​ជនរងគ្រោះ​ ៤ នាក់​ត្រូវឆ្កែ​ចចកខាំ​ ពេទ្យតម្រូវ​ឱ្យចាក់ថ្នាំ ៥​ ម្ជុល តាមការណាត់​

ស្ថានភាពសុខភាពរបស់ជនរងគ្រោះ ៤ នាក់ ដែលត្រូវឆ្កែចចកព្រៃខាំ នៅស្រុកបិបូណ៌នោះ កាលពីព្រឹកថ្ងៃទី ៤ ខែឧសភា ២០២២ បានធូរស្រាលហើយ បន្ទាប់ពីបានចាក់ថ្នាំ ២ ម្ជុលនៅមន្ទីរពេទ្យឯកជន ដែលចាក់១ ម្ជុលត្រូវចំណាយ ១០ ម៉ឺនរៀល។

ជនរងគ្រោះទាំង ៤ នាក់​ បានសំណូមពរឱ្យអាជ្ញាធរ និងសប្បុរសជនជួយ​ឧបត្ថម្ភថវិកា ដើម្បីបានចាក់ថ្នាំឆ្កែខាំ ដោយ​សារតែពេទ្យតម្រូវឱ្យចាក់ថ្នាំឆ្កែខាំ ៥ ម្ជុលក្នុងតម្លៃ ១០ ម៉ឺនរៀល ក្នុងមួយម្ជុល។

នៅព្រឹកថ្ងៃទី ២៤ ខែឧសភា មានសត្វចចកព្រៃមួយក្បាលបានរត់ចូលភូមិហើយបានដេញខាំប្រជាពលរដ្ឋក្នុងភូមិបណ្ដាលឱ្យរងគ្រោះរបួស ០៤នាក់គឺ ឈ្មោះ យោត សាឯម អាយុ ២៧ ឆ្នាំ ភេទស្រី ជាកម្មកររោងចក្រ របួសជើង និងដៃ ឈ្មោះ បិល សុចិន អាយុ៣២ ឆ្នាំភេទស្រី របួសដៃ ឈ្មោះ ទឿន ចំណាន អាយុ ១៧ ឆ្នាំ ភេទស្រី ជាកម្មកររោងចក្រ របួសដៃ និងកុមាររ៉ា ឈ្មោះ សុច សុវីន អាយុ ១៣ ឆ្នាំ របួសដៃ។

តាមតារាងកាលវិភាគថ្ងៃចាក់ គឺនៅថ្ងៃទី ២៤ ២៧ ៣១ ខែឧសភា និងថ្ងៃទី ០៧ និង២១ ខែមិថុនា។ ដោយឡែកនៅថ្ងៃទី២៤ និងថ្ងៃទី ២៧ នេះពួក គាត់បានចាក់ថ្នាំឆ្កែខាំនេះរួចហើយ ដោយបានខ្ចីប្រាក់ពីបងប្អូនអ្នកស្រុកភូមិ។ ដូច្នេះត្រូវចាក់ ៣ លើកទៀតមិនដឹងថាអាចរកប្រាក់បានចាក់ថ្នាំនេះដែរឬអត់នោះទេ ហេតុនេះមានតែសំណូមពរដល់អាជ្ញាធរស្រុកខេត្ត និងសប្បុរសជនជួយឧបត្ថម្ភថវិកា។

ប្រធានមន្ទីរសុខាភិបាល ខេត្តកំពង់ឆ្នាំង លោក ប្រាក់ វ៉ុន ប្រាប់ថា ថ្នាំដែលពួកគាត់ត្រូវចាក់នោះ គឺថ្នាំឆ្កែឆ្កួត ប៉ុន្តែនៅក្នុងខេត្តមិនមានថ្នាំសម្រាប់ចាក់ឆ្កែឆ្កួតខាំនោះតេ មានតែនៅវិទ្យានប៉ាស្ទ័រ រាជធានីភ្នំពេញ៕

អត្ថបទ៖ ឈៀងថារិទ្ធ