អ៊ុយក្រែន បើកចិត្តយកដំណោះស្រាយសន្តិភាព ១២ ចំណុចរបស់ ចិន ដើម្បីបញ្ចប់ភ្លើងសង្គ្រាមជាមួយ រុស្ស៊ី

នៅទីបំផុតភាគីអ៊ុយក្រែនបានចាត់ទុកដំណោះស្រាយ ឬផែនការសន្តិភាព ១២ ចំណុចដែលដាក់ចេញដោយប្រទេសចិន គឺជារឿងចាំបាច់ និងគួរតែដាក់លើតុពិភាក្សាក្នុងការបញ្ចប់ភ្លើងសង្គ្រាមជាមួយប្រទេសរុស្ស៊ី ខណៈរដ្ឋាភិបាលទីក្រុងកៀវកប់ដំណោះស្រាយនេះអស់រយៈពេលជិត ១ ឆ្នាំទៅហើយ ។ នេះបើយោងតាមការចុះផ្សាយដោយទីភ្នាក់ងារ Reuters នៅថ្ងៃទី១៦ ខែមករា ។

ថ្លែងនៅមុនកិច្ចប្រជុំនៃវេទិកាសេដ្ឋកិច្ចពិភពលោក (WEF) ក្នុងទីក្រុង Davos ប្រទេសស្វីស, ប្រមុខអគ្គសេនាធិការចម្រុះរបស់អ៊ុយក្រែនលោក Andriy Yermak បានលើកឡើងថា “វត្តមានចិនកាន់តែសំខាន់ក្នុងការចូលរួមកិច្ចចរចាដើម្បីបញ្ចប់ភ្លើងសង្គ្រាមជាមួយរុស្ស៊ី ហើយវាជារឿងសំខាន់ដែលសម្ព័ន្ធមិត្តរបស់ទីក្រុងមូស្គូមួយនេះមកអង្គុយនៅតុរកដំណោះស្រាយ ឬផ្លូវឆ្ពោះទៅរកសន្តិភាព” ។

យោងតាមការចុះផ្សាយដោយទីភ្នាក់ងារព័ត៌មាន Xinhua បានឲ្យដឹងថា ក្រសួងការបរទេសចិនបានដាក់ចេញដំណោះស្រាយ ១២ ចំណុចស្ដីពីវិបត្តិនយោបាយនៅអ៊ុយក្រែនកាលពីថ្ងៃទី២៤ ខែកុម្ភៈ ឆ្នាំ២០២៣ ពោលចំខួប ១ ឆ្នាំនៃប្រតិបត្តិការសឹករបស់រុស្ស៊ីទៅលើអ៊ុយក្រែន ខណៈដំណោះស្រាយទាំងនោះផ្ដោតសំខាន់លើបទឈប់បាញ់ ការចរចារកសន្តិភាព ការដោះស្រាយវិបត្តិមនុស្សធម៌ ការបញ្ឈប់ការដាក់ទណ្ឌកម្មជាឯកតោភាគី ការការពារជនស៊ីវិល និងអ្នកទោសសង្គ្រាមជាដើម ។

ពាក់ព័ន្ធនឹងដំណោះស្រាយសន្តិភាពនេះទៀតសោត សារព័ត៌មាន RT បានរាយការណ៍តាំងតែពីខែតុលា ឆ្នាំ២០២៣ មកម្ល៉េះថា លោកប្រធានាធីបតីរុស្ស៊ី Vladimir Putin បានគាំទ្រសំណើទាំង ១២ ចំណុចរបស់ភាគីចិន ហើយលោក Putin ថែមទាំងប្រាប់លោកប្រធានាធិបតី Xi Jinping ទៀតថា សំណើនេះមានភាពប្រាកដប្រជានិយម ហើយស្របទៅនឹងវិធីសាស្ត្ររបស់រុស្ស៊ី ជាពិសេសគឺអាចយកប្រើជាមូលដ្ឋានគ្រឹះសម្រាប់ដំណោះស្រាយជម្លោះដោយសន្តិវិធីបាន ។

គិតត្រឹមពេលនេះ ភ្លើងសង្គ្រាមរវាងរុស្ស៊ី និងអ៊ុយក្រែនបានចាយពេលដល់ឆ្នាំទី ២ ហើយ បន្ទាប់ពីកងកម្លាំងរដ្ឋាភិបាលទីក្រុងមូស្គូលើកទ័ពចូលទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ២០២២ ខណៈបច្ចុប្បន្នលោកប្រធានាធិបតី Volodymr Zelensky នៅតែបន្តដើរសុំជំនួយ ក៏ដូចជាសព្វាវុធ និងកែនទាហានជាបន្តបន្ទាប់ពីសម្ព័ន្ធមិត្តសំខាន់ៗដូចជា អឺរ៉ុប និងអាមេរិកជាដើម ។

ទោះបីជាមិនមានព័ត៌មានច្បាស់លាស់អំពីចំនួនអ្នកស្លាប់ និងរបួសក៏ដោយ ប៉ុន្តែតាមការប៉ាន់ប្រមាណរបស់អង្គការសហប្រជាជាតិបានឲ្យដឹងថា ជនស៊ីវិលអ៊ុយក្រែនជាង ១០,០០០ នាក់ត្រូវបានសម្លាប់ ខណៈយោងតាមរបាយការណ៍របស់កាសែត New York Times វិញបានអះអាងថា រហូតមកដល់ពេលនេះទាំងទាហានអ៊ុយក្រែន និងរុស្ស៊ីសរុបចូលគ្នាគឺមានជាង ៥ លាននាក់បានស្លាប់បាត់បង់ជីវិត ៕

ដោយ ៖ សុខ ជីវ័ន្ត

ចុចអាន ៖ រុស្ស៊ី បញ្ជាក់ជំហរទៅ ចិន យ៉ាងណាដែរ ក្រោយ តៃវ៉ាន់ ជ្រើសរើសបានមេ ដឹកនាំថ្មី