កីឡា

នេះសមិទ្ធផលធំៗជាច្រើន របស់លោកគ្រូ លី ជុន មុនពេលចាកចេញពីគ្រូបាល់ទះជម្រើសជាតិ

បានផុស

៤ ខែ មុន

នៅ

ថ្ងៃចន្ទ ៩ មីនា ២០២៦

ដោយ

សហព័ន្ធកីឡាបាល់ទះកម្ពុជា បានសម្រេចចែកផ្លូវគ្នាជាមួយគ្រូបង្វឹកសញ្ជាតិចិន លី ជុន បន្ទាប់ពីលោកបានដឹកនាំក្រុមបាល់ទះជម្រើសជាតិកម្ពុជាអស់រយៈពេលប្រមាណ ៩ ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោមការដឹកនាំរបស់លោក លី ជុន ក្រុមបាល់ទះជម្រើសជាតិកម្ពុជាបានបង្កើតប្រវត្តិសាស្ត្រជាច្រើន ទាំងសមត្ថភាព និងសមិទ្ធផល។ លោកបានដឹកនាំក្រុមជម្រើសជាតិកម្ពុជា ឡើងវគ្គពាក់កណ្តាលផ្តាច់ព្រ័ត្រ កីឡាស៊ីហ្គេម លើកដំបូងកាលពីឆ្នាំ ២០២១ និងបង្កើតប្រវត្តិឈ្នះមេដាយសំរិទ្ធកីឡាស៊ីហ្គេម ជាលើកដំបូង។

ពីរឆ្នាំក្រោយមក ក្រុមបាល់ទះជម្រើសជាតិកម្ពុជា បានបង្កើតប្រវត្តិសាស្ត្រជាថ្មីដោយឈានដល់វគ្គផ្តាច់ព្រ័ត្រ កីឡាស៊ីហ្គេម ឆ្នាំ ២០២៣ នៅពេលកម្ពុជាធ្វើជាម្ចាស់ផ្ទះ ហើយបានឈ្នះមេដាយប្រាក់កីឡាស៊ីហ្គេម ជាលើកដំបូងទៀត។

សមិទ្ធផលដ៏អស្ចារ្យមួយទៀត គឺក្រុមបាល់ទះជម្រើសជាតិកម្ពុជា បានឈ្នះជើងពានអាស៊ានកម្រិតទី២ SEA V. League Challenge ឆ្នាំ ២០២៤ បន្ទាប់ពីបានយកឈ្នះលើដៃគូទាំងអស់មានដូចជា ម៉ាឡេស៊ី សិង្ហបុរី និងឡាវ។

បើក្រឡេកមើលស្ថិតិជាប្រវត្តិសាស្ត្រសំខាន់ៗផ្សេងៗទៀតមានដូចជា ក្រុមបាល់ទះជម្រើសជាតិកម្ពុជា បានយកឈ្នះក្រុមបាល់ទះជម្រើសជាតិថៃ ២ លើកជាប់គ្នាក្នុងកីឡាស៊ីហ្គេម គឺ ឈ្នះថៃ ៣-២ ដើម្បីបានមេដាយសំរិទ្ធកីឡាស៊ីហ្គេម ឆ្នាំ ២០២១ នៅប្រទេសវៀតណាម និងឈ្នះ ថៃ ៣-២ ទៀតនៅវគ្គពាក់កណ្តាលផ្តាច់ព្រ័ត្រក្នុងកីឡាស៊ីហ្គេម ឆ្នាំ ២០២៣។

ក្រុមជម្រើសជាតិកម្ពុជា ឈ្នះជើងឯក SEA V. League Challenge

ជាមួយគ្នានេះ ក្រុមបាល់ទះជម្រើសជាតិកម្ពុជា បានដកខ្លួនចេញពីពានអាស៊ានកម្រិតទី២ SEA V. League Challenge ដើម្បីបានឡើងទៅពានកម្រិតទី១ SEA V. League។ ក្រុមជម្រើសជាតិកម្ពុជា ក៏បានបង្កើតស្ថិតិក្នុងការយកឈ្នះក្រុមជម្រើសជាតិវៀតណាម សិង្ហបុរី និងហ្វីលីពីន ថែមទៀត។

បន្ទាប់ពីទទួលបានសមិទ្ធផលល្អទាំងនៅកីឡាស៊ីហ្គេម ក្រុមបាល់ទះជម្រើសជាតិកម្ពុជា បានចូលរួមប្រកួតកីឡាសទ្វីបអាស៊ី ជាលើកដំបូង កាលពីចុងឆ្នាំ ២០២៣ នៅប្រទេសចិន។

ប៉ុន្មានឆ្នាំចុងក្រោយនេះ ភាពខ្លាំងរបស់ក្រុមបាល់ទះជម្រើសជាតិកម្ពុជាបានទាក់ទាញអ្នកគាំទ្រយ៉ាងខ្លាំងឲ្យចាប់អារម្មណ៍លើកីឡាបាល់ទះដែលបានធ្វើឲ្យក្លាយជាកីឡាករដ៏មានប្រជាប្រិយមួយប្រភេទមិនចាញ់កីឡាបាល់ទាត់ និងកីឡាប្រដាល់ឡើយ។

ក្រុមបាល់ទះកម្ពុជា ឈ្នះមេដាយប្រាក់កីឡាស៊ីហ្គេម

លោកគ្រូ លី ជុន បានដឹកនាំក្រុមបាល់ទះជម្រើសជាតិកម្ពុជាអស់រយៈពេល ៩ ឆ្នាំ ហើយនៅដើម្បីខែមីនា ឆ្នាំ ២០២៦ លោក និងសហព័ន្ធកីឡាបាល់ទះកម្ពុជាបានសម្រេចចែកផ្លូវគ្នា។ នៅក្នុងឆ្នាំ ២០២៦ ក្រុមបាល់ទះជម្រើសជាតិកម្ពុជាមានភារកិច្ចចូលរួមប្រកួតពាន SEA V. League ដូច្នេះទំនងជាគ្រូបង្វឹកថ្មីដឹកនាំ។

សមិទ្ធផលសំខាន់របស់លោកគ្រូ លី ជុន