ព័ត៌មានជាតិ

កម្ពុជាប្រាប់ថៃកុំឱ្យដើរល្បាតចូលដីខ្មែរតទៅទៀត

បានផុស

១១ ខែ មុន

នៅ

ថ្ងៃអង្គារ ២៩ កក្កដា ២០២៥

ដោយ

មេភូមិភាគ៤កម្ពុជាឧត្តមសេនីយ៍ឯក ពៅ ហេង បានប្រាប់ទៅមេភូមិភាគ២របស់ថៃ លោក Boonsin Padklang ហាមកងទ័ពរបស់ខ្លួនកុំឱ្យដើរល្បាតចូលដីខ្មែរតទៅទៀត បន្ទាប់ពីប្រទេសទាំងពីរបានឈានចូលដល់បទឈប់បាញ់កាលពីយប់ម៉ោង១២ ថ្ងៃទី២៨ ខែកក្កដា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្នីសិទសារព័ត៌មាននៅរសៀលថ្ងៃទី២៩ ខែកក្កដា ឆ្នាំ២០២៥ អ្នកនាំពាក្យក្រសួងការពារជាតិលោកស្រីឧត្តមសេនីយ៍ឯក ម៉ាលី សុជាតា បានលើកឡើងថា ក្នុងជំនួបនៅអូស្មាច់ថ្ងៃទី២៩ ខែកក្កដា នេះភាគីកម្ពុជាបានប្រាប់ថៃឱ្យគោរពឱ្យបានម៉ឺងម៉ាតចំពោះបទឈប់បាញ់ និងត្រូវហាមកងទ័ពរបស់ខ្លួនកុំឱ្យដើរល្បាតចូលដីខ្មែរបន្តទៀត។ ជាមួយគ្នានោះលោកក៏បញ្ជាក់ទៅលោក Boonsin Padklang កុំឱ្យចល័តទ័ពនិងសព្វាវុធ និងមិនត្រូវបាញ់មកលើទ័ពកម្ពុជាដែលបញ្ជូនទៅព្យាបាលរបួស ត្រូវសួរបញ្ជាក់និងជូនដំណឹងគ្នាជាមុន។

អ្នកនាំពាក្យក្រសួងការពារជាតិលោកស្រី ម៉ាលី សុជាតា ក៏បានបញ្ជាក់ថាភាគីថៃបានឆ្លើយតបទទួលយកផងដែរ។

ការប្រយុទ្ធគ្នារវាងថៃនិងកម្ពុជាផ្ដើមចេញពីសកម្មភាពរបស់ថៃដើរល្បាតខុសតម្រាយផ្លូវចាស់ចូលដីកម្ពុជាផ្ទុះមីនដាច់ជើងទាហានថៃជាបន្តបន្ទាប់ រហូតមេភូមិភាគ២ថៃលោក Boonsin Padklang ប្រកាសដាក់តំបន់ប្រាសាទតាមាន់ធំ តាក្របី និងតំបន់មួយចំនួនទៀតវាតទីយកជារបស់ខ្លួន និងរាយបន្លាលួសព័ទ្ធយកនៅព្រឹកថ្ងៃទី២៤ ព្រមទាំងបាញ់មកលើកងទ័ពកម្ពុជា។ ក្រោយហេតុការណ៍នោះការប៉ះទង្គិចដោយប្រដាប់អាវុធរវាងប្រទេសទាំងពីរបានផ្ទុះឡើងទ្រង់ទ្រាយធំ រហូតដល់មានការអន្តរាគមន៍ពីប្រធានអាស៊ាន និងប្រធានាធិបតីអាមេរិកផងដែរ។ បទឈប់បាញ់មួយបានធ្វើឡើងនៅម៉ោង១២យប់ថ្ងៃទី២៨ ខែកក្កដា ៥ថ្ងៃបន្ទាប់ពីការផ្ទុះអាវុធ៕

អត្ថបទដោយ ហ៊ុន សិរីវឌ្ឍន៍

Related Topics:ជម្លោះព្រំដែនកម្ពុជា-ថៃ