កីឡា

កីឡាករ Marck Espejo គូប្រជែងថ្មីរបស់ វឿន វាសនា ធ្លាប់លេង ៧ ប្រទេសមុនទៅតៃវ៉ាន់

បានផុស

៥ ខែ មុន

នៅ

ថ្ងៃសៅរ៍ ២៤ មករា ២០២៦

ដោយ

កីឡាករបាល់ទះជម្រើសជាតិហ្វីលីពីន Marck Espejo បានចូលរួមជាមួយក្លិប TSG Skyhawks នៃលីគបាល់ទះអាជីពតៃវ៉ាន់ ដែលបានក្លាយជាគូប្រជែងថ្មីមួយទៀតសម្រាប់ក្រុម Win Streak ដែលមានកីឡាករជម្រើសជាតិកម្ពុជា វឿន វាសនា។

ការចូលរួមជាមួយក្រុម TSG Skyhawks នៅលីគបាល់ទះអាជីពតៃវ៉ាន់មិនមែនជារឿងថ្មីសម្រាប់កីឡាករសញ្ជាតិហ្វីលីពីនរូបនេះទេក្នុងការចេញទៅលេងនៅក្រៅប្រទេស។ តាមពិតទៅរូបគេបានឆ្លងកាត់លេង ៧ ប្រទេសហើយគិតទាំងប្រទេសកំណើតរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ Marck Espejo ដែលលេងក្នុងតំណែងវាយផ្តាច់ស្តាំ (Outside Hitter) អាយុ ២៨ ឆ្នាំ កម្ពស់ ១.៨៩ម៉ែត្របានចាប់ផ្តើមអាជីពដំបូងនៅក្លិប Cagayan Valley Rising Suns នៅឆ្នាំ ២០១៥ និងក្រុម Cignal HD Spikers រដូវកាល ២០១៨-១៩ និង ២០២២-២៣ នៅក្នុងប្រទេសកំណើតរបស់ខ្លួន។

បន្ទាប់មក រូបគេបានចេញក្រៅប្រទេសជាលើកដំបូងដោយបានចូលរួមជាមួយក្រុម Oita Miyoshi Wiesse Adler រដូវកាល ២០១៨-១៩ នៃលីគកម្រិតទី ២ របស់ប្រទេសជប៉ុន។ នៅរដូវកាល ២០១៩-២០ រូបគេបានចូលរួមជាមួយក្រុម Visakha នៃលីគថៃ ហើយរដូវកាល ២០២០-២១ ចូលរួមជាមួយក្រុម Bani Jamra របស់ប្រទេសឥណ្ឌូណេស៊ី។

នៅរដូវកាល ២០២១-២២ កីឡាករ Marck Espejo វិលត្រឡប់ទៅប្រទេសជប៉ុនវិញដោយបានចូលរួមជាមួយក្រុម FC Tokyo នៃលីគកំពូលជប៉ុន ហើយរដូវកាល ២០២៣-២៤ បានចូលរួមជាមួយក្រុម Incheon Korean Air Jambos នៃលីគកំពូលកូរ៉េខាងត្បូង។

នៅឆ្នាំ ២០២៤ រូបគេបានវិលត្រឡប់ទៅប្រទេសកំណើតវិញដោយបានចូលរួមជាមួយក្រុម Criss Cross King Crunchers ហើយវិលទៅចូលរួមជាមួយក្រុម Kubota Spears Osaka នៃលីគកំពូលជប៉ុន។ នៅខែមករា ឆ្នាំ ២០២៦ ក្រុម TSG Skyhawks បានប្រកាសជាផ្លូវការពីការនាំចូលកីឡាករ Marck Espejo សម្រាប់ការប្រជែងលីគបាល់ទះអាជីពតៃវ៉ាន់។

បច្ចុប្បន្ន ក្រុម TSG Skyhawks កំពុងស្ថិតនៅចំណាត់ថ្នាក់លេខ ២ នៃតារាងពិន្ទុលីគបាល់ទះអាជីពតៃវ៉ាន់ បន្ទាប់ពីឆ្លងកាត់ ៣០ ប្រកួត គឺឈ្នះ ១៨ និងចាញ់ ១២ រកបាន ៥១ពិន្ទុ។ ក្រុមនេះហើយដែលផ្តល់ឲ្យក្រុម Win Streak ស្គាល់បរាជ័យ ២ លើកនៅក្នុងរដូវកាលនេះ។

សូមបញ្ជាក់ថា កីឡាករ Marck Espejo ជាមិត្តរួមក្រុមជម្រើសជាតិហ្វីលីពីនជាមួយកីឡាករ Bryan Bagunas ដែលធ្លាប់ជាមិត្តរួមក្រុមរបស់កីឡាករកម្ពុជា វឿន វាសនា នៅក្រុម Win Streak៕