កីឡា

កីឡាករ ភួង សុវណ្ណ តេជោលីគ ជុំទី២ នេះមិនហ៊ានថា ២ក្រុមណាធ្លាក់ចេញនោះទេត្រឹមដឹងថា អង្គរក្ស ខ្លាំង

បានផុស

២ នាទី មុន

នៅ

ថ្ងៃពុធ ១៧ មិថុនា ២០២៦

ដោយ

កីឡាករ ភួង សុវណ្ណ ថានៅជុំទី២ ដែលមាន ៦ក្រុមនេះរូបគេមិនហ៊ានទាយថា ២ក្រុមណានឹងធ្លាក់ចេញពីកម្មវិធីនេះឡើយ ព្រោះសុទ្ធតែល្អៗដូចគ្នា ប៉ុន្តែមើលឃើញថាខាងបញ្ជាការដ្ឋានអង្គរក្សកាន់តែខ្លាំងពិសេសសំបូរឥណ្ឌូណេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ ភួង សុវណ្ណ

ស្មាត់វ័យ ២០ឆ្នាំ ភួង សុវណ្ណ បានឲ្យដឹងថា រូបគេបានតាមដានជាប់តែម្ដងនៅការប្រកួតតេជោលីគ រដូវកាលទី៣ ឆ្នាំ២០២៦ នេះ។ ចំពោះបេក្ខភាព ៦ក្រុមដែលឡើងមកជុំទី២ នេះសុទ្ធតែខ្លាំង និងជាក្រុមធំមានការប្រកួតប្រជែងខ្ពស់។

ម្ចាស់មេដាយមាសកីឡាឧត្តមសិក្សារូបនេះបន្ថែមទៀតថា រូបគេមិនហ៊ានទាយថា ២ក្រុមណានឹងធ្លាក់ចេញនៅវគ្គនេះនោះទេ ព្រោះសុទ្ធតែល្អៗដូចគ្នា។ ប៉ុន្តែក្រុមដែលខ្លួនចាប់អារម្មណ៍បំផុតនោះគឺ ស្នងការខេត្តស្វាយរៀង វិសាខា និងបញ្ជាការដ្ឋានអង្គរក្ស។ ក្រុមបញ្ជាការដ្ឋានអង្គរក្សគឺល្អខ្លាំងគ្រប់តំបន់តែម្ដង ពោលមានស្មាត់ធំ មានដៃប៉ះសេល្អ និងបាល់ដេញក៏ល្អថែមទៀត។ ដូច្នេះហើយទើបរូបគេមិនហ៊ាននិយាយថាក្រុមណានឹងធ្លាក់នៅជុំទី២ នេះនោះឡើយ។

ក្រុមបញ្ជាការដ្ឋានអង្គរក្ស

បញ្ជាក់ដែរថា នៅជុំទី២ វគ្គវិលជុំសន្សំពិន្ទុនេះមាន ៦ក្រុមដែលនឹងត្រូវដណ្ដើមចំណាត់ថ្នាក់ពីលេខ ១ ដល់ ៤ ឡើងទៅវគ្គបន្ទាប់។ ៦ក្រុមដែលនឹងលេងនៅជុំទី២ ថ្ងៃទី១៩ ខែមិថុនា ឆ្នាំ២០២៦ នេះរួមមានក្រុមបញ្ជាការដ្ឋានអង្គរក្ស សមាគមបាល់ទះវិសាខា សមាគមបាល់ទះក្រសួងមហាផ្ទៃ ស្នងការខេត្តស្វាយរៀង ស្នងការរាជធានីភ្នំពេញ និងស្នងការខេត្តកោះកុង៕

អត្ថបទដោយ៖ នួន ស៊ីណា