វឿន វាសនា កំពុងឆ្ពោះទៅរកការ​ឈ្នះពានឯកត្ត​ជន ៣ ម្នាក់ឯងទៀតនៅលីគតៃវ៉ាន់រដូវកាលនេះ

កីឡាករ វឿន វាសនា របស់ក្រុមបាល់ទះ Win Streak កំពុងឆ្ពោះទៅរកវិថីអាចឈ្នះពានឯកត្តជន ៣ ម្នាក់ឯងទៀតនៅក្នុងលីគបាល់ទះអាជីព​តៃវ៉ាន់ រដូវកាល ២០២៥-២០២៦ បន្ទាប់ពីរូបគេបង្ហាញសមត្ថភាពនៅទីនោះល្អខ្លាំងសឹងមិននឹកស្មាន​ដល់។

នៅរដូវកាល ២០២៥-២០២៦ វឿន វាសនា បាននឹងកំពុងក្លាយជាកីឡាករដ៏សំខាន់របស់ក្រុម Win Streak។ ថ្មីៗនេះកីឡាករកូនខ្មែរអ្នកខេត្ត បាត់ដំបង ទើបតែជួយឱ្យក្រុមរបស់គេ ឈ្នះជើងឯកពានលីគរដូវកាលធម្មតា ឬលីគដំណាក់កាលដំបូង (Regular-Season)។

ដ្បិតការប្រកួតលីគជុំដំបូងនេះនៅសល់ ៨ ក្រុមទៀត ប៉ុន្តែក្រុម Win Streak បានកក់ជើងឯកលីគដំណាក់កាលដំបូងរួចរាល់ ដោយសារបច្ចុប្បន្ន ពួកគេបាននាំមុខក្រុមលេខ ២ TSG Sky Hawks ដល់ទៅ ៧៥ ពិន្ទុ។ តាមរយៈលទ្ធផលនេះ ក្រុម Win Streak ក៏បានកក់កៅអីរួចរាល់ផងដែរ ក្នុងនាមជាក្រុមលេខ ១ ដើម្បីឡើងទៅប្រកួតជម្រុះ playoff ប្រជែងជើងឯកលីគ តៃវ៉ាន់ នៅជុំផ្តាច់ព្រ័ត្រ។

ទោះបីជាការប្រកួតប្រជែងក្នុងលីគទាំងមូលមិនទាន់បញ្ចប់ក៏ដោយ ក៏ វឿន វាសនា ត្រូវបានគេមើលឃើញ ថា អាចឈ្នះពានឯកត្តជន ៣ ម្នាក់ឯងជាថ្មីម្តងទៀតនៅពេលបញ្ចប់រដូវកាល។ កីឡាករ​ជម្រើស​ជាតិ​កម្ពុជា ទំនងនឹងអាចក្រសោបបានពានកីឡាករល្អបំផុតប្រចាំព្រឹត្តិការណ៍ (MVP) ដោយសារ​បច្ចុប្បន្ន រូបគេកំពុងក្លាយជាកីឡាករលេចធ្លោជាងគេប្រចាំលីគ និងកំពុងជាប់ជាកីឡាករល្អបំផុតប្រចាំការប្រកួតច្រើនជាងគេផងដែរ ពោលគឺចំនួន ១៥ លើក (គិតត្រឹមសប្តាហ៍ទី ២១)។

កីឡាករវ័យ ២៤ ឆ្នាំ កម្ពស់ ១.៩៦ ម៉ែត្រ ទំនងនឹងឈ្នះពានកីឡាករ​រក​បាន​ពិន្ទុ​ច្រើន​ជាង​គេផងដែរ ព្រោះ វាសនា បច្ចុប្បន្នមានពិន្ទុច្រើនជាងគេរហូតដល់ទៅ ៨៣៨ ពិន្ទុ ដោយវ៉ាអ្នកលេខ ២ កីឡាករ Tsung-Hsuau Wu ១៦៦ ពិន្ទុ។ ជាមួយគ្នានេះ វាសនា ក៏អាចឈ្នះពានស្មាត់ស្តាំវាយផ្តាច់ល្អបំផុតផងដែរ ដោយសារតំណែងនេះ មិនទាន់មាននរណាវ៉ាដាច់រូបគេនៅឡើយទេ។

គួរបញ្ជាក់ ថា កាលពីរដូវកាល ២០២៤-២០២៥ វឿន វាសនា បានឈ្នះពានឯកត្តជន ៣ ម្នាក់ឯងរួចម្តងហើយ បន្ទាប់ពីជួយឱ្យក្រុម Win Streak ឈ្នះជើងឯកលីគបាល់ទះ តៃវ៉ាន់ ក្នុងនោះមានពាន​កីឡាករ​ល្អ​បំផុត​ប្រចាំ​ព្រឹត្តិការណ៍ ពាន​កីឡាករ​រក​បាន​ពិន្ទុ​ច្រើន​ជាង​គេ និងពានស្មាត់ស្តាំវាយផ្តាច់ល្អបំផុត៕

អត្ថបទ៖ សេម កុសល