ដឹងទេ កម្ពុជា ជាប្រទេសទីប៉ុន្មានដែលពានរង្វាន់ World Cup ដង្ហែមកម្សិលមិញ

កម្ពុជាជាប្រទេសទី ២១ ហើយសម្រាប់ក្បួនដង្ហែពានរង្វាន់បាល់ទាត់ពិភពលោក “FIFA World Cup – Trophy Tour” បន្ទាប់ពីហែឆ្លងកាត់ទៅប្រទេសមួយចំនួនលើពិភពលោកកន្លងមក ។

ក្បួនដង្ហែពានរង្វាន់នេះត្រូវបានចាប់ផ្តើមចេញដំណើរពីប្រទេសអារ៉ាប់រួមកាលពីថ្ងៃទី ១១ ខែឧសភា ឆ្នាំ ២០២២ ហើយបានដង្ហែឆ្លងកាត់ ២០ ប្រទេសរួចហើយ រួមមាន អារ៉ាប់រួម, អូម៉ង់, បារ៉ែន, គុយវ៉ែត, បូស្ន៊ី, ម៉ុងតេណេហ្គ្រោ, កូសូវ៉ូ, ម៉ាសេដូនីខាងជើង, អាល់បានី, អេត្យូពី, កេនយ៉ា, អាហ្វ្រិកខាងត្បូង, តង់សានី, លីបង់, អ៊ូសបេគីស្ថាន, ប៉ាគីស្ថាន, បង់ក្លាដែស, ទីម័រខាងកើត, កោះសាម័រ, និងដែនដី America Samoa ហើយចុងក្រោយមកដល់កម្ពុជាកាលពីថ្ងៃទី ១៥ ខែមិថុនា ឆ្នាំ ២០២២ ។

ក្រោយចាកចេញពីកម្ពុជា ពានរង្វាន់បាល់ទាត់ពិភពលោកនេះនឹងត្រូវបន្តឆ្លងកាត់ ៣០ ប្រទេស ផ្សេងទៀត ក្នុងចំណោមប្រទេស និងដែនដីចំនួន ៥១ មុនពេលប្រកួតកីឡាបាល់ទាត់ពិភពលោកមកដល់ ពោលចាប់ពីថ្ងៃទី២១ ខែវិច្ឆិកា ដល់ថ្ងៃទី១៨ ខែធ្នូ ឆ្នាំ ២០២២ នៅទីក្រុងដូហា ប្រទេសកាតា ។

គួរបញ្ជាក់ថា ពានរង្វាន់ FIFA World Cup ​​ផលិតឡើង​ពី​មាស​​មានទម្ងន់ ​​​៦.១ ​គីឡូក្រាម និង​កម្ពស់​​៣៦.៨​ សង់​ទី​ម៉ែត្រ ។ វា​ជា​ពាន​រង្វាន់​​ដែល​មាន​តម្លៃ​បំផុត​ក្នុង​ប្រវត្តិ​សាស្ត្រ​កីឡា​ក្នុង​ពិភព​លោក​ដែល​គិត​ជា​ប្រាក់​ចំនួន​ ២០០ ​លាន​ដុល្លារ​អាមេរិក ហើយ​បច្ចុប្បន្ន​​​គ្រង​​ដោយ​ប្រទេស​បារាំងដែល​ឈ្នះ​កាល​ពី​ឆ្នាំ​​ ២០១៨ ហើយនឹង​ត្រូវ​ការពារ​ជើង​ឯក​របស់​ខ្លួន​នា​ចុង​​ឆ្នាំ​ ២០២២ ​នេះ​នៅ​ប្រទេស​កាតា ៕

អត្ថបទ ៖ ជីវ័ន្ត​