បណ្ឌិត អូស្មាន ហាស្សាន់៖ ទុក្ខលំបាករបស់ប្រជាជន គឺជាក្ដីកង្វល់ និងត្រូវរួមគ្នាយកចិត្តទុកដាក់

​​​​​​​​​​​លោកបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស លើកឡើងថា ទុក្ខលំបាករបស់ប្រជាពលរដ្ឋ ទោះបីនៅទីកន្លែងណាពេលណាក៏ដោយ គឺជាទុក្ខលំបាករបស់យើងទាំងអស់គ្នា ដែលត្រូវការនូវការយកចិត្តទុក្ខដាក់ជួយ និងចែករំលែកគ្នាទៅវិញទៅមកក្នុងគ្រាលំបាក ដោយឈរលើស្មារតីរួបរួមសាមគ្គី ជួយទុក្ខធុរៈគ្នា ហើយរាជរដ្ឋាភិបាល និងអាជ្ញាធរគ្រប់លំដាប់ថ្នាក់ តែងតែគិតគូរដោះស្រាយពីទុក្ខលំបាកនោះ ដោយមិនទៅណាចោលឡើយ។

ក្នុងឱកាសសួរសុខទុក្ខ និងចែកគ្រឿងឧបភោគបរិភោគដល់គ្រួសារជនភៀសសឹកពីតំបន់មានជម្លោះកម្ពុជា-ថៃ ជាង១ ០០០គ្រួសារ ដែលកំពុងស្នាក់នៅទីតាំងសុវត្ថិភាពក្នុងស្រុកវ៉ារិន ខេត្តសៀមរាប នាព្រឹកថ្ងៃទី២៩ ខែកក្កដានេះ បណ្ឌិត អូស្មាន ហាស្សាន់ បានលើកទឹកចិត្ត និងអរគុណដល់គ្រួសារដែលមានកូន មានប្តីជាកងទ័ពកំពុងបំពេញភារកិច្ចឈរជើងនៅតាមក្រវាត់ព្រំដែន ដែលលះបង់សាច់ស្រស់ឈាមស្រស់ និងស្មារតីមោះមុត ដើម្បីការពារអធិបតេយ្យភាព និងបូរណភាពទឹកដីពីការឈ្លានពានរបស់ប្រទេសជិតខាង។

លោកទេសរដ្ឋមន្ត្រី មានប្រសាសន៍ថា ប្រជាពលរដ្ឋកម្ពុជាគ្រប់រូប មានកាតព្វកិច្ច និងមានសិទ្ធិការពារបូរណភាពទឹកដីរបស់យើង ហើយកម្ពុជាគ្រាន់តែចង់រក្សាការពារនូវអ្វីដែលជាកេរដូនតាខ្មែរដែលនៅសល់បច្ចុប្បន្នឱ្យស្ថិតស្ថេរគង់វង្សមិនចង់បានរបស់អ្នកណាទេ។ ជាក់ស្ដែងប្រមុខដឹកនាំកម្ពុជា សម្តេចតេជោ ហ៊ុនសែន និងសម្តេចធិបតី ហ៊ុន ម៉ាណែត បានខិតខំបញ្ចៀសមិនឱ្យមានកើតមានសង្គ្រាមកើតឡើងឡើយ ប៉ុន្តែដោយមានការឈ្លានពានពីប្រទេសជិតខាង គឺបង្ខំកម្ពុជាប្រើសិទ្ធិតបត ដើម្បីការពារទឹកដីរបស់ខ្លួន។

លោកបន្តថា សង្គ្រាមបានបង្កនូវ​​​​​​​​​​​​​​​​វិនាសកម្មច្រើន មិនថាអាយុជីវិតមនុស្ស សត្វ ទ្រព្យសម្បត្តិ ផ្ទះសម្បែង សាលារៀន វត្តអារាម និងហេដ្ឋារចនាសម្ព័ន្ធផ្សេងៗ។ យ៉ាងណាក៏ដោយ លោកថា ពលរដ្ឋត្រូវជឿជាក់លើប្រមុខរាជរដ្ឋាភិបាល។ លោកបណ្ឌិត ក៏សូមថ្លែងអំណរគុណ និងកោតសរសើរដល់ទឹកចិត្តរបស់ប្រជាពលរដ្ឋដែលជាសប្បុរសជន ក្នុងនាមខ្មែរជួយខ្មែរ ដែលបានចែករំលែកនូវក្ដីស្រឡាញ់ ជួយទុក្ខធុរៈគ្នាគ្រាដែលប្រទេសជាតិមានសង្គ្រាមបែបនេះ៕

ដោយ៖ គឿនវេត