អាជ្ញាធរខណ្ឌចំការមន ចុះរុះរើរបងស័ង្កសីមួយកន្លែងដើម្បីបើកជាផ្លូវមួយខ្សែបញ្ចៀសការកកស្ទះចរាចរណ៍

អាជ្ញាធរចំការមន ដឹកនាំដោយលោក អាំង សិរីពិសិដ្ឋ អភិបាលរងនៃគណៈអភិបាលខណ្ឌចំការមន និងលោក ម៉ៅ ណូលី ប្រធានការិយាល័យសាធារណៈការខណ្ឌ និងមន្រ្តីក្រោមឪវាទកាលពីព្រឹកថ្ងៃទី៣ ខែធ្នូ ឆ្នាំ២០២៤ បានចុះត្រួតពិនិត្យ និងរុះរើរបងស័ង្កសីមួយកន្លែងដែលសង់បិទផ្លូវភ្ជាប់រវាងផ្លូវលេខ៤៥៤ និងផ្លូវលេខ៤៣០ ក្នុងសង្កាត់ទួលទំពូងទី២ ដើម្បីបើកជាផ្លូវមួយខ្សែបញ្ចៀសការកកស្ទះចរាចណ៍។

លោក អាំង សិរីពិសិដ្ឋ អភិបាលរងខណ្ឌចំការមន បានអោយដឹងថា ដោយមានការយកចិត្តទុកដាក់ យល់សុខទុក្ខប្រជាពលរដ្ឋ លោក កៀង លក្ស័ អភិបាលខណ្ឌ បានបញ្ជារអោយលោកចុះដឹកនាំមន្រ្តីជំនាញពាក់ព័ន្ធ មកធ្វើការត្រួតពិនិត្យចំណុចផ្លូវនេះ ដើម្បីជួយកាត់បន្ថយសម្រួលចរាចរណ៍ទៅដល់ការធ្វើដំណើររបស់ប្រជាពលរដ្ឋដែលរស់នៅក្នុងតំបន់ និងអ្នកឆ្លងកាត់។

លោកអភិបាលរង បានបន្ថែមថា ចំពោះការចុះរុះរើនេះ មិនមានប្រជាពលរដ្ឋណាម្នាក់ដាក់ពាក្យប្តឹងអោយរដ្ឋបាលខណ្ឌចុះមកនោះឡើយ គឺដោយសារអាជ្ញាធរមើលឃើញពីការកកស្ទះចរាចរណ៍ខ្លាំង ទើបអាជ្ញាធរសម្រេចដាក់គ្រឿងចក្រឈូសឆាយបង្ហាប់ដីចាក់ថ្មក្រួសអោយប្រជាពលរដ្ឋអាចធ្វើដំណើរឆ្លងកាត់ជាបណ្តោះអាសន្ន និងលើកគម្រោងអភិវឌ្ឍន៍ភូមិឃុំសង្កាត់០៣ឆ្នាំរំកិល ដើម្បីចាក់បេតុថផ្លូវខាងលើនេះមួយខ្សែថែមទៀត៕

អត្ថបទ៖ រដ្ឋា