ព័ត៌មានជាតិ

អ្នកនាំពាក្យការបរទេសអំពាវនាវទៅថៃឱ្យមានវិជ្ជាជីវៈក្នុងការធ្វើទំនាក់ទំនងសាធារណៈ

បានផុស

១០ ខែ មុន

នៅ

ថ្ងៃសុក្រ ៨ សីហា ២០២៥

ដោយ

អ្នកនាំពាក្យក្រសួងការបរទេសលោក ជុំ សុន្ទរី បានអំពាវនាវដល់អាជ្ញាធរថៃឱ្យអត់ធ្មត់ និងមានវិជ្ជាជីវៈក្នុងកិច្ចការទំនាក់ទំនងសាធារណរបស់ខ្លួន ចៀសវាងការចេញសេចក្ដីថ្លែងការណ៍ដែលគ្មានមូលដ្ឋានសំអាង និងគំរាមកំហែងដល់សន្ដិភាពដែលមានភាពផុយស្រួយបច្ចុប្បន្ន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្នីសិទសារព័ត៌មានល្ងាចថ្ងៃទី៨ ខែសីហា ឆ្នាំ២០២៥ លោក ជុំ សុន្ទរី បានច្រានចោលការចោទប្រកាន់របស់យោធាថៃដែលថាកម្ពុជាកំពុងធ្វើសង្គ្រាមព័ត៌មានមិនពិតជាមួយខ្លួន។ លោកថាការចោទប្រកាន់នេះគឺគ្មានមូលដ្ឋាន និងបង្កការរាំងស្ទះដល់កិច្ចខិតខំប្រឹងប្រែងនៃកិច្ចសន្ទនា និងស្ថេរភាពនាពេលបច្ចុប្បន្ននេះ។

លោកថា៖ «ការចោទប្រកាន់ថាកម្ពុជាចូលរួមក្នុងការចរចារដោយចេតនាអាក្រក់វាមិនត្រឹមតែមិនសមហេតុសមផលប៉ុណ្ណោះទេ! តែវាក៏ធ្វើឱ្យប៉ះពាល់ដល់ស្មារតីនៃកិច្ចសហប្រតិបត្តិការ»។

លោកអំពាវនាវដល់អាជ្ញាធរថៃឱ្យប្រកាន់នូវភាពអត់ធ្មត់ និងមានវិជ្ជាជីវៈក្នុងការទំនាក់ទំនងជាសាធារណរបស់ខ្លួនដោយចៀសវាងក្នុងការចេញផ្សាយនូវសេចក្ដីថ្លែងការណ៍ដែលគ្មានមូលដ្ឋានសំអាង និងគំរាមកំហែងដល់សន្ដិភាពដ៏ផុយស្រួល ហើយនឹងទំនាក់ទំនងទ្វេរភាគីរបស់ប្រទេសទាំងពីរ។

លោក ជុំ សុន្ទរី បានបញ្ជាក់ពីជំហររបស់កម្ពុជាក្នុងការដោះស្រាយរាល់បញ្ហាទាំងអស់តាមមធ្យោបាយសន្ដិវិធីដោយគោរពគ្នាទៅវិញទៅមក ច្បាប់អន្តរជាតិ និងគោលការណ៍នានារបស់អាស៊ាន។

កម្ពុជានិងថៃទើបតែសម្រេចបាននូវកិច្ចព្រមព្រៀងកិច្ចប្រជុំគណៈកម្មាធិការព្រំដែនទូទៅ (GBC) កាលពីថ្ងៃទី៧ ខែសីហា ឆ្នាំ២០២៥ ដោយបានសម្រេចនូវការសន្យា១៣ចំណុចក្នុងនោះក៏មានការចៀសវាងនូវការបង្កើតព័ត៌មានក្លែងក្លាយដែលធ្វើឱ្យស្ថានភាពតានតឹងឡើងវិញផងដែរ៕

អត្ថបទដោយ ហ៊ុន សិរីវឌ្ឍន៍

Related Topics:ជម្លោះព្រំដែនកម្ពុជា-ថៃ