ព្រះខ័នរាជស្វាយរៀង ជាក្រុមជោគជ័យជាងគេក្នុងពានរង្វាន់សម្តេចតេជោ

ក្រុមបាល់ទាត់ ព្រះខ័នរាជស្វាយរៀង ត្រូវបានគេចាត់ទុកជាក្រុមជោគជ័យជាងគេបំផុតនៅក្នុងពានរង្វាន់សម្តេចអគ្គមហាសេនាបតីតេជោ ហ៊ុន សែន បន្ទាប់ពីក្រុមមានមូលដ្ឋាននៅខេត្ត ស្វាយរៀង មួយនេះធ្លាប់ឈ្នះជើងឯកច្រើនលើកជាងគេបំផុត។

ការប្រកួតពានរង្វាន់ពានសម្តេចតេជោថ្នាក់ជាតិ បានរៀបចំឡើងចំនួន ១៨ លើកហើយ ខណៈនៅរដូវកាល ២០២៥-២០២៦ គឺជាលើកទី ១៩។ បើក្រឡេកមើលអំពីប្រវត្តិក្រុមជោគជ័យជាងគេ នៅក្នុងពានរង្វាន់លំដាប់ទី ២ មួយនេះ គឺក្រុម ព្រះខ័នរាជស្វាយរៀង ធ្លាប់ឈានចូលដល់វគ្គផ្តាច់ព្រ័ត្ររហូតដល់ទៅ ១០ លើក ក្នុងនោះឈ្នះជើងឯកបានចំនួន ៥ លើក និងជើងឯករង ៥ លើក។

ការឈ្នះជើងឯកទាំង ៥ លើករបស់ ព្រះខ័នរាជស្វាយរៀង គឺនៅឆ្នាំ ២០១១, ២០១២, ២០១៥, ២០១៧ និងរដូវកាល ២០២៣-២០២៤។ ចំណែកការទទួលបានចំណាត់ថ្នាក់លេខ ២ គឺនៅឆ្នាំ ២០០៨, ២០១៦, ២០១៩, ២០២១ និងរដូវកាលមុន ២០២៤-២០២៥។

ផ្អែកតាមកំណត់ត្រាខាងលើ គឺគ្មានក្រុមណាមួយ មានប្រវត្តិឡើងវគ្គផ្តាច់ព្រ័ត្រ និងឈ្នះពានសម្តេចតេជោ ច្រើនជាង ព្រះខ័នរាជស្វាយរៀង នោះទេ។ តួយ៉ាងក្រុម ភ្នំពេញក្រោន ដែលស្ថិតនៅលេខ ២ ធ្លាប់ឈ្នះពាននេះបាន ៣ លើក ពីការឡើងវគ្គផ្តាច់ព្រ័ត្រសរុប ៥ លើក។

ចំណែកក្រុម កងយោធពលខេមរភូមិន្ទ ធ្លាប់ឡើងវគ្គផ្តាច់ព្រ័ត្របាន ៤ លើក ឈ្នះជើងឯកបានចំនួន ៣ លើក។ ក្រុម វិសាខា ធ្លាប់ឡើងវគ្គផ្តាច់ព្រ័ត្របាន ៣ លើក ឈ្នះជើងឯកបានទាំង ៣ លើក។ ណាហ្គាវើលដ៍ ធ្លាប់ឡើងវគ្គផ្តាច់ព្រ័ត្រចំនួន ៧ លើក ប៉ុន្តែពួកគេឈ្នះជើងឯកបានត្រឹមតែ ១ លើកប៉ុណ្ណោះ។ ដោយឡែកក្រុម ៣ ទៀតដូចជា ក្រសួងមហាផ្ទៃ (អឹមអូអាយ កំពង់ដេវ៉ា) បឹងកេត និង ខេមរាកីឡា ធ្លាប់ឈ្នះជើងឯក ១ លើកៗដូចគ្នា។

គួរឱ្យដឹងថា ការប្រកួតពានសម្តេចតេជោថ្នាក់ជាតិ លើកទី ១៩ រដូវកាល ២០២៥-២០២៦ សម្រាប់វគ្គ ១៦ ក្រុមចុងក្រោយបានធ្វើពិធីចាប់ឆ្នោតរួចរាល់ហើយ ដោយក្រុម ព្រះខ័នរាជស្វាយរៀង ត្រូវជួបជាមួយក្រុមខេត្តបាត់ដំបង យូណៃធីត។ ការប្រកួតទាំងមូល នឹងចាប់ផ្តើមពីថ្ងៃទី ២១ ខែ មករា រហូតដល់ថ្ងៃទី ២៤ ខែ ឧសភា ឆ្នាំ ២០២៦៕

អត្ថបទ៖ សេម កុសល