កីឡា

បឹងកេត ស្វែងរកកំណត់ត្រាឈ្នះដំបូង លើ អង្គរថាយហ្គឺរ ក្នុងជំនួបទី៤រដូវកាលនេះ

បានផុស

២ ខែ មុន

នៅ

ថ្ងៃសុក្រ ២៤ មេសា ២០២៦

ដោយ

ក្រុមបាល់ទាត់ បឹងកេត បានធ្វើដំណើរទៅជួប អង្គរថាយហ្គឺរ វេលាម៉ោង ៦ ល្ងាច ថ្ងៃសៅរ៍ ទី២៥ ខែមេសា ឆ្នាំ ២០២៦ នៅកីឡដ្ឋានអគ្គីហ៊ីរ៉ូកាតុ សម្រាប់ការប្រកួតជើងទី២ វគ្គក្រុមលំដាប់កំពូល ៦ នៃលីគបាល់ទាត់កំពូលកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាការជួបគ្នាលើកទី ៤ នៅក្នុងលីគបាល់ទាត់កំពូលកម្ពុជា រដូវកាលនេះ។ បឹងកេត ធ្វើមិនសូវបានល្អទេរាល់ពេលជួប អង្គរថាយហ្គឺរ ទាំងការប្រកួតក្នុងដីរបស់ខ្លួន និងក្រៅដី។ ជួបគ្នា ៣ លើកកន្លងមក បឹងកេត មិនទាន់ស្គាល់ជ័យជម្នះលើ អង្គរថាយហ្គឺរ សោះ។ ជើងទី១ ក្នុងជុំទី១ បឹងកេត បានចាញ់ អង្គរថាយហ្គឺរ ដោយលទ្ធផលតដៃមិចរួច ៣-០ នៅទឹកដីខេត្តសៀមរាប កាលពីថ្ងៃទី៥ ខែតុលា ឆ្នាំ ២០២៥។

នៅជើងទី២ ក្នុងជុំទី១ អង្គរថាយហ្គឺរ យកបាន ៣ ពិន្ទុទៀតតាមរយៈជ័យជម្នះ ១-០ នៅទីលានពហុកីឡដ្ឋានជាតិអូឡាំពិក នៅថ្ងៃទី២៥ ខែមករា ឆ្នាំ ២០២៦។ ឈានចូលជុំទី២ វគ្គ Top 6 ជើងទី១ ក្រុមទាំងពីរបញ្ចប់ដោយលទ្ធផលស្មើគ្នា ១-១ នៅពហុកីឡដ្ឋានជាតិអូឡាំពិក ហើយជើងទី២ បឹងកេត ត្រូវជម្រុះបញ្ជីឲ្យដាច់ស្រឡះ និងស្វែងរកឲ្យបានជ័យជម្នះលើកដំបូងនៅក្នុងរដូវកាលនេះ។

ក្រុមទាំងពីរមា ៤៤ ពិន្ទុស្មើគ្នា ប៉ុន្តែ អង្គរថាយហ្គឺរ ឈរលេខ ៣ នៅពីលើ បន្ទាប់ពីឈ្នះ ១៣ ស្មើ ៥ និងចាញ់ ៨ ខណៈ បឹងកេត ស្ថិតនៅលេខ ៤ ពីការឈ្នះ ១២ ស្មើ ៨ និង ចាញ់ ៦។ ក្រុមទាំងពីរនៅមានឱកាសប្រជែងយកចំណាត់ថ្នាក់លេខ ២ ជាមួយ ភ្នំពេញក្រោន ដូចគ្នា ដើម្បីកន្លះកៅអីសម្រាប់ពានរង្វាន់អាស៊ីកម្រិតទី២ AFC Champions League Two។

ទោះបីជាយ៉ាងណា ភ្នំពេញក្រោន មានភាគរយខ្ពស់ជាងគេក្នុងការទទួលបានចំណាត់ថ្នាក់លេខ ២ ដោយសារពួកគេមាន ៥០ ពិន្ទុ កំពុងស្ថិតនៅលេខ ២ ស្រាប់ ដែលនាំ មុខដល់ទៅ ៦ ពិន្ទុ ខណៈការប្រកួតនៅសល់តែ ៤ ប្រកួតទៀតប៉ុណ្ណោះនឹងបញ្ចប់រដូវកាលនេះ។

សម្រាប់ការប្រកួតនៅថ្ងៃទី២៥ ខែមេសា នេះដែរ ព្រះខ័នរាជស្វាយរៀង ទទួល ណាហ្គាវើលដ៍ នៅពហុកីឡដ្ឋានជាតិមរតកតេជោ ហើយ ភ្នំពេញក្រោន ប្រកួតជាមួយ អឹមអូអាយ កំពង់ដេវ៉ា នៅកីឡដ្ឋានវិសាខា ដែលការប្រកួតធ្វើវេលាម៉ោង ៦ ល្ងាចដូចគ្នា។