កីឡា

ក្រុមបាល់ទះកម្ពុជា នឹងប្រកួតពាន SEA V. League 2026 ខែកក្កដា នៅពីរប្រទេសផ្សេងគ្នា

បានផុស

៤៤ វិនាទី មុន

នៅ

ថ្ងៃព្រហស្បតិ៍ ២៥ មិថុនា ២០២៦

ដោយ

ក្រុមបាល់ទះជម្រើសជាតិកម្ពុជា នឹងចូលរួមប្រកួតជើងឯកបាល់ទះអាស៊ាន SEA V. League ឆ្នាំ ២០២៦ នៅប្រទេសហ្វីលីពីន និង ឥណ្ឌូណេស៊ី ដែលមានក្រុមលំដាប់កំពូលទាំង ៦ ប្រចាំតំបន់អាស៊ានចូលរួមប្រកួត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពព័ត៌មានពីប្រទេសឥណ្ឌូណេស៊ី បានផ្សាយថា ការប្រកួតពានរង្វាន់ SEA V. League ជុំទី១ ធ្វើចាប់ពីថ្ងៃទី១៥ ដល់ ទី១៩ ខែកក្កដា ឆ្នាំ ២០២៦ នៅប្រទេសហ្វីលីពីន។ បន្ទាប់មក ការប្រកួតជុំទី២ ធ្វើពីថ្ងៃទី២២ ដល់ ទី២៦ ខែកក្កដា ឆ្នាំ ២០២៦ នៅប្រទេសឥណ្ឌូណេស៊ី។

ពានរង្វាន់ SEA V League កាលពីឆ្នាំ ២០២៥ មានក្រុមចំនួន ៥ ចូលរួមប្រកួត ប៉ុន្តែសម្រាប់ឆ្នាំ ២០២៦នេះ មានក្រុមបាល់ទះជម្រើសជាតិចំនួន ៦ គឺ ហ្វីលីពីន ឥណ្ឌូណេស៊ី ថៃ មីយ៉ាន់ម៉ា និង កម្ពុជា ដែលត្រូវចូលរួមប្រកួត។ ចំណែកក្រុមជម្រើសជាតិ ម៉ាឡេស៊ី សិង្ហបុរី និងឡាវ ឡើយ។

សម្រាប់រូបមន្តនៃការប្រកួតមិនទាន់ត្រូវបានប្រកាសជាផ្លូវការឡើយ ប៉ុន្តែបើតាមរូបមន្តកាលពីឆ្នាំ ២០២៥ គឺការប្រកួតវិលជុំសន្សំពិន្ទុ ក្រុមណាធ្វើបានល្អជាងគេ មានពិន្ទុច្រើនជាងគេ ស្ថិតនៅចំណាត់ថ្នាក់លេខ ១ នឹងក្លាយជាជើងឯក ហើយក្រុមទទួលបានលេខ ២ និងលេខ ៣ តាមពិន្ទុចំណាត់ថ្នាក់តែម្តង។

សម្រាប់ ក្រុមបាល់ទះជម្រើសជាតិកម្ពុជា បានចូលរួមប្រកួតពានរង្វាន់ SEA V. League លើកទី១ កាលពីឆ្នាំ ២០២៥ នៅប្រទេសហ្វីលីពីន និងឥណ្ឌូណេស៊ី។ ឆ្លងកាត់ការប្រកួតទាំង ២ ជុំ ដែលមានចំនួន ៨ ប្រកួតគឺ ចាញ់ទាំង ៨ ប្រកួតស្ថិតនៅចំណាត់ថ្នាក់លេខ ៥ ទាំង ២ ជុំ។

ចំណែកពានរង្វាន់កម្រិតទី ២ គឺ SEA V. League Challenge មិនមានរៀបចំការប្រកួតឡើយ ចាប់តាំងពី កម្ពុជា បានរៀបចំកាលពីឆ្នាំ ២០២៤ ដែលពេលនោះកម្ពុជា បានក្លាយជាជើងឯក ហើយម៉ាឡេស៊ី ទទួលបានចំណាត់ថ្នាក់លេខ ២ និង សិង្ហបុរី លេខ ៣។

ដោយសារពានរង្វាន់ SEA V. League Challenge គ្មានរៀបចំការប្រកួត សហព័ន្ធកីឡាបាល់ទះកម្ពុជា បានបង្ហើបឲ្យដឹងពីគម្រោងរៀបចំពានរង្វាន់នេះជាថ្មីដោយអញ្ជើញ ក្រុមបាល់ទះមកពីក្រៅប្រទេសចូលរួមប្រកួតជាមួយក្រុមរបស់កម្ពុជា ពោលគឺមិនមែនក្រុមជម្រើសជាតិដូចលើកមុនឡើយ។

លោក អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទាត់កម្ពុជា បានឲ្យដឹងថា ការប្រកួតដណ្តើមប្រាក់រង្វាន់ ពានសម្តេចមហាបវរធិបតី SEA V. League Challenge គ្រោងនឹងអញ្ជើញក្រុមខ្លាំងៗមកពីក្រៅប្រទេសចូលរួមប្រកួតដូចជា មកពីឥណ្ឌូណេស៊ី វៀតណាម ជប៉ុន និងកូរ៉េជាដើម៕