អ្នកនាំពាក្យអប់រំ អះអាងថា មិនមានការបែកធ្លាយវិញ្ញាសាអំឡុងពេលប្រឡងបាក់ឌុបរយៈពេល២ថ្ងៃ

អ្នកនាំពាក្យក្រសួងអប់រំ យុវជន និងកីឡា លោកស្រី ឃួន វិច្ឆិកា​ បានអះអាងថា មិនមានការបែកធ្លាយវិញ្ញាសាទេ អំឡុងពេលប្រឡងសញ្ញាបត្រមធ្យមសិក្សាទុតិយភូមិរយៈពេលពីរថ្ងៃ។ ការបញ្ជាក់នេះបានធ្វើឡើងបន្ទាប់ពីមានការជជែកដេញដោលគ្នាតាមប្រព័ន្ធផ្សព្វផ្សាយសង្គម ដោយអ្នកខ្លះអះអាងថា បែកធ្លាយវិញ្ញាសា រូបវិទ្យា គីមីវិទ្យា ហើយអ្នកខ្លះទៀតថា បែកធ្លាយគណិតវិទ្យា។

ដើម្បីបំភ្លឺជូនសាធារណជន និងបេក្ខជន លោកស្រី ឃួន វិច្ឆិកា ប្រាប់កម្ពុជាថ្មីនៅព្រឹកថ្ងៃទី ៣០ ខែសីហានេះថា៖« មិនមានការបែកធ្លាយវិញ្ញាសារទេ។ ការបង្ហោះនេះគឺធ្វើឡើងក្រោយពេលការប្រឡងមុខវិជ្ជាគណិតវិទ្យាបានដំណើរការរួច»។ លើសពីនេះ ក្រសួងកំពុងសិក្សាស្រាវជ្រាវបន្ថែម។

គួរជម្រាបថា​ មុនការប្រឡងមួយថ្ងៃពោលនៅថ្ងៃទី ២៧ ខែសីហា ក្រសួងអប់រំ បានចេញសេចក្តីណែនាំស្តីពីការហាមឃាត់ការបង្ហោះប្រធានវិញ្ញាសា ក្នុងដំណើរការសំណេរ សម្រាប់ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ២៨ សីហា ២០២៥។

ដើម្បីធានាបាននូវគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន និងចៀសវាងការដាក់ និងទទួលទណ្ឌកម្មនានា ចំពោះបេក្ខជន អនុរក្ស គណៈមេប្រយោគ និងគណៈកម្មការនានា ព្រមទាំងសាធារណជន ក្នុងអំឡុងពេលដំណើរការសំណេរ ក្រសួងអប់រំ បានធ្វើការណែនាំដល់បេក្ខជន អនុរក្ស គណៈមេប្រយោគ ប្រធានមណ្ឌលប្រឡង និងគណៈកម្មការនានានូវបំរាមមួយចំនួន។

ក្រសួងណែនាំថា មិនត្រូវសរសេរ ឬថតចម្លងប្រធានវិញ្ញាសានៃការប្រឡងសញ្ញាបត្រមធ្យមសិក្សាទុតិយភូមិ តាមគ្រប់ រូបភាព ដើម្បីបង្ហោះចែកចាយនៅតាមបណ្តាញសង្គមនានា ហើយការបង្ហោះប្រធានវិញ្ញាសាលើបណ្តាញសង្គមនានា ជាអំពើហាមឃាត់។

បើតាមអ្នកនាំពាក្យដដែល ទោះបីជាមានភ្លៀងធ្លាក់ខ្លាំងនៅទូទាំងរាជធានី-ខេត្តមួយចំនួនក៏ដោយ ការប្រឡងសញ្ញាបត្រមធ្យមសិក្សាទុតិយភូមិ រយៈពេលពីរថ្ងៃ បានប្រព្រឹត្តទៅតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន និងស្របតាមគោលការណ៍ “អ្នកចេះគឺជាប់”៕