ស្នងការរាជធានីច្រានចោលការផ្សព្វផ្សាយវីដេអូសកម្មភាពតវ៉ាបិទផ្លូវ៦០ម៉ែត្រជាព័ត៌មានមិនពិត

ស្នងការដ្ឋាននគរបាលរាជធានីភ្នំពេញ នៅរសៀលថ្ងៃទី១៦ ខែសីហា ឆ្នាំ២០២៤ បានចេញមុខច្រានចោលនៃការផ្សព្វផ្សាយព័ត៌មានមិនពិតរបស់ខោនតិកតុកក្លែងក្លាយមួយពីការតវ៉ាបិទផ្លូវ៦០ម៉ែត្រ។ ការចេញមុខច្រានចោលនេះ គឺធ្វើឡើងបន្ទាប់ពីអាខោនតិកតុក(TIKTOK)ឈ្មោះ (ខ្មែរសាមគ្គី)ដែលជាអាខោន(TIKTOK)ក្លែងក្លាយតែងតែផ្សព្វផ្សាយព័ត៌មានមិនពិតបំពុលសង្គមធ្វើឲ្យមហាជនមានការយល់ច្រឡំ។

តាមការបញ្ជាក់របស់ក្រុមការងារព័ត៌មាន និងប្រត្តិកម្មរហ័សនៃស្នងការដ្ឋាននគរបាលរាជធានីភ្នំពេញ បានឲ្យដឹងថា អាខោនតិចតុកនេះបានយករូបភាពវីដេអូ១ឃ្លីបជារូបភាពចាស់កើតឡើងកាលពីថ្ងៃ៣០ខែមិថុនា ឆ្នាំ២០២៤ កន្លងទៅនេះ នៅចំណុចផ្លូវ៦០ម៉ែត ក្នុងខណ្ឌដង្កោ រឿងវិវាទដីធ្លីរបស់ប្រជាពលរដ្ឋ០១ក្រុមមានមនុស្សចូលរួម១៣៥នាក់ ជាមួយក្រុមហ៊ុន(ING) ដោយតវ៉ាបិទផ្លូវក្នុងកំឡុងពេលនោះ ហើយអាជ្ញាធររាជធានីភ្នំពេញចេញទៅសម្របសម្រួលដោះស្រាយ នាំឱ្យប្រជាពលរដ្ឋបានរំសាយទៅលំនៅដ្ឋានវិញរៀងៗខ្លួននៅថ្ងៃដដែលនោះដែរ។

ក្រុមការងារព័ត៌មាន និងប្រត្តិកម្មរហ័សនៃស្នងការដ្ឋាននគរបាលរាជធានីភ្នំពេញ បញ្ជាក់បន្ថែមថា នៅចំណុចផ្លូវ៦០ម៉ែត្រនៅថ្ងៃទី១៦ ខែសីហា ឆ្នាំ២០២៤ មានប្រជាពលរដ្ឋធ្វើដំណើរប្រកបមុខរបររកស៊ីជាធម្មតាមិនមានអ្វីកើតឡើងនោះទេ។ ជាមួយគ្នានេះ ក្រុមការងារ និងប្រត្តិកម្មរហ័សនៃស្នងការដ្ឋាននគរបាលរាជធានីភ្នំពេញ ក៏សូមថ្កោលទោសដាច់អហង្ការចំពោះក្រុមជនអគតិតែងតែមានគំនិតទុច្ចរិតផ្សព្វផ្សាយព័ត៌មានមិនពិតដើម្បីញុះញង់បង្កឱ្យមានការចលាចលក្នុងសង្គម និងបានឱ្យសមត្ថកិច្ចជំនាញស្រាវជ្រាវជាបន្ទាន់នាំយកជនទុច្ចរិតទាំងនេះយកមកអនុវត្តតាមផ្លូវច្បាប់ផងដែរ៕

អត្ថបទ៖ សុខុម