កីឡា

ក្រុមបាល់ទះកំពូលកម្ពុជា ៤ នឹងប្រកួតពានរង្វាន់មិត្តភាពដើម្បីជនភៀសសឹក

បានផុស

៥ ខែ មុន

នៅ

ថ្ងៃព្រហស្បតិ៍ ៨ មករា ២០២៦

ដោយ

ក្រុមបាល់ទះលំដាប់កំពូលចំនួន ៤ ប្រចាំស្រុកខ្មែរ ត្រូវប្រកួតពានរង្វាន់មិត្តភាពដើម្បីជនភៀសសឹក នៅថ្ងៃទី១៧ ខែមករា ឆ្នាំ ២០២៦ នៅវិមានពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហព័ន្ធកីឡាបាល់ទះកម្ពុជា បានប្រកាសថា ក្រុមបាល់ទះ វិសាខា បញ្ជាការដ្ឋានអង្គរក្ស ក្រសួងមហាផ្ទៃ និងក្រុមស្នងការដ្ឋានរាជធានីភ្នំពេញ ត្រូវចូលរួមប្រកួតពានរង្វាន់មិត្តភាព Wurkz ដើម្បីជនភៀសសឹក។ រូបមន្តនៃការប្រកួតគឺក្រុមទាំង ៤ ត្រូវចាប់ឆ្នោតជ្រើសរើសដៃគូប្រកួតជុំទី១។ ក្រុមដែលឈ្នះជុំទី១ចំនួន ២ ក្រុមត្រូវឡើងទៅវគ្គផ្តាច់ព្រ័ត្រ ខណៈក្រុមដែលចាញ់ត្រូវប្រកួតគ្នាដណ្តើមចំណាត់ថ្នាក់លេខ៣។

កម្មវិធីប្រកួតដើម្បីជនភៀសសឹកនេះនៅមិនទាន់ប្រកាសព័ត៌មានលំអិតយ៉ាងណានោះទេសម្រាប់អ្នកចូលរួមទស្សនាថាតើគួរធ្វើអ្វីខ្លះដើម្បីរួមចំណែកក្នុងការជួយដល់ប្រជាពលរដ្ឋដែលកំពុងរងផលប៉ះពាល់ដោយសង្គ្រាមឈ្លានពានរបស់ថៃនៅតាមខេត្តព្រំដែន។

ទោះបីជាយ៉ាងណា កម្មវិធីប្រកួតនេះអាចចាត់ទុកជាការត្រៀមខ្លួន និងកម្តៅសាច់ដុំរបស់ក្រុមដែលមានកីឡាករអាចចូលរួមប្រកួតកីឡាបាល់ទះថ្នាក់ជាតិ ពានរង្វាន់សម្តេចក្រឡាហោម ស ខេង ដែលគ្រោងធ្វើនៅខែកុម្ភៈ ដល់ ខែមីនា ឆ្នាំ ២០២៦។

អ្នកគាំទ្រដែលចូលចិត្តកីឡាបាល់ទះនឹងទទួលបានអារម្មណ៍សប្បាយរីករាយសម្រាប់ការប្រកួតនេះ បន្ទាប់ពីគ្មានការប្រកួតអស់រយៈពេលជាច្រើនខែពោលគឺចាប់ទាំងពីក្រុមបាល់ទះជម្រើសជាតិកម្ពុជាប្រកួតក្នុងពានរង្វាន់ SEA V. League កាលពីខែកក្កដា ឆ្នាំ ២០២៥។

ចាប់តាំងពីពាក់កណ្តាលឆ្នាំ ២០២៥ មក ក្រុមបាល់ទះជម្រើសជាតិកម្ពុជាបានត្រៀមខ្លួនយ៉ាងសកម្មដើម្បីប្រកួតកីឡាស៊ីហ្គេម លើកទី៣៣ នៅប្រទេសថៃ ប៉ុន្តែជាអកុសល សង្គ្រាមបានផ្ទុះឡើងនៅព្រំដែនដែលបានធ្វើឲ្យកម្ពុជាបានដកខ្លួនពីការប្រកួត គ្រប់ប្រភេទកីឡា ក្នុងនោះក៏មានកីឡាបាល់ទះផងដែរ៕

អត្ថបទ៖ វិរបុត្រ

Related Topics:កីឡាបាល់ទះ