កីឡា

ពេជ្រ សម្បត្តិ បច្ចុប្បន្នជាកីឡាករជោគជ័យជាងគេបំផុតលើវិស័យប្រដាល់គុនខ្មែរ

បានផុស

២ ខែ មុន

នៅ

ថ្ងៃព្រហស្បតិ៍ ៣០ មេសា ២០២៦

ដោយ

ជើងខ្លាំងប្រចាំក្លឹបពេជ្រសុផាន់គុនខ្មែរគឺកីឡាករ ពេជ្រ សម្បត្តិ បច្ចុប្បន្នឈរជើងជាកីឡាករជោគជ័យជាងគេបំផុតហើយលើវិស័យកីឡាមួយនេះបន្ទាប់ពីឈ្នះខ្សែក្រវាត់ជាបន្តបន្ទាប់ និងក្រសោបប្រាក់រង្វាន់ម៉ឺនៗដុល្លារទាំងការប្រកួតក្នុងស្រុក និងក្រៅប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបភាពផេកលោក ពេជ្រ សុផាន់

វាជាការពិត និងមិនអាចប្រកែកបានចំពោះភាពជោគជ័យ និងសមិទ្ធផលយ៉ាងច្រើននាពេលកន្លងមករបស់ជើងខ្លាំង ពេជ្រ សម្បត្តិ ក្នុងការប្រកួតរបស់គេ។ តាមរយៈជ័យជម្នះលើសមរភូមិជាច្រើនរាប់ពីការប្រកួតការពារខ្សែក្រវាត់ ការប្រកួតដណ្ដើមកំប៉ុងមាស ការប្រកួតដណ្ដើមខ្សែក្រវាត់ និងការប្រកួតផ្សព្វផ្សាយគុនខ្មែរនៅឯក្រៅប្រទេសបានធ្វើឲ្យរូបគេមានកេរ្តិ៍ឈ្មោះកាន់តែល្បីឡើងៗពីមួយប្រកួតទៅមួយប្រកួត។

កីឡាករ ពេជ្រ សម្បត្តិ

ទន្ទឹមនិងជ័យជម្នះជាច្រើននេះ ពេជ្រ សម្បត្តិ ក៏ជាកីឡាករក្រសោបប្រាក់រង្វាន់បានច្រើនផងដែរ។ ក្នុងមួយប្រកួតរបស់កីឡាករដើមកំណើតពីខេត្តកំពង់ស្ពឺរូបនេះត្រូវបានគេដឹងថាបានមិនតិចជាង ៣០០០-៤០០០ដុល្លារនោះឡើយនេះមិនរាប់ប្រាក់រង្វាន់លើកទឹកចិត្តបន្ថែម។ ជាក់ស្ដែងដូចមួយប្រកួតចុងក្រោយរបស់គេនៅលើសង្វៀនថោន កាលពីថ្ងៃទី២៦ ខែមេសា ឆ្នាំ២០២៦ នេះបានឈ្នះខ្សែក្រវាត់ ១គ្រឿងហើយអមដោយប្រាក់រង្វាន់ ១ម៉ឺនដុល្លារថែមទៀត។

កីឡាករ ពេជ្រ សម្បត្តិ

តាមរយៈការប្រកួតមិនចាញ់សោះមួយរយៈពេលចុងក្រោយនេះដូចជាការសំបូរទីផ្សារប្រកួតមិនដាច់តាមបណ្ដាស្ថានីយទូរទស្សន៍ផ្សេងៗក្នុងស្រុក និងឱកាសចេញទៅប្រកួតឯក្រៅប្រទេសជាច្រើនកម្មវិធីបន្តបន្ទាប់ និងរួមទាំងការស្រឡាញ់គាំទ្រពីសំណាក់មហាជនមានកាន់តែច្រើនធ្វើឲ្យ ពេជ្រ សម្បត្តិ ចាត់ចូលជាកីឡាករម្នាក់ដែលជោគជ័យជាងគេបំផុតនាពេលបច្ចុប្បន្ននេះ។

កីឡាករ ពេជ្រ សម្បត្តិ

កីឡាករក្នុងស្រុកមួយចំនួនមិនថាទម្ងន់ស្រាលទម្ងន់ធ្ងន់ និងទាំងចាស់-ថ្មី នោះទេគឺមិនទាន់អាចក្រសោបភាពជោគជ័យបានដូចជា សម្បត្តិ នាពេលឥលូវនេះនោះឡើយ។ ព្រោះពួកគេមានឈ្នះមានចាញ់ក្នុងការប្រកួត និងមានសូវមានទីផ្សារប្រកួតបានច្រើនដូចកូនសិស្សលោក ពេជ្រសុផាន់ ម្នាក់នេះឡើយ។ មួយវិញទៀតកីឡាករដែលជាជើងខ្លាំងពីមុនមកហាក់ធ្លាក់ប្រជាប្រិយភាព ឬការគាំទ្រផងដែរបន្ទាប់ពីចាញ់ការប្រកួតធំៗ ធ្លាក់ចុះសមត្ថភាពប្រកួត និងមានបញ្ហាផ្ទាល់ខ្លួនផ្សេងៗប៉ះពាល់កិត្តិយសជាដើម។

បញ្ជាក់ដែរថា បច្ចុប្បន្ននេះ ពេជ្រ សម្បត្តិ ជាកីឡាករគុនខ្មែរម្នាក់ដែលមានជីវភាពរស់នៅធូរធាមានផ្ទះផ្ទាល់ខ្លួន មានឡាន មានម៉ូតូ និងមានលទ្ធភាពអាចជួយក្រុមគ្រួសារ និងជួយដល់ការងារសប្បុរសធម៌ខ្លះៗទៀតផងដូចធ្លាប់បានធ្វើកន្លងមកនៅឯស្រុកកំណើត៕