា ឆ្នាំ២០២៥។

សម្រាប់នៅមណ្ឌលប្រឡងរាជធានីភ្នំពេញ មានបេក្ខជនដាក់ពាក្យចូលរួមប្រឡងសរុប ១៧ ៥៨០ នាក់ ស្រី ៨ ៩០៣ នាក់ មកពីគ្រឹះស្ថានមធ្យមសិក្សាសាធារណៈ និងឯកជនមួយចំនួនចែកជា ៦៥ មណ្ឌល ត្រូវជា ៧៤០ បន្ទប់។ តួលេខនេះ​បើធៀបទៅនឹងឆ្នាំមុនឃើញថា មានការថយចុះគួរឱ្យកតសម្គាល់ ខណៈឆ្នាំមុនមានបេក្ខជនដាក់ពាក្យចំនួន ១៨ ៥២៦ នាក់ ស្រី ៩៤៩៨ នាក់ចែកជា ៦៨ មណ្ឌលត្រូវជា ៧៧៧ បន្ទប់។

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានផ្តាំផ្ញើឱ្យប្អូនៗសិស្សានុសិស្សបន្តខិតខំរៀន រក្សាសុខភាពឱ្យបានល្អ និងតាមដានព័ត៌មានទាក់ទងនឹងការប្រឡងក៏ដូចជាបទបញ្ញត្តនានារបស់ក្រសួងអប់រំ និងសាលារៀន។

លោកស្រីបានបន្តថា ក្រសួងអប់រំ នៅតែបន្តប្រគល់សិទ្ធិអំណាច និងការទទួលខុសត្រូវទាំងស្រុងជូនគ្រឹះស្ថានមធ្យមសិក្សានីមួយៗ រៀបចំការប្រឡងចាប់តាំងពីការរៀបចំវិញ្ញាសាដំណើរការសំណេរកំណែ ស្រង់បូកពិន្ទុ និងប្រកាសលទ្ធផលនៅតាមគ្រឹះស្ថានមធ្យមសិក្សានីមួយៗ។

មន្ទីរអប់រំ យុវជន និងកីឡាមានភារកិច្ចបញ្ជូនមន្ត្រីជំនាញ ដើម្បីត្រួតពិនិត្យតាមមណ្ឌលប្រឡងមួយចំនួន ក្នុងករណីចាំបាច់ និងមានភារកិច្ចចេញវិញ្ញាបនបត្របណ្ដោះអាសន្នមធ្យមសិក្សាបឋមភូមិជូនដល់បេក្ខជនទាំងអស់ដែលប្រឡងជាប់៕

អត្ថបទ ៖ សំអឿន