កីឡា

អ្នកស្រី ទូច គិមសៀន ម្ដាយ ឆុង វិសាល ដឹងថាប្រកួតដំបូងកូនប៉ះថៃភ័យបន់អស់ហើយឲ្យឈ្នះ

បានផុស

៩ ខែ មុន

នៅ

ថ្ងៃពុធ ២៩ តុលា ២០២៥

ដោយ

ម្ដាយរបស់កីឡាករ ឆុង វិសាល ដឹងថាប្រកួតបើកឆាកដំបូងកូនប៉ះថៃគឺភ័យបារម្ភ និងបន់ស្រន់ដូនតាអស់ហើយឲ្យបានឈ្នះដើម្បីឡើងទៅវគ្គបន្ត នៃព្រឹត្តិការណរ៍កីឡាយុវជនអាស៊ី ឆ្នាំ២០២៥ ដែលធ្វើនៅបារ៉ែនអំឡុងពេលនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី ទូច គិមសៀន និងកូន

អ្នកស្រី ទូច គិមសៀន ដែលជាម្ដាយរបស់ ឆុង វិសាល បានឲ្យដឹងថា ចំពោះការចេញទៅប្រកួតរបស់កូនប្រុសលើកនេះគឺបារម្ភពីកូនខ្លាំង ព្រោះរាល់ការប្រកួតតែងតែទៅមើល ឬជួយលើកទឹកចិត្តជានិច្ចកន្លងទៅ។

ម្ដាយរបស់ ឆុង វិសាល រូបនេះបន្តទៀតថា បើកឆាកប្រកួតដំបូងប៉ះថៃទៀតគឺរឹតតែបារម្ភ និងភ័យថែមទៀតដោយសារដឹងថាកីឡាករមកពីប្រទេសនេះភាគច្រើនល្អ និងដឹងពីសមត្ថភាព ឬកីឡាករខ្មែរច្រើន។ ការប្រកួតនេះគឺអ្នកស្រីបន់ស្រន់ដូនតាអស់ហើយដើម្បីជួយឲ្យកូនឈ្នះការប្រកួតប៉ះថៃនេះ។ ការប្រកួតប៉ះថៃនេះអ្នកស្រីមិនហ៊ានមើលការប្រកួតនេះឡើយទាល់តែឪពុកក្មេកប្រាប់ថាឈ្នះហើយទើបបានមើលឡើងវិញ។

កីលាករ ឆុង វិសាល

អ្នកបន្ទាយមានជ័យរូបនេះលើកឡើងទៀតថា ពីមួយប្រកួតទៅប្រកួតរបស់កូនគឺអ្នកស្រីបានទាក់ទងទៅកូនជាប់ជានិច្ច និងអាណិតកូនខ្លាំងដោយសារតែដឹងដំណឹងមកថាឈឺខ្លួនអស់ហើយ ព្រោះប្រកួតជាប់ៗគ្នាពេក។ អ្នកស្រីបានលើកទឹកចិត្តកូនឲ្យបន្តខំប្រឹងបន្ថែមទៀត ព្រោះជាការប្រកួតសំខាន់ និងតំណាងប្រទេសជាតិដូចនេះត្រូវតែតស៊ូរហូតបញ្ចប់ការប្រកួត។

ឆុង វិសាល និងក្រុមគ្រួសារ

បញ្ជាក់ដែរថា កាលពីម្សិលមិញនេះអ្នកស្រី ទូច គិមសៀន និងក្រុមគ្រួសារបានទៅទទួលកូនប្រុស ឆុង វិសាល ដោយផ្ទាល់នៅព្រលានអន្តរជាតិមរតកតេជោ បន្ទាប់ពីវិលត្រឡប់មកពីប្រទេសបារ៉ែនរួចមក។ ឆុង វិសាល គឺឈ្នះបានមេដាយប្រាក់១គ្រឿងក្នុងការប្រកួតកីឡាយុវជនអាស៊ី លើកទី៣ នៅប្រទេសបារ៉ែន។ វិសាល ប្រកួតច្រើនជាងគេរហូតដល់ទៅ៥ប្រកួតឯណោះទើបទទួលបានមេដាយប្រាក់ ១គ្រឿងនេះ។ កម្ពុជាបច្ចុប្បន្ននេះឈ្នះមេដាយសរុប ៤គ្រឿង ប្រាក់២ សំរឹទ្ធ២ ក្នុងព្រឹត្តិការណ៍កីឡាយុវជនអាស៊ី ដែលកំពុងធ្វើឡើងនៅប្រទេសបារ៉ែននេះ៕