ករណីទឹកស្អាតអស់ជាង៤លានក្នុងមួយខែត្រូវបាន​បញ្ចប់ក្រោមការអន្តរាគមន៍ពីអភិបាលខេត្ត

ដោយមានការអន្តរាគមន៍​សម្របសម្រួលពីលោក​ វ៉ី​ សំណាង​ អភិបាលនៃគណៈអភិបាលខេត្តតាកែវ​ មន្ត្រីជំនាញពាក់ព័ន្ធ​ និងលោកមេឃុំលំចង់​ លេីករណីថ្លៃទឹកស្អាតពលរដ្ឋមួយគ្រួសារប្រេីប្រាស់អស់ជាង៤លានរៀល​ក្នុងមួយខែ​ ខុសប្រក្រតី​ ពេលនេះត្រូវបានបញ្ចប់​ ដោយសេវាករយល់ព្រមបញ្ចុះតម្លៃមកត្រឹម១៥ម៉ឺនរៀលវិញ។

រសៀលថ្ងៃទី១៧​ ខែធ្នូ​ ឆ្នាំ២០២៤​ អតិថិជន​បានយល់ព្រមបង់លុយថ្លៃទឹក១៥ម៉ឺនរៀលដេីម្បីបញ្ចប់រឿងដល់សេវាករក្រុមហ៊ុនទឹកស្អាត​ សំណាងឌីណា​ លំចង់​ ស្រុកសំរោង​ ខេត្តតាកែវ​ ក្រោយមានការតវ៉ាគ្នាយ៉ាងចម្រូងចម្រាស​ព្រោះតែវិក្កយបត្រចេញឱ្យអតិថិជនប្រេីប្រាស់ទឹកស្អាតមួយខែអស់ទឹកប្រាក់​៤,០១១,២០០លាន​។​

ក្រោយបែកធ្លាយករណីនេះឡេីង​ មន្ទីរឧស្សាហម្មវិទ្យាសាស្ត្រ​ បច្ចេកវិទ្យានិងនាវានុវត្តន៍​ ខេត្តកែវបានចេញសេចក្តីបំភ្លឺភ្លាមៗដែរថា​ ជាករណីខុសបច្ចេកទេស​ មានដូចជា​ ធ្លាយទុយោ​កប់ក្នុងដី​ គ្រួសារខ្លះបេីកទឹកចោលភ្លេចបិទ​ ផ្ទះខ្លះកុងទ័រទឹកនៅក្នុងរបង​ ពិបាក់ក្នុងការឱ្យបុគ្គលិកចូលកត់លេខជាដេីម​(បំភ្លឺខុសពីការបកស្រាយរបស់ថៅកែទឹកហេីយ)​។

ដោយឡែក​លោក ដា ហៅម៉ាប់ ថៅកែទឹកស្អាត សំណាងឌីណាលំចង់ បានបកស្រាយថា​ ករណីអតិថិជនមួយគ្រួសារប្រេីទឹកអស់ថ្លៃជាង៤លាននោះ​ គាត់ពន្យល់ថា ករណីនេះ កើតឡើងពីបុគ្គលិកគាត់ដែលអ្នកដើរកត់កុងទ័រទឹកតាមផ្ទះធ្វើការប្រហែស ដោយមិនបានចុះស្រង់កុងទ័រទឹកតាមផ្ទះរបស់អតិថិជនតាមផ្ទះទេ តែបែរជាចេញវិក្កយបត្រស្មានៗ រយៈពេល២ឆ្នាំមកហើយ។ ហេតុនេះ ទើបគាត់ ចេញវិក្កយបត្រសរុបឃើញត្រូវបង់ ៤លានរៀល ជាង៕​

អត្ថបទ៖ វីរៈ