រុស្ស៊ី ថា បាតដៃទី ៣ កំពុងភាពបង្កចលាចលនៅក្នុងប្រទេសស៊ែប៊ី

វិមានក្រឹមឡាំងបាននិយាយកាលពីថ្ងៃចន្ទថា ប្រទេសរុស្ស៊ីមើលឃើញមានការជ្រៀតជ្រែកពីបាតដៃទី ៣ ដើម្បីបង្កភាពចលាចលនៅក្នុងប្រទេសស៊ែប៊ី ស្របពេលដែលហ្វូងមនុស្សរាប់ពាន់នាក់បានធ្វើបាតុកម្មប្រឆាំងនឹងលទ្ធផលនៃការបោះឆ្នោតសភា និងការបោះឆ្នោតថ្នាក់មូលដ្ឋានសម្រាប់ប្រទេសបាល់កង់កាលពីចុងសប្ដាហ៍កន្លងទៅ ។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មាននៅក្នុងទីក្រុងមូស្គូថា “ប្រទេសនីមួយៗតែងតែមានច្បាប់ផ្ទៃក្នុង និងស្ថាប័នរៀបចំការបោះឆ្នោតប្រកបដោយភាពស្របច្បាប់ ប៉ុន្តែអ្វីដែលកំពុងកើតមានឡើងនៅក្នុងប្រទេសនេះ គឺមានការប៉ុនប៉ងដោយភាគីទី ៣ រួមទាំងមកពីបរទេសផងដែរ ដើម្បីបង្កភាពចលាចលនៅក្នុងទីក្រុង” ។

លោក Peskov បានបញ្ជាក់ទៀតថា ទីក្រុងមូស្គូមិនមានការសង្ស័យទេដែលរដ្ឋាភិបាលស៊ែប៊ីនឹងធានានូវនីតិរដ្ឋក្នុងប្រទេស ហើយព្រឹត្តិការណ៍ដែលកើតមានឡើងនៅពេលនេះ គឺជាកិច្ចការផ្ទៃក្នុងរបស់ប្រទេសខ្លួន ហើយរុស្ស៊ីមិនដែលជ្រៀតជ្រែកនៅក្នុងរឿងបែបនេះឡើយ ព្រោះតែស៊ែប៊ីជាប្រទេសសម្ព័ន្ធមិត្ត និងជាដៃគូរបស់យើង ។

អ្នកនាំពាក្យរូបនេះបានបន្ថែមថា រុស្ស៊ី និងស៊ែប៊ីបានបង្រួបបង្រួមគ្នាដោយវប្បធម៌ប្រវត្តិសាស្ត្ររួម ហើយទីក្រុងមូស្គូចាត់ទុកទំនាក់ទំនងរបស់ខ្លួនជាមួយរដ្ឋាភិបាលទីក្រុងបែលក្រាដស្ថិតក្នុងការប្រុងប្រយ័ត្ន ប៉ុន្តែឲ្យតម្លៃពួកគេ ខណៈកិច្ច​សហប្រតិបត្តិការ​រវាងប្រទេសទាំងពីរវិញ ក៏ឈរលើ​ទស្សនវិស័យ​ទូលំទូលាយផងដែរ ។

កាលពីចុងសប្ដាហ៍កន្លងទៅ ពលរដ្ឋរាប់ពាន់នាក់មកពីរដ្ឋធានីបែលក្រាដរបស់ប្រទេសស៊ែប៊ី បានព្យាយាមបុកទម្លុះចូលទៅក្នុងអគារសភានៅក្នុងការតវ៉ាមួយដែលរៀបចំឡើងដោយគណបក្ស​ប្រឆាំង​​ចាញ់​​ឆ្នោត គឺ​គណបក្ស​​ស៊ែប៊ី​​ប្រឆាំង​​អំពើ​​ហិង្សា​ (SPN)​ ក្នុងគោលបំណងឲ្យលុបចោលលទ្ធផលបោះឆ្នោត និងចាត់ទុកការបោះឆ្នោតនោះថាមិនប្រក្រតី ។

ពាក់ព័ន្ធនឹងស្ថានភាពនេះដែរ លោកប្រធានាធិបតី Aleksandar Vucic បាននិយាយនៅក្នុងសុន្ទរកថាទៅកាន់ប្រទេសជាតិថា “មិនមានបដិវត្តន៍ពណ៌កើតឡើងនោះទេ ហើយយើងក៏​មិនព្យាយាម​ធ្វើ​ឲ្យ​បាតុករ​ណា​ម្នាក់​រង​របួសនោះដែរ ជាពិសេសយើង​កំពុងរកដំណោះស្រាយ​គ្រប់បែប​យ៉ាង​ដោយ​សន្តិវិធីដូចគ្នា ។

គួរបញ្ជាក់ថា បើយោងតាមលទ្ធផលបោះឆ្នោតបឋមពីគណៈកម្មាធិការរៀបចំការបោះឆ្នោតស៊ែប៊ី គណបក្សរីកចម្រើនស៊ែប៊ី (SPP) ដែលកំពុងកាន់អំណាចទទួលបានសំឡេងគាំទ្រ ៣៩.៣៤ ភាគរយ និងទទួលបាន ៤៩ អាសនៈ ខណៈដែលគណបក្ស​​ស៊ែប៊ី​​ប្រឆាំង​​អំពើ​​ហិង្សា​ (SPN)​ ទទួលបាន ៣៤.២៧ ភាគរយ និងទទួលបាន ៤២ អាសនៈ ៕

ប្រែសម្រួលដោយ ៖ ជីវ័ន្ត

ប្រភព ៖​ Anadolu

ចុចអាន ៖ កាសែត New York Times ផ្សាយថា លោក ពូទីន បើកចិត្តចរចាបទឈប់ បាញ់នៅ អ៊ុយក្រែន